أبتسم لي

1

من كتابات زهراء العراقية
المقدمة
أسمي مها عمري 31 عام من كربلاء تزوجت من عشر سنوات من رجل غريب عنا بعد أشهر من الزواج أكتشفت أنه مريض نفسي وعايش على العلاج بعدين حالته أزدادت سوء من صار عنده مسؤليية بيت وأهله هم ما عافوه بحاله اني جنت كل يوم زعلانه ورايحه عند أهلي بأول سنة من زواجي كنت اداوم سنة أخيرة
بمعهد المعلمات وحبلت بطفلتي الأولى شبعت ضيم مع زوجي شك وهلوسات وأخي كان يصرف علية وهم خطية شعوره بالذنب أتجاهي خلاه أبد ما يقصر معاي رغم أني متزوجه لأن هو ألح عليه بهذا الزواج والسبب من توفى أبوية شبعت قهر من امي أحسه ما تحبني الآن كنت أكثر شخص يحبني بابا الله يرحمة لهذا احسه تفضل أخوتي الاثنين علي و أياد . علي كان اخي الكبير واياد اصغر مني . علي كان دوم واكف وياي وابد ما تركني منا من تخرجت وبعد سنة هو توسط الي عند صديقة اقاربه واصليين وطلع تعيني أبسرعة . بعده شلت نفسي من الناحية المادية وبعد أربع سنوات من الزواج البأس قررت اطلق الكل وكف ضدي واهله دمروني دمار حرب نفسية وأهلي هم وخاصة امي دمرتني بكلامه على انو انت على الاقل عندج رجل ووضيفة ممحتاجه شي لا تجين يم اخوتج خطية حمل عليهم وانت عندج ثلاث بنات .. اتحملت وضليت وهاي عشر سنوات مرت على زواجي مع شبه رجل 24 ساعه نايم والمسؤليية كله على عاتقي .. أخوته لزوجي كولهم ازوجو وطلعو الان امه وابوه ما ينحملون بس أني ضليت اعاني وياهم الان اذا اطلع اتبهذل زوجي ما اعتبره رجال ع الاقل اهنا عمي يساعدني ببعض الامور وهم حالتي الماديه ما تسمح أجر بيت . . .
حالة زوجي استقرت ما يأذي احد بس من كثر الادوية دوم نايم وتعبان واهله مرتاحين ذابيه عليه وخلصو منه وهم ابنهم اسمه مزوج ومستقر واهلي هم مرتاحين زوجني ومستقره .. بس لحظه اني شنو عني ؟؟؟؟ نسيت روحي أنثى اصلا صار خمس سنوات مبتعده عن زوجي هاشم وما اطيقة احسه هو كسر ضهري منين طلعلي علة على قلبي اذا احس شي اتاجهه فهو أحساس عطف شفقة وبصراحة اعتبره طفل رابع على عاتقي.. ومرات احس نفسي اكرهه مشاعر متضاربة ..
بيت عيالي جبير بس محد بيه بس اني وعمتي وعمي وجهالي وزوجي.واني موفقه ما بين عملي وشغل البيت وبناتي
بنتي فرح عمره 9 سنوان
وبنتي ريتاج عمره 8 سنوات
وبنتي تبارك عمره 6 سنوات
اني معلمة ماخذه صف الاول ومرشدتهم كنت اعتبرهم اطفالي هم ومجدة بعملي والمديرة تعتمد علية ومشهورة بعطفي طالباتي حتى من يتخرجن من الأبتدائي ابقى بذاكرتهم مترسخة واذا شفت وحده الصدفه تاخذني بالاحظان ..
ندخل بالقصة ...
حياتي روتينية من الدوام للبيت ومن البيت للدوام ..
رجعت كالعادة للبيت ..
مها :- السلام عليكم
عمتي ام زوجي:-- وعليكم ها شو اتأخرتي اليوم ؟
مها:-- لا ما تأخرت
عمتي:- يلا يلا روحي صبي النا لكمه اني وعمج كطعنا الجوع
رحت للمطبخ ركبت التمن والمركة طابخته بالليل حميته وصبيت الهم ورحت طبعا مطبخهم ولا يندخل طباخهم ابو ثلاث عيون صغير حاطيه ع ميز مسكرب و كاونتر حديد مزنجر من زواج عمتي عدهم والمطبخ الارضيه مالته صاعده ونازله وبعض الكاشيات مكسرات والتراب طالع علينا والحيطان سود الان قبل اول ما ازوجت جانو يطبخون على جولة والحيطان مصخمه منه يعني يسد النفس واني مالي واهس ارتب شي وراتبي اصلا يادوب يكفي الانهم ياخذون نصة مني مصرف للبيت الا قابلين اكعد.وياهم وهمه هم ماعدهم غير راتب العاطلين مال عمي وولدهم ابد ما يساعدوهم لهذا اني انطيهم من نفس طيبة الان هم خطية والنص الثاني من راتبي يادوب يكفي مصاريف بناتي ومصاريفي الخاصه وزوجي اجيب اله علاجه من راتبه مال العاطلين .
يعني اقل شي يأثر على ميزانيتنا .. غسالة ادية تعبت من الغسل اخوية علي جابه الي ومن عرفت امي ومرتة ثاني يوم اجن يتعاركن وياي ..
رحت على فراشي انطرحت طبعا بعد ما أكلت اجتني بنتي توته تبارك نامت بصفي
تبارك:- ماما باجر عدنا اجمتاع
اني :- اي ماما اعرف
تبارك:- اي وبابا يروح؟
اني صفنت ياربي اشون بيه الى متى اضل اعاني اني وبناتي باجر عدهن اجتماع للاباء وخطيه مثل كل سنة اني اسد عنه .
تبارك:-- ماما بابا شنو يشتغل
اني مسدت ع شعره وهم احتاريت شنو اكول اله .
اني:-- عماله حبيبتي يعني عامل بناء
هي:-- ها مو ست حوارء سألتني واني ماعرف
اني:-- اي يمة كولي اله
اني ضجت من هاي حوراء زميلتي هي بالعمل بس منافقه بشكل دائما مستفزة وتتحركش بيه هي تعرف بحالة زوجي ومع هذا سألت الطفلة ...
ثاني يوم لبست البنات وحضرت الريوك الهم وكعدنا ناكل
عمتي :- هاي الجبة امنين الج
اني:- اشتريته عمة
عمتي:-- يا واشكد دفعتي
اني:-بفلوس عمة
عمتي:-- ها ماتريدين تكولين حتى ما احجي عليج جان جمعتي هاي الجم فلس وضميتهم للبيت شلج بهاي الجرود
اني:- لو احجي منا للصبح مراح تفهمين عمه
عمتي:- شنو ولج اني ما افهم
اني:-- يووووه يمتى كلت هيج اقصد انت شعرفج بناس اشون عايشه اني اشون ادوام بجرود لازم اشتري وبعدين والله هنه جبتين اشتريهم واضل ادك بيهم منا من يتلفن الا اشتري..
عمتي:- يمتى جبتج الرصاصية جديده وشفتج ذبيتيه
اني:- عااا يمتى صارله اربع سنوات ادك بيه
عمتي:- والله نسوان هذا الزمن مبذرات ..
خلصت اكل وكمت غسلت المواعين واخذت بناتي ورحنا للمدرسة مسجلتهم وياي
وبنتي تبارك اني مرشدة صفه .. دخلت للصف وجان اشوف ابنية جديدة اني سمعت اكو بنية اجت نقل جديدة بس هسه الا شفته ابنيه تخبل جنه لعابة بس ميتة من البجي وتكول اريد بابا .
و يمه ست ميس صديقتي المقربة
وكفت يمهم وسالت
مها:-- ها ست مها صباح الخير . اشبيه البنت
ست ميس:- والله عذبتنا ابووهه جابه اليوم وراح وضلت تبجي وراه
اني:- اها خطية
ميس:- تكول المديرة ابوهه اهواي نقله مدارس الان ابد ما تسكت العام طول السنه هم تبجي وهو نقله مدارس أهلية هم مفاد اله وهسة يأس منه وجابه اهنا .
اني:- هاي شنو البنية اله سنة ثاني بالاول وبعده متعودت ؟
ميس:- اي والله معرف شنو قصته.
اني:- يلا روحي لدرسج واني اصرف
ميس:- الله يعينج ع طلاب الاول يمتون ههههههه همزين اخذ سادس
اني:- الله المعين
ميس:- اشبيج ليكون الحقنه عمتج
اني:-مو وقته هسه روحي وبعدين اسولف الج ..
راحت ميس
اني:'-- يلا بنيتي الشطورة اش يكلبي ليش دتبجين
الطفلة: - اريد بابا وتفرك بعيونهه الحلوات
سبحان الخالق عيونه كبار ناعسه و سود مثل ظلام الليل وشعره لونه بني ع شقار وبيييضه وخدوده حمر يعني ضليت بس صافنه ع شكله ..
اني:-- كمت أيست منه وشرحت الدرس بس طبعا راسي صار طبل من بجي البنية اللعابة ...