أبتسم لي

3

رجعت للبيت معصبة طلعت حركتي بناتي اصيح واضرب على أقل شي ..
كاعده بغرفتي واصحح بالدفاتر اجتني عمتي
عمتي:-- اكلج اريد اسوي جاي بس الطباخ مايفتح
اني باوعت اله بحيره اوف ياربي كتله:-- عمه اني مو كلت لهاشم يذب غاز الصبح!
عمتي:- لا ما شفته ذب
اني:- اوف ياربي اشلون بيه اني
عمتي :-- كومي اترسي الجولة نفط وسوينا جاي
اني:- شمرت الدفتر وصحت كمت كمت حسره عليه اكعد وكمت اترس نفط و احجي وادردم
تبارك:-- ماما حبابه ماريد اغسل
اني:- انجبي وروحي للحمام لا ادخلج اني واطلع حركتي كله بجلدج .  رحت غسلت عن النفط
...
اني:-- فرح فرح
فرح :-- ها يمة شكو
اني:-- دخلي اختج للحمام حبابه سبحيه
فرح :- اي يمة
ورة اشويه رجعت فرح
فرح:-ماما ماعدنا شامبو
اني:-- يبوووو شنو خلصتنا توني جبتا الكم خرب حظكم
فرح:- صارلج قرن من جبتيه مو حتى العلبة مال الشامبو  طلعت روحه من كثر ما اترسه ماي واشنه 
اني:-غسلن بتايت
فرح:- بصوت هامس اي مو احنه بنطرون ابويه المزرف حتى اغسل راسي بتايت
اني:-شنو كلتي شي ولج
فرح:- لا ماما لا
راحت واني ابتسمت اذكرت ابوهه عنده بنطرون لازك بيه بالبيت والبطلعه انوب ازرف وهم ما يعوفه بعد شحجي عقله مو صاحي ...
صار الليل واني نمت بنص جهالي كالعاده طبعا اني ماعندي لا جربايه ولا شي انام على الارض اني وبناتي ورجلي ويانا بس على صفحه عازلته وعندي كنتور بابين الي احط بيه ملابسي وغراضي وبوفية بيه ملابس البنات وفوكاهه النضيده وهاشم اعلك ملابسه بتعلاكه ع الحايط ..
ضليت افكر ما نمت اشون بينا البيت يصفر والمواد والمخضر بده يخلص لا اني ولا عمتي عدنا شي نصرفه افلوس قنينة الغاز وطلع هاشم صارفه ع بطنه ضليت حايره بأمري بعدين ذكرت الله وكلت مايكطع يارب حله بحكمتك ياارب ... ونمت ثاني يوم رحت للمدرسة ...
عادي وياهم كانما ما صاير شي .. والمديرة حاولت تقنعني واني رفضت بأصرار ..
المديرة:- يا بنتي نشف ريكي واني احاول افهمج
اني:-- لا ست رجاءا بعد  لا تفتحون هذا الموضوع وياي
المديرة:-- على راحتج حبي وراحت
اني خنب خنب يا كرامتي يا بطيخ لو ماخذتهم جان حليت ازمتي اوف يا بويه من راسي الناشف مال كسر ..
خلص الدوام ورجعت للبيت .. اكو معجون سويته ماي طماطة ع بصل ونكعت تمن وتغدينا رحت اريد اعجن ماعدنا خمره .. شفت جزلاني يصفر . طبعا بناتي خطيه اشتريليهم من الحانوت وسجل عليه يعني ماقصرت بمصروفهم المدرسي بس البيت مابيه شي ينوكل والمونه نفذت . عمتي خابرت  احدابنائه كال اي راح اسوك الكم... وماكو شي منا وصلنا ..
صار الغروب اني طلعت ولابسه جنت جادر الصلاة وباوعت للسما ودعيت من كلبي الله يحلة ورحت صليت .بالليل تقريبا ب 7 ونص ندكت الباب
اني:- هاشم كوم شوف الباب
هاشم:- عوفيني نايم
اني:- هاشم الدنيا ليل اشون افتح اني
هاشم :- ماكو رد منه انطاني ضهرهه ونام
باوعت اله بكره اتمنيت اضربه على ضهره مليت من هذا الطفل الي عندي رحت ورة الباب
اني:-منو منو
الطارق:- اني اني . علي اخوج
اني انفتحت أساريري وفرحت فتحت الباب
ودخلته جان محمل خطيه ..
اجني بناتي يركض على خالهن
بوسهن واخذن منه العلاليك
علي :- حط ايده على متني ودخلنا سوة للهول
علي:--اشونج احوالج مهاوي
اني:-- بخير مدامك بخير
وكعدنه
علي:- اعذريني والله يا خوية اجيت بس يوم واحد بالفاتحه بس انت تعرفين الجيش ما ينطون اجايز اجت فلته يوم ورحت ..
اني:- لا علي عاذرتك بس ليش مكلف نفسك بهاي الشغلات ..
علي:-- هو اني شنو جايب . لعد وين هاشم ؟
اني:- نايم
علي:- بعد وكت على النوم!!

اني:- والله هو دومه نايم وابتسمت
علي عمتج وين؟
اني:--عمتي لفت راسه ونامت هم
فرح كمزت من يمه وكالت من الجوع لفت بطنه بوصله ونامت
علي صفن واني خزرت فرح
علي:- دنك راسه ورفعه ومسح بديه وجه وباوع الي وكال:- خوية لو ما العيب جان كتلج لمي ملابسج وروحي وياي بس عيب تعوفيهم بهذا الضرف ..
ضلينا اني و علي نسولف..  وبعد راد يروح الحيت عليه على العشا وماقبل دا اوصله للباب

علي وكف:- هاج هذا شي بسيط مشي امورج بيه
اني:- هاي شنو علي
علي:- اخذيهم مها
اني:- علاوي الله يخليك هو انت عندك عائلتك ومسؤليات مو انوب اني هم اصير حمل عليك
علي:- لا حمل ولا شي قابل اني شمنطيج
اني:- اخذتهم وكولت اخاف أثر على ميزانيتك
علي:- ضحك وكال مو اني حيدر العبادي وعندي ميزانية يلا ادوعناكم وباسني من راسي وراح
اني دخلت لجوه
.. ياربي اني دعيتك وانت أستجبت واجاني علي الفرج   . رحت فتحت العلاليك شفت اشكال والوان فواكه اني ناسية وجوده ههههههه مثل التين والكوجه ما نجيبهم .. ولحوم و حلويات وكل ما تشتهيه النفس . رحت لغرفتي حسبت الفلوس طلعن 300 الف ضميتهم بكنتوري وقفلت عليهم ورحت طلعت المسواك وحطيته بالثلاجه وسويت حميسه لحم وجهزت صينية العشا اهنا مادري اشون صحا هاشم وكعد اول واحد على الصينية
اني:-- يا بنات تعالن اكلن قبل لا ابوجن يخلص الاكل ..
ورحت اصحي عمتي
اني:'- عمه اصحي تعشي
عمتي:- صحت ها شنو تردين انت ما صدكت انام واخلص
اني:- عمة سويت عشا ما تردين
هي:- ليش احنه عدنا لكمه تنوكل؟
اني:- اخويه علي اسوك النا واجه اليوم
هي:-كامت لفت شيلته وحتى ما كلت شي ودعت لعلي..
وكبل كعدت تاكل وياهم واني هم اكلنا وشبعنا .
........ مرة مدة وحالة عمتي ادهورت واني ضليت حايره صايره مرة ورجال اوديه للدكاترة واسوك للبيت واذب غاز واجيب احتياجات البيت كله واذا شي عطل اضل حايره ..