تَباريح العشق

Part 43

"و كَيفَ يُضلمُ لَيلي و انتِ قَمَري ؟ "

يَــشم

دوري دوري يا دنيا ورجعي بيه لـ أركان ..

مترددة ، خايفة من الجاي ، اريد أتراجع ، متندمة على موافقتي ، اريد ألف راسي وأنام وأشرد من قراري ..

بس تأخرت ..

رفعت راسي أباوع لمُـنقـذ يسوق السيارة وماما بالصدر واني وره ..
متوجهين لكربلاء المقدسة حتى نعقد سيد بالأمامين وهذا چان أختياري ما أريد أي حفلة

شحصلت من الحفلات ؟ أحتفلت وسويت عرس بگد راسي وچان كابوس الي

كرهت الحفلات والأعراس ما أريد أكررهم مرة ثانية هذا هوَ أكتفيت وأخذت نصيبي منهم

جازفت بروحي مرة ثانية ووافقت على الزواج وتايهة وضايعة وأريد الله هوَ يوفقني ويسندني ويدليني على الأختيار الصح

أتمنى ما أتندم على أختياري وقراري للمرة الثانية أتمنى ..

طبك السيارة مُـنقـذ بالگراج ونزلنا نتمشى للأمامين ومچلبة بعباية أمي عبالك جاهلة صغيرونة واني عايفة بنتي بالبيت

بس شسوي خايفة وأريد أشرد والله بس وين أشرد بعد حتى مُـنقـذ يشمرني جوة السيارات لعبت لعب عليهم ساعة اي موافقة ساعة لا مموافقة لحد ما بزع وخابره گدامي يگله موافقة تعال أخطب

أجه للبيت هوَ وأبوه وأتفقوا على حاضر وغايب وهاي السوالف التعبانة و رادوني أدخل ونگعد سوة مثل الشوفة الشرعية بس رفضت

على شنو أشوفه شنو قابل ما شايفته شو أتنرفز من شكله مدري شلون وافقت والله لحد هسه مامستوعبة روحي وافقت كلساع أصفنّ واگول صدك عود وافقت ؟

والله أحس مو اني وافقت مدري منو وافق يمكن شيطاني وافق نعلة الله على الشيطان الرجيم

واذا الملاك مالتي وافق فـ شكراً جزيلاً أثق بموافقتك ..

واني أسولف أسولف ويه روحي ما أحس الا وصلنا لبين الحرمين مو بس چلبت بعباية أمي لا أريد أختل بيها

باسمة: يَـشم راح توگعيني أمي

يَـشم: ماما ما أريد ما أريد بطلت

مُـنقـذ: شو عيدي ما سمعت ؟؟؟

أنخرست من التفت عليه يخوزر بيه واني من توتري واني ألمح أركان يتقدم علينا خزرت مُـنقـذ

يَـشم: شو من هسه صاير ضدي ؟؟؟

مُـنقـذ: اي مو معركة هيَ

يَـشم: مُـنقـذ وحق الله إذا صاحبك يباوعلي والقرآن أبطل ترى ما أطيقه

مُـنقـذ: يممه سكتيها لا أشك هدومي راح نعقدلهم وتصيح ما طايقته بله سمعها الولد وين أنطي ووجهي ؟؟؟؟