أبتسم لي

2

ثاني يوم هم نفس الحالة . . . الطفلة تبجي اني تقربت منه ..
مها:- ياعمري ليش دتبجين
الطفلة:- اريد بابا
اني:- راح يجي بس هسه ما يقبل
الطفلة:- ليش
اني:- الان تبجين
الطفلة صارت تبجي أكثر
اني:- اي بس هو كال ما اجي لان نسرين تبجي
الطفلة اسمه نسرين:-باوعتلي من بين دموعه
اني؛:- كملت اي بابا كال اذا تسكت وتقرة ويه صديقاته اجي اخذه ونروح نلعب
هي:- صدك
اي حبي بس هو كال مراح اجي الانه مو حبابه
الطفلة رجعت تبجي
اني :- ها مو كتلج بس الي مو حباب يبجي يلا حبي اذا سكتي اخابر بابا
الطفلة سكتت بس ضلت دمعه تجري اني عفته ورحت وصرت ادلعه واشجعه حتى تحب المدرسة بعد اسبوع الطفلة تأقلمت مع المدرسة ... واجه والده شكرني وكال بس تحجي بيج البنيه بعدين عرفت انه يتيمة الام من الولاده وابوهه هو الي يعتني بيه ضجت عليه وتعاطفت وياهه......
رجعت للبيت من المدرسة اني وبناتي وجان اشوف لمة رجال يم الباب الخارجي لفيت عباتي على وجهي ودخلت من سمعت صياح ولطم  عرفت صايرة مصيبة هبطت دخلت شفت عمتي تلطم ... بعدين عرفت عمي الضحى متوفي ... الى رحمة الله
ايام الفاتحه كوله واني ما مرتاحه معزبجية بعد . بيوم الثالث تعرفون يصير يوم مميز عدنا بيه ختمة .. خلصت الختمة اني جنت منكعه تمن ونظفت الدجاج للعشا لان عدنا خطار محافظات يخلصون الفاتحه الا يرحون . واني جنت لابسه ثوب من عمتي لان معندي ملابس صيفية سود والثوب كشمير مزرف من جوة بس شسوي معندي وقت اكص او اشتري وامي وصيته ميت مرة ونست او تناست .. اجتني بت حماتي وكاالت الي اجو نسوان يعزوج اني استغربت منو اجاني يبو بس لا المعلمات ياربي اشون بيه . دخلت للهول هنه بيه كاعدات الان الاستقبال مزدحم سلمت عليهم وجان باين عليهم الدهشه والاستغراب من مكان اقامتي يفشل الأرضيه صاعده ونازله وصب مكسر والحيطان طالع الجص مالته ومفطرة وسوده . كعدن ربع ساعه وشردن هههه بس ميس بقت اساسا هي مو اول مرة تجي خطيه ..
خلصت الفاتحه وكلمن راح لبيته ورجع لحياته
واني هم رجعت لدوامي ..
جان اول يوم الي بعد وفاة عمي دخلت للأدارة سلمت عليهم وجان تتلكاني حوراء
حوراء:-- والله تعذريني ساعدت بالكدر عليه شسوي .
اني استغربت  من كلامه  ومافهمت قصده وجان تغمز اله رقية معلمه ثانية ..
اجتي الكاتبه وكالت المديرة تريدج رحت لغرفة الادارة سلمت عليه وهي هم .
المديرة:-- شوفي مهاوي حبي انتم اهنا كولكم خوات واني امكم
اني:- ونعم منكم ست
المديرة:-- شوفي حبي الامومة قول وفعل مو بس قول . واني وخواتج قررنا نوكف وياج بشدتج هاي
اني:- ما قصرتم ست اجيتو واديتوا الواجب الله يحفظكم ..
المديرة:-- اي يمة واني المدرسات  قررنا نساعدج بملغ مادي
اني:- لا لا ست مووالان البيت هيج اخذتو عني فكره اني الحمدلله حالتي ميسورة
المديرة:- بنتي اني عرفت حالتج و وضعج مع زوجج واحنه اهنا مو بس ننطي دروس للطلاب كلام ع ورق لا بنتي الدرس هو من اخ يساعد اخوه المسلم اذا هو بحاجته والنبي وصة بهذا الشي لا تخالفين كلام ربج ونبيج ما بيه شي المساعده والتعاون وكلنا نمر بضروف وبفضل الله والي يحبونا نطلع من أزماتنا .
اني معرفت شنو ارد ...
اترخصت منه ورحت لدرسي ...
ومن خلصت الحصص رجعت للأدراة وبيدي دفاتر الأملاء
وجان قبل لا ادخل أسمع حوراء تكول
حوراء:-- اني عندي زولية قديمه بس شنو بالنسبة لفرش مها تخبل جديدة راح هم اتبرع اله بيه
رقية:واني عندي طباخ ابو فرن اله اخاف معده الان اثاث اشو بيتهم مابي اكيد المطبخ هم تحتاج بي .
ميس:- لا بنات اخاف مها تنحرج ..
اهنا دخلت عليهم وسويت نفسي مسمعت شي ..
بعدين دخلت المديرة وحطت الضرف بيدي وكالت هذا شي بسيط مني ومن البنات  ... اني ضليت متحيره اخذه لو لا من جاني عزة نفسي ممتعوده اخذ صدقات وخاصه ما أحب نظرات الشفقة ونظرات حوراء عود هي منكسر خاطره عليه واعرف بيه طبع بعد مده تعيرني واساسا هي دائما تعاملني بأستصغار.  . ومن جانب اني بأمس الحاجة اله الان الشهر بنصه واني راتبي خلص بسبب النواعم الي ساهمت بيهم بالفاتحه الان حمويني هم حالتهم مو شي ومتبهذلين وعمتي جانت ضامه من المصرف مبلغ وهم صرفته وضاله حايرة بنص الشهر اشون بيه  ..
اخذت واني مدنكه راسي .
طلعت للبيت بس من الانحراج اذكرت اني ناسية دفاتر الاملاء على الميز ولازم اكمل تصحيحهم الان اعداد الطالبات هائلة وملحك اكملهم اثناء الدوام رجعت  لغرفة المعلمات وجان هم اوكف يم الباب ماعرف ليش حبيت اسمع شنو يكولون بعد ما طلعت ..
حوراء:-- اي اشبيج انتي هي تحلم تفرش مثله اصلا بيته رث اشون كاعده بيه معرف اكيد هي متعوده الناس تصدق عليهم حتى لبسه يمكن ملبوس لان كلش مسحوك وتلبسه ..
ميس:- لا مها عمره ما مدت ايده بس الله وحده اليعلم بيا حال هي هسه حتى قبلت تاخذ
رقية:- اي بنات خطيه والله كسرت خاطري اتمنى اكدر اساعده بعد اكثر ..
حوراء :'- شنو فاتحيه تكيه ما تروح لأهله.. طبعا المديرة ماجانت وياهم اعتقد بغرفه الادارة الانها انسانه بمعنى الكلمة ماتخلي احد يحجي..
اهنا اني رجعت طلعت من الباب بعدين كلت والله هسه لو اموت من الجوع ما اخذ شي من احد ..
رجعت للغرفه شفت المديره دخلت للبنات وهنه هم لابسات عبيهن بس يتحضرن ويمسحن المكياج عن وجهن الا يطلعن مو مثلي كولشي معندي و دوم اطلع اول وحده . دخلت
اني:- ها لساكم ما طالعين ..
ميس :-ها اشو رجعتي
اني:- والله نسيت الدفاتر وهم بيه خير رجعتي تقربت من المديرة وكلت
اني:- ست هذا المبلغ ثقيل على عاتقي
المديرة تعجبت صفنت بوجهي اتريد تفتهم ليش غيرت رأي
اني:- الله اليعلم اني اشكد محتاجه هذا المبلغ بس والدي الله يرحمه دوم يكول الانسان اذا ذهب ماء وجهه واعتمد على عطاء الاخرين تعود وأن تغير حاله الى حال الملوك يبقى يستجدي من الناس واني ست ممتعوده هاي افلوسكم رجعوهه وباوعت لست حوراء وكلت:-- اكعد ع حصيره مركعه ولا زولية عمري ما احلم بيه هي عضت شفته عرفتني سامعه وطلعت حتى قبل لا يحجن شي ..