أبتسم لي

4

تعبت من المسؤولية  ...
الشخص الي يخفف عني جان علي دائما يسأل عني وعن احاولي ويساعدني ..
جنت كاعده اباوع مسلسل تركي وعايشه اللحظه الصراحه جنت كثيرة المتابعه للمسلسلات التركية اطلع بيه الكبت والحرمان الي عايشه بيه واعيش احداث المسلسل وخاصه اللحظات العاطفية.. جنت مندمجه بالمسلسل جان يدك موبايلي الصرصور ..
فتحت خط
جان المتصل مرت اخويه أياد ..
اني:-- الوووو
اني:-الووو
بس اسمع صوتي بجي
اني الو الو شكو منى احجي وينج وكلبي نغزني
منى : (مرت اياد) الو مها الحكي اخوج اراح
اني:- فزيت من مكاني :- يمة اياد اشبيه
منى:- علي علي استشهد.الحكينا
اني وكع الموبايل من ايدي ضليت واكفه ومخطوف لوني هاي اكيد تشاقه اخوي علي كلشي مابيه قبل يوم خابرني ويسولف ويضحك وياي . اخذت الموبايل وادك عليه ومحد يرد . خارج الخدمه ..
خابرت امي ماترد . خابرت مرته ما ترد . خابرت اياد مايرد هاي كله واني مصرة علي مابيه شي .
جان يرجع يخابرني اياد
جان صوت باجي ويحجي
اني:- الو اياد
اياد كوة حجه مها عرفتي؟ ويبجي هاي اول مرة اسمعه يبجبي
كتله:- شنو منى تشاقه موووو؟؟؟؟
هو:- علي مات مات ويبجي واحس رجال يواسوه يمه
اني اهنا لطمت على خدودي وفقدت كعدت لكيت عمتي فوك راسي ترش ماي على وجهي وبناتي متكومات بزويه يبجن . وهاشم كاعد وصافن عليه ..
اني كمت:- عمه عود صدك علي راح . وعافني
وبعد ما اشوف ضحكته ولا اشوفه وهو يلعب ويه جهاله عمه جاوبي جذب طلع عايش مو؟
عمتي :- يلا مها كافي لبسي وخل نروح لبيت اهلج .
صدك اني بدلت بس ما لبست اسود لسه ما مصدكه اصلا اخذنا تكسي ورحنا
كلت :- لا هسه بلكت من اروح هوويفتح الباب الي .
اهنا دكت منى زوجت اياد
فرحت كلت بلكت تكول عايش ما مات فتحت خط
منى:- مها وينج تعاي ليش اتاخرتي؟
كتله:- شنو علي ما اجه
منى:- لا بالطريق
اني:- اها يعني جذب عايش اخويه مو
منى اتجحرش صوته وكالت:- مها جنازته بالطريق بعدهم بغداد ساعه وتوصل النا
اني:- يبو انت اشكد جذابه وسديت الخط
وصلنا لبيت اهلي لكيت خوات امي . وامي اه امي مو ذيج المرة المتسلطه القوية لا كاعده وصافنه ما تبجي ولا تحجي كاعده ونظراته عشوائية نظرات انكسار .. اني اجيت يمه
اني:- يمة عود صدك هاي لو كابوس يمة ردي عليه
الاول مرة بحياتي من وعيت امي جرتني وحظنتني حيل وطلعت دموعه واني هم ضليت انوووح ابصوت وغط راسي بصدره ..
راح علي راح ابو ضحكه الحلوة ويتمني من جديد....
مرة شهر وشهرين وصارت سنة واني مدا استوعب علي راح بلا رده كل ما تندك الباب أتامله هو ....
.........................
بعده توفت عمتي ام هاشم واخوته يردون يبيعون البيت ويقسمون الحصص ..
وصدك طردونا من البيت كعدت يم احد حمويني على ينباع البيت واشتري بحصه هاشم قطعه ارض زراعيه اصغيره وابنيه على راحتي ...
وانباع البيت واخذنا حصتنا مع الاسف ما جانت مبلغ زين اشتريت بيها قطعه ارض اخوه ساعده بشرائه لان زوجي ما يدبره .. بس ضلينا اشون نبنيها واني راتبي يادوب يكفي مصرف .. وصارت مشاكل عويصه مع حماي ومرته وطردونا من البيت ...
اني رجعت لبيت اهلي ... بس اياد مضايق من هاشم وجان اصلا ما يحب يشوفه يكول عنه شكله فاهي ومستفز ..
سويت سلفه جبيرة ام ثلاثه مليون حتى ادك الاساس ..
واستلمته وزوجي العزيز باك المبلغ وشرررررد يم اهل امه بغير محافظه واني ضليت ادك وانوح اهنا كرهته ...
ضليت اسد بفلوس السلفه واني كلشي ما حصلت منه ..
وبعدها بدون ما استشير احد رحت لمحامي ووكلته حتى يرفع قضيه طلاق ...
..........
جنا كاعدين ناكل
اني:-- اياد اني اريد اطلق
هو:-باوع لبناتي جانن كاعدات وكال بلا هسه وكته هذا الحجي
منى:- عمي خطيه خل تخلص منه هذا
امي ساكته اصلا من توفى علي لليوم وهي دوم ساكته وشارده البال . طبعا مرت علي اخذت جهاله ورجعت لأهله . واحنه ضلينا اني واياد وامي عايشين بيت ابويه الله يرحمه ..
اياد:- والله اصلا اني هذا لو جنت الي كلمة ابد ولا اوافق عليه رجال سكروبه هذا
اني:- يعني انتم موافقيني
اياد:- اي بس مو كته هسه
اني: - لعد اشوكت وكته لكن اعجز ويصير عيب اطلق اساسا وكلت محامي ..
اياد:- شنو ولج
اني:- لا تكول ولج اني اختك الجبيرة!!
هو: انجبي اشون ترحين وحدج هاااا
اني:- شايفني طفله ترة مرة وام بتي بطولي!
هو:- والله ماكو زلم تستشيره
اني:-كل ما اكول الكم تكولون اسمه رجال احسن ما مطلقه واني اكلك هسه مطلقه ولا رجال مخبل بذمتي مو اني بذمته!!!