أبتسم لي

50 والاخير

بالليل حطيت علاوي بكاروكه .
ورحت كعدت بصف سالم الي جان غاط بنوم عميق وضليت امسح بديه تعابير التعب الي مرسومه بوجهه وهو نايم ااه اشكد تحملت انت ألم ..
فأجئني من فتح اعيونه وضل يباوع الي واني هم بادلتة النظرات . نظرات الشوق والحب والملتقى  بعد الفراق جانت اول ليلة ننفرد بعد الفراق والبعد ... مد ايده الي .واني نمت عليه وظميت راسي جوة صدرة ونسيت دنيتي كله هو اماني وملاذي و حصتي من السعاده من هاي الدنيا .....
●●●●●
الحجي ابو سالم ما يقبل يشوف ام سالم ضلت بيت أبنه ابو جاسم مكسورة الجناح وماله اي كلمة ومرت جاسم طلعت ظيم السنين بيه ابد ما تحترمها ولا تمشي على كلمتها . و ياسمين طلعت برجله بيت وحده واخيرا بعد معاناة . والبيت الجبير لان فرغ محد بيه بس عمي ومرته . اني رجعت عشت بيه ومرت عمي لا تحل ولا تربط فأني صرت ام البيت ودرته غيرت اثاثه وجددته علي ايدي وغيرت هم من عاداتهم لغيت شي اسمه تنور طين وكل وحده جابت تنور حديد وتخبز لبيتها وبس بعدنا على عادتنا الكل يجي وقت العشا وجايب اكله وياه ومرات تجي عمتي ام سالم  ويه بيت ابوجاسم بس عمي كلش كرهه ومايريد يشوفها وهي هم حيل تنقهر من اشوفني صرت الكل بالكل لهذا مو دوم تجي...
لحد الآن  محد يعرف الحقيقة بس الله .سالم هيح تمرض لو من اعمال امه بس الناس كلها وخاصه اهنا عرب عدهم امه مرضته وانبذت بس سالم بعده يحبها ويروح كل صبحيه يسلم عليها بس مايكدر يرجعها لبيتها لان الكل تعب منها وحتى هو مرة سمعته يكول لكريم: -بالفترة الي تمرضت بيه احس نفسي واحد ثاني وافكاري مو موزنة وماكدر انام واحس واحد يفكر عني........
لهذا اني من ذاك اليوم أمنت بشي أسمه سحر. وأستنتجت ان سحر عمتي نجح لو ما الله مرض سالم بهاي الفترة وانفضحت سبحانك ربي ما أرحمك ينزل بلاء للكشف عن بلاء ثاني ..... لو لا مرض سالم ما كانت عمتي انكشفت ولا زالت ام حميدة سحرها ..
.............
بعد مدة

كنت بالمطبخ احضر فطور
واولادي الصغار (الي انجبتهم من سالم اثنين ولد وبنية )
يلعبون يمي بالمطبخ ...حسيت بأيد على متني درت وجهي . لانه سالم
-شيخ عمري شسوي اهنا ....
-جيت اشوفن شيخة العمر شتحضر النا
-روح حبيبي بالديوان وللمغرب اني كولشي مخلصه

باسني من رقبتي ....انعش بدني وكزبرة وراح للخلاط جنت حاطه بيه قطع برتقال بس ما عاصرته انشغلت بالشوربة ....ضغط الدكمه مالته وشغله ....
-حبيبي شسوي
-اساعد مريتي عندج مانع
ظل يمي بالمطبخ واظن الشيطان مشتغل شغله
ظل يركض ورايه و يحظن منا من دخل علينا علي متخوصر
-اليد عصير
اظنه غاير عليه
خله سالم يدرم
-ما يكدر واحد ياخذ راحته منعولين الصفحه
طلع قهر صيامه بالولد.وراح
على الفطور اباوع على لمتنا الحلوة والكل كاعد و يسولف مع بعض . و السفرة عامرة بناسها اخوه سالم وخواته و بناتنا و ابوه ....بس امه اتوفت قبل ستة اشهر .....

...

الله عوضني عن كل تعاسة عشتها سابقا بعائلة محبة و زوج صالح . .. اهم شي النية الصافية والنفس الطيبة مهما عانيت واتأخر عنك الفرج يجي حتى لو بعد حين . واذا ما لگيته بدنياك تلگاه بأخرتك . . . .. صحيح القصة من وحي خيالي . لكن من وقائع و أحداث حقيقة بالفعل حدثت جمعتها وكونتها في قصة واحده لنأخذ عبرة .. اولا الرضى بما رزقنا الله والصبر على ما أصابنا من خذلان
. ثانياََ والأهم أن كنتِ متزوجة او مطلقة او أرملة أو غير متزوجة أن جار الزمان بك لا تكونُِ ضعيفة الحال والخاضعة للجميع
ويائسة لتعيشِ في ذل أبدي . حاربِ ناضلِ أجتهدي لتكونِ الأفضل دائما ومن أجل أن تحيِ لا أن تموتِ من أجل عادات وتقاليد لا قيمة لها ولا فائدة سوى تحطيم المرأة. تحياتي
♡☆تراتيل حواء ☆♡

تمت... زهراء العراقية .......