وأندلك مغمض والوجوه هـواي
ترى لـ بالروح بس الروح تندله ..
راسم: رانيا !!
التفتنا كلنا على باب الأستقبال واگف عمو بملابسه وحذائه مبين طاب بوجهه علينا من سمع صوت بيبي العالي وصدمتها ، عيونه مشخصهن على الي أسمها رانيا وخزرة تشل شل
بِنيه: تعااال يمه تعاال فهمنااا السالفة شني !؟
أشر لـ رانيا بعيونه حتى تطلع وهيَ بكل هدوء انسحبت من الأستقبال وطلعت توگف بالطرمة وعمو التفت على بيبي يگللها
راسم: راجعلج أمي
هزت راسها بيبي ساكتة وهوَ طلع وسد باب الأستقبال وراه طفرنا اني وريهام نباوع من الشباك ، عمو وگف گدامها وعيونه تاكل بيها حسيته يريد يقتلها وهيَ تباوع بعيونه وهادئة هادئة هدوئها قلقني معقولة ماخايفة منه ؟
ريهام: جاي يتعاركون يسولفون شو مامبين
يَـشم: يتعاركون بس بصوت ناصي باعي عمو شلون ينتر ويعصر بأيده
ريهام: خرب يومها غير حلوة انوب شلون تباوعله من يمي خدرت
يَـشم: گبررر
كفختها راشدي وهيَ تضحك التافهة عبالك صاير شي يضحك مو مصيبة بگد راسي ، رجعت اباوع عليهم ما طول حديثهم ورانيا طلعت من البيت وعمو فرك وجهه بعصبية ويسد ويفتح بأيده
خابت آمالنا من شفناهم أجتمعوا بغرفة بيبي وشحتونا واني الفضول ظل ياكل بيه أكل راااح اموووت اذا ما اعرف السالفة
أنوب ريهام العرمة تتسنط على كل البشر الا على عمو تخاف منه لأن مرة لگفها وزوعها العافية وتوبت منه
ريهام: هسه تطلع أمي ونحلبها حلب شحدها ما تحچي وعلي أصلخ وأذبح
عفية باب الشارع اليوم مايسكت راحت ريهام تفتح الباب ورجعت سريع گالت
ريهام: هذا أخوج
يَـشم: منو ؟
ريهام: مُـنقـذ
طلعتله واگف يم باب الشارع سلمت عليه وگال مستعجل
- وين راسم ؟
يَـشم: جوة
- صيحي گليله منتظره
حچاها ويباوع للساعة بأيده مبين متواعدين ومتأخرين شافني مبحلقة بي هزّ راسه
- الووو ويامن احچي ؟
يَـشم: مُـنقـذ صارت سالفة عووويصة عويصة
طب بسرعة وسَد الباب
- شصاير ؟
يَـشم: أجت بنية قبل شوية گالت اني مرت راسم وكلنا مصدومين وعمو داخل أجتماع ويه بيبي وعمتي
أنت تقرأ
تَباريح العشق
Romanceغانيَة مِن نَسلِ الأفلاكِ تَقلَّبت بوَسط الدُناة قارَعت مُدلهمات الحَياة لتُنقذ زهرَة الهُندباء جاءها المُنقِذ مِن بُحور الأنوَار فتوَلدت سَنار الحَياة لتَنطفئ بمرورِ السِنين وتَحيا مِن شُعاع الفَتان يَدور مَضمون الروايَة عَن فَتاة تُحارب الصِعاب لت...
