Babae sa Hagdanan
Alas 5 na yun ng hapon, medyo madilim na. Pumasok ako sa bahay para maghugas ng pinggan, madalim sa loob ng bahay kasi lampara ang ilaw ng bahay ng tita ko. Habang naghuhugas ng pinggan, may naaninag akong babae sa may hagdanan papunta sa kwarto ng yumao kong lola. Noong una binalewala ko lang yun kasi akala ko si tita lang yun.
Pero may bigla akong narinig na boses sa labas, kaparehas na kaparehas sa boses ni tita. Nilingon ko ulit ang babae na nasa hagdan. Nanindig ang balahibo ko nang makitang nakaharap na ito sa akin. Tumingin ako ulit sa bintana para ikumpirma na tita ko talaga ang nasa labas. Kung si tita ang nasa labas, sino tong babae na nasa may hagdanan? Lumingon ako ulit doon sa kinatatayuan ng babae. Nagulat nalang ako nang makitang nakaharap na ito sa akin at nakatitig sa mga mata ko.
Halong kaba at takot ang nararamdaman ko noong mga oras na yun. Itim ang mga mata niya, shoulder-length ang buhok niya, sobrang putla ng balat niya, at nakasuot ito ng brown dress na pangluma yung style. Galit na galit itong nakatitig sa akin. Mas lumala pa yung kaba at takot ko nang bigla siyang lumutang at tumagos sa pinto doon sa kwarto ni lola.
Walang ano-ano ay iniwan ko ang mga huhugasin ko at kumaripas nang tumakbo palabas ng bahay. Agad ko namang sinabihan si tita na may taong nakapasok sa kwarto ni lola. Himdi agad siya naniwala sa akin at tinawanan lang ako. Tumungo siya sa sala at nakitang nakasara naman ang pinto doon. Wala din naman daw siyang nakitang tao na pumasok sa pinto doon sa kusina. Agad niyang tinawag si mama kung may nakita ba siyang babae na pumasok. Pero wala din naman daw nakita si mama.
Agad silang kumuha ng flashlight at pumunta sa kwarto, nagtaka naman sila kasi nakasarado naman yung pinto. Sinabi ko sa kanilang tumagos ang babae sa pinto. Nagkatinginan sina mama at tita sabay pasok sa loob, ako naman ay nagpaiwan sa labas. Ilang minuto pa bago sila lumabas muli. Sabi pa ni mama, pagpasok na pagpasok nila ay dama na nila ang paninindig ng mga balahibo nila. May narinig silang lumalakad at parang nangangalkal sa mga gamit ni lola ngunit wala naman silang nakikitang tao. Agad daw silang nagsindi ng kandila at nagdasal.
Akala ko tapos na ang lahat, pero isang araw nag-away kami ng mama ko. Pumasok ako sa bahay ng tita ko. Biglang dumilim ang paningin ko. Nagulat nalang ako nang makitang nakahawak na ako ng gunting at nagkalat ang buhok ko sa sahig. Naguguluhan ako, ang naaalala ko lang ay galit ako at iyak ako nang iyak. Wala akong maalalang kumuha ako ng gunting. Dali-dali ko namang tinignan ang sarili ko sa salamin, natakot ako nang makitang kaparehas yung style ng buhok ko sa buhok nung babaeng nakita ko. Kinilabutan ako nang bigla akong may nakitang babae sa may bintana, yun yung babaeng nakita ko sa hagdan. Nakatingin ito sa akin at ngumingiti. Lumabas agad ako sa bahay ng tita ko habang nanginginig yung mga tuhod ko sa takot. Pagsapit ng linggo, nagsimba ako at nagdasal at salamat sa diyos hindi na muling nagpakita yung babae sakin.
