أبتسم لي

11

لبست ثوب ابيض وفوكه جاكيت هم ابيض بس مو منفوش . واني رحت لصالون سويت مكياج  وشعري .. الساعه ب 6 العصر  يجي احمد ياخذني .. بدون لا حفله ولا شي وبناتي اول ايام زواجي كالت امي خليههن يمي ..
بوستهن ووعدتهن بحياة افضل من هاي ..
اجه احمد واطلعنا من البيت .. جانت سيارة تنتظرنا .. 
احمد:- يلا تعاي هاي اخويه ترة وجاي يوصلنا ..
اني:- اها خوش
صدك السايق من شافني اتقربت نزل يسلم عليه وجان يطلع أستاذ سالم مديري!!!!!!!!!!!!
احمد: - هذا ابو داود اخويه الجبير  وهاي مرتي ابو داود
سالم شفته مثل الي استغرب واني هم كلت اشكد الدنيا اصغيره اخذت اخو مديري .  سلمنا ع بعض وودعت اياد جان واكف بالباب .
ورحنا المسافه كولش قريبه جنا بنفس المنطقه بس بيت احمد اضاهر متعمق بالبساتين احنه جنا قريبين على الشارع بس همه دخلنا بنص البساتين الي ذيج المرة طاردتني الجلاب بيه
احمد:- هاي كل الاراضي ملكنا وهذا الحلال النا ..
اني:- الله يزيدكم ... عرفت هاي الاراضي ملكهم الي جنت اركض بيه  وصلنا بمكان بيه بيوت اهواي بس متوسط هاي الابيوت بيت يخبل جبييير والحديقه مالته هي وحده بحجم بستان نزلنا واحمد وكف ويمي وكال :- هاي الابيوت كلها النا ذني كلهن لاخواني واولاد عمامي الي ماخذين خواتي وهذا البيت اشر على البيت الجبير .. هذا بيت ابويه اني عايش وياه يعني بيتج .. وبصفه لفت انتباهي بيت تصميمه مختلف عنهم كان راقي من شافني احمد صافنه عليه كال هذا بيت اخويه ابو داود ..
بس كل الحدايق منفتحه على بعض الان ابويه يريدنا كلنا يمه وبيت واحد لهذا ابيوتنا مفتوحه على بعض ومشتركه
اني:-- هاااا
سالم:- يلا ادخل احمد محلو وكفتكم اهناااا
احمد:- اي خوية ودخلني للبيت جان مشينا بالحديقه كله برتقال ونارنج وسياطات للعنب ونعناع وحتى كرفس زراعيه ..
والحديقه داير البيت من ورة ومن كدام بس اني شفت بس الاماميه ..
دخلنا للبيت . بيتهم عباره عن صااااله جبيييرة حيل والغرف مطله عليه داير مدايره وعدهم ديوانيه خارجيه جبيره حيل ..
وفوك هم اكو غرف تعرفت على نسوان اخوته جانن بالبيت الجبير عمود ييستقبلني كلهن
اتعرفت عليهم وعرفت كلهن ماكاعدات ويانا اهنا بالبيوت الي بصفنا بس دومهن اهنا الان البيوت مفتوحه على بعض وهنه شايلات البيت الجبير بس مرت ابو داود ومرت ابو جاسم اخوههم الثاني ما تعرفت عليهم . كال احمد احنه نروح نسلم عليهم ..

ابو سالم عنده اثنين نسوان وحده ام احمد وسالم وابو جسام وابو كرار .  يعني همه اربع ولد. وام سالم مبينه السلطه بيده. والثاني الي جايبه ست بنات  .
وسالم هم عنده اثنين نسوان بس بيتهم وحد بس حديقتهم مفتوحه على حديقتنا ..
واخوه الي اصغر من سالم بشويه ابو جاسم هم ماخذ اثنين وهم بيته وحده .....
بيت ابو داود سالم بيته ع يمينا
وابو جاسم على يسارنا .
اعرف صارت هوسه بس همه العرب هيج عوائل متشابكه وجبيره .....
....
دخلت لغرفتي جانت حلوة خشاب عراقي قوي ..
انوب احمد كال غيري ملابسج وتعاي خل تتعرفين على ولد اخوتي
اني اتعجبت منه اشو لا حاول يتقرب مني ولا انبهر بيه خصوصا جنت لابسه ملابس تبرز مفاتني . صدك لبست جبه عريضه ومسحت المكياج تهي بي هيج تعبت نفسي ورحت صالون .. نزلت عرفني عليهم وانوب طلعني من بيتهم ورحنا للحديقة ودك باب بيت ابو داود طلعت النا هاي المرة الضعيفة الي اجت يوم الخطبة ... منه اذكرت وين شايفته هاي المرة الي طلعتني من الحفره طلعت هي مرة سالم .. سلمنا عليه واجونا هوسه بنات تتراوح اعمارهن من 16 و 3 سنوات اتلكن عمهن ..
احمد:- وذني بنات اخويه ابو داود اني بوستهم وهنه ضلن صافنات عليه وعلى لبسي ..
اهنا  دخلت مرة سمينه حيل اذكرته هاي الثانيه الي طلعتني ... عرفت بيوم الوكعه مالتي استاذ سالم صاح نسوانه واني عبالي يشتغلن عنده بالحش..
ما اتوقعت هذا الانسان المثقف هيج شكل نسوانه الصراحه .... كملنا سلام وتعارف وطلعنا منهم ..
الي بيت اخوه ابو جاسم وهم تعرفت عليهم وطلعنا
اني:- احمد اشو اخوك ابو داود ماعنده غير بنات لعد وين داود
احمد:- اخويه معنده ولد
اني":شنو
احمد:- الله ما رزقة واحنه انصيحه على كنيته سالم ابو داود ..
اني: هااااا

يتبع