أبتسم لي

10

امي :- اي يمة وموافق الرجال يربيهن الج ...
اني:- بس نفسي بووولد يمة
امي:- وهسه شنو حصلنا من الولد يايمة دعيشي حياتج الدنيا فرص وهاي ما تتعوض يكولون ابوه شيخ وعدهم خييررر من الله ناس اجاويد وعندج بناتج بعد شنو تردين؟
حرام ام محمود تمدح بيه واحنه هم نسأل عنه ها شنو كلتي
كلام امي فر عقلي ..
عافتني امي افكر بس عده حق اذا ما يخلف اكيد راح يقبل اربي بناتي بالوقت الي كل الي يتقدم الي يطلب مني لو اعوفهن لو اصلا يصرفون النظر عن الموضوع  من يعرفون عندي بنات . .. ضليت افكر احاول مرة ثانيه واجرب حظي بلكت ينعدل؟؟
الليل كله واني افكر ما نمت زين ..
ثاني يوم جان دوامي صباحي رحت اخذت اول حصة بس غيث كل ساع ومقاطعني لو سجل الغياب لو قرطاسيه بالاخير اجه اخذ الطلاب يغيرون كتبهم بنص الدرس اني كتله ما طلع درس هذا كلساع ومقاطعني وعفته ياخذهم عادي ورحت....
خلصت اول ثلاث حصص ورجعت لغرفة المعلمين .  جان اصادف أستاذ سالم
استاذ سالم:- تعاي ست مها اشويه
ودخل لمكتبة
اجيت وراهه وكتله نعم استاذ ..؟
سالم:-- ست مها ليش اتشككين بنظام الادارة
اني :-صفنت :- ها استاذ شنووو؟؟
سالم:-- ست مها صحيح الدرس له احترامه لكن المعاون يجب ان يكون له احترام لا يصح هذا التصرف ما اتوقعته منج
اني:-- استاذ ما فهمت منو مقلل من احترام استاذ غيث ......؟؟؟
سالم:- يستحب  تحلون هاي القضية بيناتكم وديه وما يتكرر هذا شي ست ..
اني:- استاذ والله مدا افهم شي اذا قصدك...
..
قبل لا اكمل قاطعني وكال :- ست ماريد مبررات اني افضل ان تعتذرين من استاذ غيث هو المعاون هنا وشخص اله تقديرة ومايصح تعلين صوتك عليه ... طبعا هو يحجي واديه لازم بيهم كتاب كان لجبران خليل جبران ..  ومن كمل كلامه رجع يقره بالكتاب بمعنى خلصت كلامي روحي من كدامي . 
اني :- ما سكتت مو من طبعي السكوت اصلا
اني:- استاذ سالم صحيح ما يصح اعلي صوتي عليه واعتقد.انت هم ما يصح تسمع منه وما تسمع مني الكلام من طرف واحد اكيد الطرف راح يحول الموقف من صالحه هاي اذا كان اكو موقف   من أساسة استاذ اني مجرد كتله ليش كلساع تقاطعوني وبأسلوب مهذب ..
سالم :- باوع الي وكال بس ما وصلني هيج
اني:- استاذ تكتدر اتسأل الكاتب جان واكف عن اذنك الجرس دك اخاف يكولون عليه عايفه درسي بعد .. ورحت ....
ماعرف اشون اجتني قوة حجيت وياه  جان الكاتب كاعد بمكتبه يمه وسمع كولشي وفعلا من سأله المدير أيد كلام ست مهاااا .
بس الكاتب ما سكت نشره نشير بين المعلمين والكل اتعجب من جرأت مها عبالهم فطيره وفقيره......

من هذا الموقف غيث كره ست مها بشكل مو طبيعي ...
.................................................................
اني:- يمة كولي للناس يجون .طبعا اخذت هذا القرار بعد اخر عركه الي مع اياد .
.....
اياد ضل يسأل عنهم المنطقه كلهم تعرفهم وهمه عشيرة معروفه بكرمه وكله مدحت بأخلاق الولد وحتى أنسابة اياد مدحو بيهم.

بيوم الي يجون النسوان يشوفني.
لبست وتعدلت اني طولي 167  وجسمي ممتلئ  تعرفون العراقية بعد ما تنجب اشون اصير بس جسمي حلو ودوم منى حاسدتني عليه تكول جسمج احلى من جسمي رغم جسمه ارشق مني ..
لبست ثوب حلو وردي ومشطت شعري اني كاصته كاريه مدرج واسود 
وطلعت الهم .....
امي :- اي والله الناس ما تنعرف واحنه نخدعنا بيهم
احد الضيفات:- اي والله عندج حق
اني اهنا دخلت عليهم وقطعت حديثهم وجانت منى وياي
جانن ثلاث نسوان جارتنا ام محمود وحده مرة شكله هيبة ومتروسه وحمرة بيضه والثانية اني شايفته بس وين مادري نسيت ؟
سلمت عليهم وكعدت احنا حاطين بالاستقبال ديوان بيجي واني كعدت كدامهم كانما بضاعه يعاينوني
طبعا ام محمود عرفتني عليهم قبل لا اكعد وحده اخت العريس الي شكله هيبة والثانية مرت اخوه الجبير ...
اخت العريس:- ما شاء الله هذا الجمال كله ومبينة من شوفتج ربت بيت ممتازة
امي:- اي والله بنتي هبة ريح جانت شايلة بيت عياله شيل نسوان حمويه كلهن طلعن بس هي بقت بيت عياله شايلتهم شيل ..
اخت العريس:- امبينه بت اصل وطالعة من بيت أصول ....
وضلو هيج يحجون امي تمدح بيه وهمه يمدحون بأبنهم سونا ملائكة
اخت العريس:- احنا ماعدنا شي بس ترة احنه ماعدنا واحد يطلع خاصه احمد ابوه يحبه ويريده يمة
امي:- لا احنه هم ماعدنا مشكله بس كون عدكم مكان لبناته تره هي ماتكدر على فراكهن يروحن وياهة
اخت العريس:--- اي اكيد احنه ما نخلف كلامنا
.
العريس اسمه احمد ممم اموت على هذا الاسم  وكون يطلع هيج يخبل مثل أخته هيج ويكعد الحظ وياي عمي ماريد جهال بعد المهم اعيش حياتي مرتاحه ...
مرت اخو العريس:- باوعتلي وكالت اني شايفتج قبل بس وين ماذكر
اهنا اني تأكدت من هاي المرة شايفته بس وووين ؟؟؟ جانت هي حيل ضعيفه ومشيله طبعا ..
............................................................
داومت ثاني يوم وجان وجهي يضحك ميته من الفرح مبين عليه .
كفاح :- اليوم الحلو فرحان
اني:- ها هيج مبين عليه ؟
كفاح:- اكيد وطايرة هم من الفرحه
نجاة اجت يمنا :- ها منو فرحان فرحونا وياكم
اني:- ههههههههه
كفاح:- اي شنو
اني:- ابصراحه باجر راح اعقد
نجاة وكفاح:-!!!!!!!!!!
اني:- ليش الاستغراب ؟
هنه:- انت مو مزوجه؟
اني:- اني مطلقه و باجر راح تجي مشيه زلم ووعقد هم ........
نجاة:- ها صدك اشو احنه طلعنا كلشي منعرفةعنج؟؟
كفاح:- على الخير حبي تستاهلين كل خير.....
......................................................
ثاني يوم حفيت وجهي وتعدلت وطلبت من منى فستان حلو وشسورت شعري وعدلتني منى
. طبعا بناتي صارحتهم وتبارك فرحت من  كتله عدهم بيت جبير تلعبين بالحديقه مالته  . بس فرح وريتاج  احسهن ضاجن .. بس اني كلت مسألت وقت ويتعودن .....
....
اني بالهول كاعده مع النسوان . بيوم العقد والمشيه اجت امه . مرة تطلع فوق ال 60 عمره مهيوبة وخواته اجني ثلاثه منهم وياهن الي ذاك اليوم ..
تم العقد بيني وبين المدعو احمد لحد الآن  ما شايفته على كلام الناس مشيت ووثقت بأياد هو كعد وحجى وياه وكال خوش زلمة معدل ...... مجان بفكري اني اخذ بصرواي  واعيش بالبصرة ابد بس القدر والنصيب فاق توقعنا....
...
اياد من ورة الباب:-- يمة راح يدخل الولد . 
امي:- اي يمة هلا بيه . ودخل علينا احمد جنت مدنكه خجلانه يعني واحد غريب عليه اول مرة اشوفه وبدون حجاب جانت اشويه صعبه علية ...  
دخل سلم علينا وسلمت عليه
احمد:- السلام عليكم .. اشونج ؟ وباسني من راسي .
وكعد بصفي بعد ما امه طلبت منه يكعد وهنه بدن يسولفن ويه امي .. واني واحمد كاعدين ع صفحه ...
أحمد:-- ما توقعت اطلعين هيج؟
اني:- ااحم اشون يعني
هو:- اصغيره واحليوة حيل ؟ !!!!
اني:- شكرا
احمد:- اني احمد خريج كلية زراعه . واشتغل اهنا بكاع ابويه وعندي 300دونم باسمي وعندي خير من الله وازوجت قبل عشر سنوات وطلقت واكيد تعرفين السبب
اني:-- بلي
هو: ههههههه بنات كربلاء كلامهم حلو
اني:- اشكرك
هو:- عمرج 33 مو؟
اني:-  بكلبي يبو هسه الا يحرجني..  : - بلي
هو:- يبين عليج 25 مشاالله الله يقدرني واسعدج وبناتج اعتبريهم بناتي ....
اني:- رحم الله والديك واني بناتي ماعندي غيرهم .
هو :-- الله يحفظهن ..
اني:- بخجل اشكد عمرك؟
هو:- ابتسم شنو هاي ماتعرفين عمري ؟؟
اني:- لا والله كالو ب 30 بس اشكد ماعرف
هو:- 36 
اني : اها
هو:- يلا اني اترخص بس خلي بالج الاسبوع الجاي نجي ناخذج واني راح ارتب كل الامور ...
اني:-- اها اوكي
هو:- هم ضحك اضاهر ممتعود ع كلامي همه اهل البصرة لكنت كلامهم مختلفه واكيد كولكم تعرفون حتى حرف الغين اصلا ما يلفضوه يحولوه الى قاف .. لهذا احمد ممتعود عليه ..
طلع  واهله هم ورة اشويه راحن بس قبل ماتطلع امه انطت سفطة افلوس اطبعا اني مهر ما طلبت همه كتبوا واحد حاضر و واحد غايب ..
....
من راحوا امي اخذت الفلوس حسبتهم ..
امي :- هاي شنو حاطين واحد ونص
منى:- هاي الاجياس شنو بيه .. همه صدك اجو محملين بس احنه ما فتحنه الاكياس ولا شفنا شنو بيه .
اني تقربت فتحت اول كيس كان بنصه كيس ماركه لكيت بيه قماش راقي والكيس الثاني بيه عباية مبين اقماشه غااالي ماركه . والكيس الاخير بيه كيس صغير فتحته لكيت بيه علبة فتحته لكيت بيه طقم كامل ويمه وصل الطقم عبارة عن سوار يخبل وقلادة والمحبس و تراجي يخبلن اني ضليت فاتحه عيووووني ماهذا بحق امون منى وامي فرحن الي حيل لبست الطقم وطلع الخاتم على ايدي فيت .
...
رحنا ثاني يوم اشتريت حلقه الي ولخطيبي والباقي ترستني منى ملابس نووم ركزت عليهم واشترينا هم كم بنطرون و ملابس طلعه وبيت . 
ورحت بعد يوم ميشت وتحضرت بعرسي الاول ما سويت هيج ودوني عيالي لصالون عاوي صبغ شعري وحركه حرك ... اهنا منى ودتني الارقى صالون طلع شعري يخبل واني اختاريت ميش وصبغ ثلجي ...
اجه الاسبوع الي اروح بيه مع احمد...طبعا احنه عقد محكمه كال بعد الزواج مو مهم واني هم ما اهتميت ..........
يتبع

.........