الصُّمود

part 12

كان هذا تفكيرى اثناء سيرنا انا والعسكرى بالممر حتى توقفنا امام احدى المكاتب ليفتحه وندلف .. وفور دخولى ورؤيتى للزائر حتى اتسعت عيناى من الصدمة

كانت امى جالسه ومعها عمرو وتقى ...كل ما خطر ببالى بهذه اللحظة هل ابى على علم بتواجدهم هنا ؟! ...
بعد ان سمح الضابط للعسكرى بالدلوف خارج المكتب التفت وهو يحدث امى ...

_ تمام يامدام حنان انا هسبكم مع ايمان ربع ساعه وراجع تانى .......قال ثم ترجل خارج المكتب وانا ظللت واقفه انظر لهم بجمود

_ ايمان حبيبتى انتى كويسه ؟ ... كنت هموت من الخوف عليكى .......قالت امى وهى تعانقنى واشعر بدفئ دموعها على عنقى ... للحظه شعرت بالحنان وشعور جميل بالدفئ والامان قد فقدته منذ سنوات .. ولكن اعتقد انه قد فات الاوان للشعور به الان

_ انا كويسه ياامى .......  تحدثت ببرود وانا افصل العناق ببطئ وانا احارب هذا الجزء بداخلى الذى يريد هذا العناق بشده

_ ايمان حبيبتى وحشتينا كتير ...... قالت تقى وعمرو وهما يقومان بمعانقتى

_ وانتوا اكتر ياحبيبى طمنونى عليكم انتوا .......قلت وانا ابطن وجه تقى بكفى

_ احنا بخير المهم انتى ......قال عمرو لأنظر له بإبتسامه

جلست على المقعد امام والدتى ، وعمرو وتقى يقفان بجانبى وتقى تضع يدها على كتفى كأنها تمدنى بالقوة والمثابرة

_ انا مش عوزاكى تقلقى ياحبيبتى .. انا وكلتلك اكبر محامى فى مصر وان شاء الله انتى طالعه منها ببرأه ........ قالت امى وهى تربت على يدى

_ سيادة اللوا يعرف ان انتوا هنا ؟ ....... تسألت بجمود وانا انظر لها ..ليعم الصمت المكان وهم ينظرون لبعضهم البعض
_ يبقى ميعرفش ان انتوا هنا .......اكملت وانا اقطع الصمت الذى استمر لدقائق

_ بصى ياامى انا مش عاوزة اوقعكم فى مشاكل مع سيادة اللوا ... انا هعرف كويس ازاى اطلع نفسى من القضية دى ومش محتاجه مساعده من حد .........اردفت بثبات وانا انظر لها

_ انتى بتقولى ايه ياايمان احنا لا يمكن نسيبك .......قالت تقى سريعاً وهى تقف امامى

_ تقى معاها حق ياايمان احنا عيلة واحدة .........اكمل عمرو مؤيداً لها

_ مهو علشان احنا عيلة واحدة انا مش عاوزة ءأذيكم معايا ........اكملت بثبات

_ بصى ياايمان احنا مابقاش يهمنا رأى سيادة اللوا .. انتى بنتى وانا لا يمكن اسيبك ابداً......... تحدثت امى بثبات اكبر وهى تنظر الى .. كيف تغيرت هكذا اين كنتِ منذ زمن لقد اشتقت حقاً لهذا الاهتمام ولكن هل يظهر الان بعد ان فقدت كل احساسى للشعور به .....هنا أُلجم لسانى وتوقفت الكلمات بحلقى ولم اعرف بما اجيب فقط اكتفيت بالإيماء