#فوبيا_الحب❤
الحلقة [40]
انا نضت لقيتها ساعه 7 وباسم مازال ما جاء شربت عصير وكيكه خشيت توضيت صليت عصر ومغرب وقمعزت قعدت نمكيج طلعت فستان أسود واستشورات شعري وتعطرت وصليت عشاء وقمعزت جت 8 جت 9 وباسم مازال ما جاء شويه ودق باب لبست ملايه صلاه وطلعت
انا : ايوه
سناء : أنا يااوفي
انا فتحت : اهلا خشي كسدت بروحي
سناء خشت : رن عليا باسم قالي قولي للايلاف خالي حلف بطلاق ع عشاء
خشينا قمعزنا في صاله
انا : اهاا اصلا استغربت قالي مش مطول
سناء : خالي هذا غالي عليه باسم وكاين ديما معه ف خالي متعلق بباسم واجد
انا : ربي يدوم محبه ان شاء الله شن جو احمد معاك
سناء ابتسمت : الحمدلله كويسين
انا : والله مرايفه علي هلي موت
سناء : خلاص هانت توا تمشيلهم ايام جايا
انا : إن شاء الله
سناء : شن لابسه اللي ساتره روحك عليا
انا : لابسه فستان
سناء : ترا وريني
انا رفعت من تحت بس
سناء : تي اسلحي خليني نشوفه
انا سلحت قعدت نسقم في شعري
سناء : هييي حي علي خويه صايع
انا : عليش
سناء : ههههههه خريطه وطن العربي
انا اذكرت جسمي ورقبتي قدمت شعري غطيته كله
سناء : ههههه بس حلو فستان
انا : حلي ايامك توا نجيك
سناء : فوتي جو برانيه
انا عديت : هو عصير شن للبرانيه بس اللي يشربوه
خشيت صبيت الاثنين عصير وحطيت شكلاطه قمعزنا شربت عصير وشويه رن باسم
سناء : هذا الحب ، ايوه
باسم : شنو عديتيلها
سناء : اها ولقيتها طايحه قفعنا الباب
باسم : شنوووو كيف دايخه ولا شن
سناء مسكه ضحكتها وفتحت ع مكبر : اها ياناري مازالت نوعي فيها وهيا شي تقول ميته
باسم بصوت عالي : كيف هكي تي طلعت مافيها شي سيبتها تبي ترقد
سناء : هههههه نبصر معاك
باسم : يا ع ### غير نروح بس عطيها ليا ترا
انا نضحك بصوت واطي : احم الو
باسم : ايوه حبيبي كويسه
انا صبيت من جنبها : اها تمام وينك ساعه 9ونص
باسم : تي خالي حلف ع عشاء وشكلهم مش دايرين كيف حاطو طنجرة ع نار والله قبل نبي نروح غير حلف بطلاق
انا : اهاا باهي تمام كمل سهرتك وروح توا نرجاك
باسم : راك ترقدي رايفت عليك
انا بصوت هادي : توتو مش راقده عندي سناء
باسم : ع اقل قولي نرجى فيك يافوبيتي
انا : ههههههه تمام باه
باسم : انحبك
انا : اها صح
باسم : انحبك
انا : تمام باه
باسم : هههه انحبببك
انا : باهي خلاص
سناء : قولي للباسم عندي تسجيل مكالمه بلكي تسكت
انا برمت عليها😳 : صح
باسم : شن قالت
سناء : نبصر معاك راك تقولي
انا : لا شي تدويلي ع حاجه شن قالت انت
باسم : كنت نقول نحبك
انا : هههههه نا ماعندي ما نقول
باسم : توا نجيك توا تقولي زي بنوته طيبه
انا : تمام نرجى فيك باي
باسم : باي ياروحي
سكرت خذيت نفس وعديت جنب سناء
سناء : حي ع خدود حمر وجهك تقول طماطمه
انا : ههههه بلاش حناطه
قعدنا نهدرزو سناء تسأل حسيتها تبي تعرف قصتي نا وباسم
سناء : تعرفي اني كنت معجبه بااستاذ خوكي قبل ما يخطبني
انا : كذابه كيف هذه
سناء : كل مايجي للباسم نقعد تقول والعه فيا نار بين مطبخ مربوعه خارجيه وما في حاجه ما اندير فيها قريب نطلع نا اللي انمد عليه
انا : اها نذكر كل مايروح يقول كنت عند صاحبي لنقاني فل مالح وحلوه ههههه
سناء : نجه ليا مهم وبعدها في جايا من جايات سمعت باسم يقوله ربي يعوضك فوتها خلاص حتي نا فتت نا هنا جتني صدمه وقطعت امل قلت هذا شكله يحب مش معبرني بكل ومش حاس بيا ونا نحرق في دمي ونفكر فيه قهرني يومها كملتها كله بكاء تقول عزاء ماقدرتش ندوي للحد الا اسماء اختي بعدها فتت موضوع قعدت نقرأ في قرآن وندعي نقوله يارب قربه ليا ويحس بيا اسماء قالتلي هذا حب مش اعجاب قتلها شكلي وخايفه مايقعدش نصيبي بعدها بفتره طويله قالتلي ماما صاحب خوك يبي يخطبك قتلها مش موافقه اسماء قالت خلاص ياماما شكلها رافضه احمد فلان نا قعدت نعيط قتلها احلفي احمد وماما هزبتنا تحسابني دايره معه علاقه فهمناها وقلت موافقه بس درتله جو شين ف مقابله نفس ماعذبني عذبته طروح يعني
انا : هههههه الله عليك جو
سناء : توا حمدلله متريحين بس خاطري نعرف كيف جيت ع باله وخطبني نحن ماعمرنش تقبلنا
انا : اهو مهم خطبك توا تجوزو وتجيبولنا قطاطيس صغار يهبلو كيفكم
سناء : هههههه ان شاء الله، باهي انتي وباسم علاقه صح
انا : لا والله نا مش شوري علاقات بكل
سناء : عنجد هذه واللي داره هذا كله وتسكيره رأسه ومش علاقه
انا ابتسمت فرحت صراحه : لالا مش علاقه بس هو مره شافني وصار معانا كم موقف بصدفه
سناء : اها باهي شن مواقف ادوي نكر منك في كلام بسيف
انا : لا مش هكي ههههه توا ندوي "قعدت نحكيلها ع مواقف ونا فرحانه لان أول مره نحس باحساس حب يعني نحب وننحب قعدت نذكر ف مواقف يضحكن بس يهبلن"
سناء : ريتي باسم ما يطلع منا ههههه نذكر مره جانا مضروب سالنه قال شن دخلكن بيا بعد ماما سألته قريب بكت قاللها واحد خش ع محل مش واعي قبل يبي يسرق ضربته وخلاص
انا ابتسمت
سناء : ديري بالك عليه حطيه ف عيونك نا باسم حافظته راه ما يبي شي غير حنان ودلع واهتمام واقسم بالله تاخذي عيونه وماعد يحلف إلا براسك
انا : في عيوني ماتوصيش
سناء : تعدليش ع كلام الناس لان بعد سمعوكم روحتو اكيده توا يبقو يجو ويكثر كلامهم
انا : سنيوه خطرها نبي نسالك لكن تحلفي براس احمد تقولي الحق
سناء : بدون حلفان ادوي توا نقول الحق
انا : باسم كاين يحب وحده قبلي صح
سناء : مادولكش هو
انا : لالا يقولي اللي فات مات وجو من هلكلام
سناء : تبي الحق كان هو اللي يدويلك نا نحبش ندخل في حياته خاصه بكل لان هو مايحبش من يدخل فيه ومايدويش هو اصلا باسم حنون حنون ودمه خفيف صح لكن كان ينفصل معش يعرف حد فانتي سياسيه توا يقولك بروحه كان فيه ولا مافي وخليك شاطره ف تعامل معه بس
انا : تي نا غبيه نعرفش كيف ندوي كان ندوي في موضوع حننفصل طول عارفه روحي لساني يجرح دغري كان طلعت صح في بنت قبلي احتمال نقتلها كان طلع حب صح طبعا
سناء : هههههه شكلك غيوره لعند النخاع
انا : ههههه والله مانحكيلك هي كبي شوال خوك توا نكبلك شوال خويه "غمزتلها"
سناء : اه يا دنس كلا انتي
انا : ههههههه
دق باب
انا نلبس ف ملايه صلاه : توا نجيك نفتح باب
انا فتح باب : اهلا تفضلي
حنين : كسدت بروحي نجاه روحت واسماء تشلط وزينب عدت للهلها ورحاب للحوشها
انا : ياروحي ههههههه
حنين خشت : وين كلبه اختي
انا خشيت للمطبخ : ف صالون الصاله
حطيت حليب ع نار وتيت سفره نسكافي وحلويات وحطيت للحنين عصير وشكلاطه وطلعت
حنين : راك اطيحي بلاملايه صلاه
سناء : ههههههه خليها لبستها خير
نا فنصت في سناء
حنين : كنكن
سناء : فات عليك باسم رن اخري قتله لقيتها طايحه ف حوش قفعنا الباب و
حنين كانت تشرب شرقت
انا وسناء : هههههه صحه صحه
حنين خذت مناديل : حي ع جدك بعد يروح يهزبك بس
سناء : توا ادفع عليا مرات خويه
انا : طلعوني من موضوع
حنين : باعتك ههههه
انا صبيت : حليب ع نار توا نجيكن
سناء : توا نحرش فيك حمادي
انا ف مطبخ : هههههههه عيوني هذا
سناء : عينك عيونك صحيح هذا ليا ياماما
حنين : طاح سعدك خوها
انا طلعت راسي : فاهمه عليها خليها ههههه
سناء : ايوه معش تقولي عيوني
انا : تعرفي شكلي انا اشر منك
حنين : تغارن يامفيكات ع قول يزن ولد محمد هههههههههه
انا : امس ماخشوش خاطري نشوفهم باسم ديما يدولي عليهم
سناء : اغلاظ متحشمين ع اساس 2في ثانوي واحد ف اعدادي
انا : كنها معش جابت
حنين : اربطتت ياحنه
انا وتيت سفره ودق باب اخري طلعت فتحت
اسماء : خيانه خزي
انا : ههههه تفضلي حماتك تحبك كيف نبي نحط نسكافيه
اسماء خشت : ونا نحب ولدها
بنات : هههههه
قمعزنا وقعدنا نهدرزو ويركبن عليا دويتلهن ع حاجات صارن معايا ف تركيا يوم ملاهي يوم سوق وهنا قعدن يدوالي علي اقاربهن بنات وشباب وطلعت شنطه وعطيتهن هدايهن كل وحده لابسه كامله بعطرها وسناء واسماء جيبتلهن ارواب وحنين لابستين وريتلهن شن جبت للخواتي نفسهن بضبط وجبت للبنات عمو وميمي وصحباتي جكات وعطور ودزن البواب ع عشاء من برا تعشينا وبرمن عليا اخري ورتبلي شناطي ف دولاب مع ساعه 12 ونص
انا : شوفي باسم يا سنيوه
سناء رنت وعطاته ليا ونا صبيت
انا : ايوه حبيبي
باسم : ايوه نعم
انا : وينك
باسم : شويه وجاي تبي حاجه
انا استغرب صوته : لالا انشغلت عليك بس
باسم : تمام شويه وجاي
انا : سلام
سكرت وعطيتها تلفون ردن للفيلا وباسم خش مع واحد كنت راقده ع سرير خذاني نوم عازقه شعري جنبي وعاطيه للباب بظهري مغطيه كرعيا بس خش للحمام خذا دوش تعشاء من عشاء اللي جابه ورقد جنبي قرب باسني
انا برمت عليه : جيت كنك طولت
باسم رقد ع صدري ولف ايديه عليا : نعسان ندوه بكرا
انا حطيت يدي ع شعره : جعان
باسم : لالا انتي تعشيتي
انا : اها مع بنات كلينا مع بعضنا
باسم : صحه حبيبي
انا : كنك ياروحي
باسم : شي خليك هكي بس
انا استغرب قعدت نلعبله بشعره وهو كل مره مرفع رأسه ويبوس فيا ونا مابيتش نساله قلت خليه براحته توا يدوي بروحه
انا : حبيبي بكرا عمل
باسم هز رأسه اها
انا : ساعه كم نوعيك
باسم : بجوي توا نوض
انا حطيت يدي ع لحيته ويدي اخري ع ظهره : تمام براحتك حبيبي
باسم بحت فيا باسني في دقني : نعليا من حنون نا
نا حظنته أول مره قبل هو اللي يحظن فيا بس حسيته جوه شين بكل في حاجه صايره معه قلت بلكي نخفف عليه شويه
انا : انت روحي
باسم قعد يبوس فيا ويتنفس بالقوه انا بروحي رعشت من ردت فعله
باسم : تي انتي اللي روحي
ورحنا ف خبر كان.....
.............
ماما : ساعه ثلاثه مازال ما خش
بابا : تلفونه مقفل
ماما : رن ع احمد ولا عمر
بابا : مشغول هم الاثنين
باب دق
بابا : خشي ارقدي توا نرجا نا
ماما : نخش للدار كان جاء كلمني
بابا فتح الباب
عمو محمد : ها رد عليك
بابا : مقفل
عمو محمد : حتي ابراهيم مقفل استغفر الله بس
بابا : رن عليا علي قالي حتي ايوب مازال ما جاء
مع خشت ابراهيم وانس
انس : داير روحه يبي يشطر علينا ما يحسبونا عويل عيت فلان
ابراهيم : بس حكينهم
انس : وثور ايوب يقولنا رأسه مليان شيب نحسابه شايب طلع مش كبير واجد غير شكله وراثه شيب عندهم
ابراهيم : تي حمار هذا
وصلو عند ممر بين حوشنا وحوشهم طلع بابا وعمو
بابا : وين كنتو
عمو محمد : شن ديرين
انس و ابراهيم : بسم الله سلام عليكم
بابا : عليكم سلام وين كنتو
انس : كنا نحلو ف قصه صايره مع ايوب
بابا : شن صاير معه
انس : باتي فكنا من جو تحقيق مش صغار نحن
عمو محمد : عارفينكم مش صغار بس بلاد مش متريحه
ابراهيم : كيف مش متريحه اللي مايدير شي مايجي شي ونحن ما عندنا ف جو لخبطه
بابا : قريب ساعه 3 ونص يا استاذ انت وياه حتي احمد قاعد قدام حوش وعمر فوق ف شقته
ابراهيم قرب من انس : كنه باتك ولا لازم نقوله هذوما يشلطو خايفين من صبايهم
انس ضربه بمرفقه ع جنبه
ابراهيم : اه ههه
بابا : بكرا اختك جايا زايره مع راجلها بيش تجيب حاجات اسال امك عليهن
انس : يصير خير من اللي تبي تجي
بابا : هاجر
عمو محمد : تصبحو ع خير
بابا : وانت بخير
بابا خش وعمو ركب
ابراهيم : افطن الجو اللي يبي يصير فوق
انس : هههههه خطرها ع فوق وين تلفوني
ابراهيم : تي نسيناهن ف سياره #### ايوب
انس : نبيه ضروري انا
ابراهيم : حتي نا نبيه
طلعو مع بعضهم للحوش عمو علي
ابراهيم يدق ع قزاز : خش يبيك باتك
احمد سكر تلفون فتح قزاز : كنه عليش
ابراهيم : قال لازم يفسخ ما يفسخ
احمد نزل من سياره : عنجد هذه
انس يجري : يشفط عليك كلب فوته
احمد يحذف فيه: روح يا كلب
ابراهيم يجري وراء انس : ههههه انت كنك تجري يا ####
انس : نبي تلفون ازف
قعدو يدقو ع حوش وماحويتك مافتحو
ايوب : كان هلكم
انس : جيب تلفونات يا سراق
ايوب : تهزبتوه
ابراهيم : اها هههه وانت
ايوب : هذا كله عشان طولت بس مادويتش ع طحنه
انس : اركب جيب مفاتيح تنحرق انت ومعرضكم هيا قريب فجر ازف
ابراهيم : تي كنك ###### املا
ايوب : ههههههههههههههههه وووووووه حي ع ####
انس ضربهم هم الاثنين : توا نركب للعليوه ندويله ع سياره وانت انبح هنا
ايوب : ههههه والله تجي توا نركب نجيب مفاتيح
عمو علي من روشن : شن في كنكم
انس : لا شي ياعمي تلفونات نسينهن بس
عمو علي : باه معش طولو "وخش"
ابراهيم : خش ياعمي ليلتك سعيده
انس وايوب : هههههههه
ايوب ركب وانس وابراهيم اتكو ع سياره ايوب
ابراهيم حاط يده ع كتفه : يدك ثقيله يابيبي
انس دفه لعند طاح ع وطي : روح يا ####
ابراهيم يضحك بصوت عالي مع طلعت ايوب
ايوب : كنكم هههههه
انس كر مفاتيح فتح سياره وخذا تلفونه ورد للحوش يجري وسيب ابراهيم يدوي مع ايوب
......
منذر يلعب بشعرها : حبيبي
هاجر : نعم
منذر : نبي نطلب طلب
هاجر بحتت فيه : عيوني
منذر : عادي تلبسي خمار
هاجر قمعزت : ليش شن تغير توا مش قلتلي معش تمكيجي بعد نمكيج بس نلبسه
منذر : خلاص باهي معش تحطي حتي اللي ف عيونك
هاجر : ههههه حاضر حتي كحل معش دايره
منذر كرها : نعليا مازالت ماشبعت منك
هاجر : هههههه عنجد هذه
منذر يبوس فيها : نطلعهن من عيونك اربعه ايام
هاجر : ههههه وبكرا بايته عند هلي
منذر بحت فيها : من قالها هذه
هاجر : انا
منذر : مافيش بيات
هاجر : علي فكره حتي عميمه قالت هكي هذينا عاداتكم
منذر : تي كيف لا لا فوتي مش لازم
هاجر : قولها للعميمه هههههه
منذر : شن نقوللها يا امي مرايف ع مراتي بيات مش بايته
هاجر : هههههه اها
منذر قعد يذغذغ : تضحكي عليا يامجرمه
هاجر : هههههه خلاص والله خلاص نفسي آخر مره هههههه
منذر وقف وقعد يوخر ف شعرها من وجه
هاجر تنفس بالقوه وتسقم في روبها : ههه حول بهدلتني
منذر نزل جنب وذنها : تبي تثبتي ولا نثبتك بجوي
هاجر ثبتت وقعدت تبحت فيه
منذر حط يده وراء ظهرها قعد يفك ف روب ويبوس فيها
هاجر : اصبر
منذر : اسسس
مد يده ع وناسه طفاها وراحو ف خبر كان ....
........
انس خش مربوعه لقاه احمد ع تلفون : تبيش ترقد انت
احمد : لا نعسان ورايه نوضه بدري ان شاء الله غير توعيني هبه
انس : غير ارقد توا نوعيك انا عطيني شحن من حداك
احمد عزقله شحن ورقد
انس حط تلفون في شحن فتحه جاءنا مسجات مكالمات من أصحابه ومسج الاء بعد قرأء مسج من صدمه لعند صبي : شنوووو
احمد : سكر فمك نبي نرقد
انس قمعز ولع دخان قعد يرن عليها يعطي فيه مقفل كمل قرطاس كامل ماجشش نوم بكل هو كل مره يرن مقفل مقفل قعد يدز في مسجات "افتحي تلفون نتفاهمو"
شن جاك توا جن ركب امك ولا نرد قدام خوك عادي"
"تعرفي كان ماتفتحي ### ام تلفون اللي كتبتبه هو اللي يبي يصير"
"تحرقيش دمي يافرخه ردي"
"انا واعيلك مش متمرقد لعند نتفاهمو ع اساس تبيش تنزلي تلقيتي قدام خلقتلك"
"بس ورب الكعبة ندمك عليه مسج وما تبيش تردي اخري"
طلع للجنان ركب في سيارته وحط تلفون في شحن سياره وطلع قرطاس دخان وبدأ فيه قعد واعي لعند صبح
.........
الاء نضت رفعت تلفونها قعدت تزر فيه لقاته طافي نطت : حي عليا وحي
صبت تجري خذات شحن وعلقت تلفونها وقعدت جنبه
الاء : يارب ان شاء الله مازال مافطن للمسج نعدي نشوف مرزي خويه
طلعت بحتت في ابراهيم لقاته راقد ردت للتلفون قعدت تقرا في مسجات : حي ع جدي تي مقلب والله مقلب خذاها جد هذا
رنت عليه انس فتح دغري
انس متنرفز : ايوه
الاء بصوت هادي : صباح الخير
انس : انزلي انا لوطه
سكر في وجه
الاء : نبي نقو .. هييي سكر في وجي حي عليا شكله راقيله مستحيل نواجه اندز مسج خير
انس يقرأ : "نقدرش ننزل ابراهيم مرات ينوض رن عليا توا نفهمك" تمام براحتك دزلها مسج
الاء تقرا : "معناها خليك فوق وما نبيش نفهم" حي ع جدي رنت عليه مابش يرد دزتله "اني نازله كان صارت حاجه فيا ذنبي في رقبتك"
انس قرأها وعزق تلفون ع كرسي اللي جنبه
الاء لبست ملايه صلاه بخت عطر وخذت شكاره كناسه "حشاكم" ونزلت
انس نزل من سياره وتكا عليها : شن مسج هذا
الاء ابتسمت : صباح الخير
انس : ادوي بسرعه راسي مصدع نبي نرقد
الاء : مارقدتش قصدك
انس : اصلا مسج حلوه يخليك ترقد وتهناء وتريح وتحلم اخري
الاء ضحكت بصوت واطي : مقلب نبيك ترد بس
انس رفع حاجبه ربع ايديه : لااااا صار مقلب شن رايك نقلبه لك جد توا
الاء 😔 : قلت مقلب نا شن فيها نبصر معاك
انس عيط رفع صبعه في وجها : مش بصاره هذه
الاء : كنك بشويه وبعدين والله قبل نبي اندزلك انه مقلب غير رنت عليا صاحبتي قعدنا نهدرزو ع محاضره ونقرو ونسيت
انس : امشي اركبي وحطي شكاره الكناسه هنا
"شير جنبه"
الاء قربت منه طبعا هي قصيره شويه انس اطول منها حطت شكاره ورفعت عيونها فيه
الاء : أنا اسفه
انس غمض عيونه : تعرفي من كثر ما نتعاركو نحس في يوم ح نتفارقو
الاء : كان جاء اليوم هذا اعتبرني ميته
انس برم عطها بظهره : اركبي نا قلت
الاء : كم كملت قرطاس
انس : مش لازم تعرفي
الاء بصوت هادي : أنا اللي لازم نعرف
انس : الاثنين وخشيت ع ثالث
الاء : هييي ليش
انس ركب في سياره وسكر الباب : من بصاره ثقيله نا حارق روحي وانتي راقد
الاء ركبت وانس قعد يبحت فيها نزل خذا كناسه حطها برا وفتح قوراج ولع سياره وطلع بيها رد بعد ساعتين لقي ابراهيم كيف طالع هو الاء
ابراهيم : صباح الخير ياطيري
انس نزل من سياره : صباح النور
ابراهيم : وين كنت
انس : نجيب في دخان هذا وين لقيت كشك فاتح
ابراهيم : اها نا نبي نشيل الاء للجامعه وعندي كم مشوار توا نجيك ولا نرن عليك
انس : لا تلفون طاح مني انكسر تلقاني في حوش
الاء بحتت فيه
ابراهيم : من جري امس هههه
انس شيرله بيده وخش
ابراهيم : هيا انتي
طلعو ابراهيم والاء وانس خش نوض احمد رقد ساعه 9 صبح
...........
انا نضت خشيت خذيت دوش وتوضيت طلعت لابست شرت وبدي ربع كم بحتت لقيتها ساعه 11 صليت صبح مشطت شعري وخشيت للمطبخ درت كرنفلاكس ليا فطور للباسم وعديت للدار
انا قمعزت ع سرير : باسم هيا ساعه قريب 12 امتي تبي تمشي للعمل
باسم غطه وجه شير ع ضي صبيت طفيت ضي
انا : طفيته
باسم فتح عين وكرني بصوت هادي مبحوح : صباح العسل كيف نوض نا
انا : بوسه بس اليوم فش
باسم رفع حاجبه : عليش
انا : عشان امس مادوتليش كنك حسيتك مش فاطن للروحك بكل
باسم : ههههه صبي باهي
انا : قولي شن صار
باسم : احم راقنها ليا بنات خالي كل مره نطاتلي يبي حاجه من محل عشان عشاء ونا نبي نروح وهي طولت بلعشاء بلعاني
انا : من هذه
باسم : رانيا
انا : اهاا هذه اللي دوتلي ف اسبوع
باسم : اها ما تعدليش عليها مريضه هذه
طبست بسته بسرعه وصبيت
انا : قاعده في مطبخ نرجا فيك
صبي يضحك خش دار حمام توضي طلع بدل وصلي صبح وجاء فتح تلفون جانا مسج قمعز وقعد يقرأ
نا كنت نطلع ف دجاجه : حبيبي شن انديرلك غداء
باسم ماردش عليا انا برمت عليه
انا : باسم ندوي انا
باسم بحت فيا : نعم
انا : قتلك فطرت
باسم : تمام كليت كرنفلاكس زيديني اخري
انا برمت نسخن في حليب وباسم مازال يبحت ف فون وبعدها رن تلفونه
باسم : ايوه فارس
فارس : وين يا عريس مش جيت امس كنك ماجيتنا
باسم : هههه جايكم توا امس كنت عند خالي
فارس : اها حمدلله على السلامة وين تبي تجي بيش نتلمدولك
باسم : عندي كم موضوع نكملهن ونجيكم كل واحد في محله
فارس : تم ياغالي سلام
باسم : اوكي
انا جبتله كرنفلاكس : عادي نعدي للعميمه وبنات صح
باسم : بجوك حبيبي
انا : شن اندير غذاء
باسم : هههه تعرفي اديري
انا : اها نعرف صقع عليك
باسم : ديري بازين
انا 😳
باسم صبي حط تلفونه ف جيبه ومسك نظاراته : نجي نلقاه واتي تمام
انا : حبيبي غير تعالي صلي ع النبي
باسم ماسك ضحكته : كيف مش صقع عليا
انا : اها صقع عليك بس مش كويس انت تمرن
باسم : هههههههه عليك سبله لا عادي راه نا كل في كل شي باهي تعرفي اديري دجاجه في كوشه
انا : توا نجرب
باسم : كيف صقع عليا بس
انا قربت منه بصوت واطي ونزلت راسي : توا نتعلم عشانك
باسم حط ايديه ع خصري : نعليا نا خلاص تعبيش روحك توا نجيب من برا
انا مسكت ف جاكته : توتو نبي انديرلك اي حاجه انت تبيها عشان ديما اديرلي فالي نبيها
باسم حط رأسه ع راسي : انتي مش معايا معناها اديري ف حاجات أكثر مني "باسني ع ..."
انا ابتسمت : وين ماشي مش قلت عندك مواضيع
باسم : ماشي للصاله حديد نجدد اشترك وبعدها صاله ملابس امنزل بضاعه بعدها نبي نوزعهن ع محلات وماشي للشباب في محلاتهم ونرد نشوف حساباتي ح نتاخر عليك شويه مرات مانخش الا عشيه تغذي كان طولت
انا : لالا نرجاك بس نبي نرن ع ماما قبل ما تطلع مرايفه عليهم والله
باسم طلع تلفونه : خوذي رني
انا كتبت رقم ونرن : نعدولهم اليوم
باسم : لالا اسبوع جاي
انا كشخت عليه : ايوه ماما صباح خير
ماما : صباح النور كيف حالك شن دايره
انا : حمد لله شن جوكم انتم مرايفه عليكم
ماما : كويسين كلنا اليوم جيتنا هاجر زايره
انا : هييي صح
ماما : ههههه تعالي
انا : قلت للباسم قالي لا
ماما : معلش عادي توا يجيبك مره اخري
انا : ايمان جايا
ماما : كلنا ملتمين دايره عشاء للخيتك وراجلها وعربها
انا : نبي نجييييكم انا يا ماما
باسم : هههههه
انا : عليش تضحك انت
ماما : تعالي يوم اخري ونديلك نفس خيتك
انا : نبي نعزم صحباتي
ماما : باهي غير تعالي
باسم : شن لمه تعدليش عليها يا عمتي
ماما : كيف حالك يا باسم
انا فتحت مايك
باسم : حمدلله كيف حالك انتي شن صحتك تمام
ماما : حمدلله شن دايره معاك دبدوبه
انا : نقصت ياماما والله
باسم : درتلها رجيم هههههه
ماما : ربي يحفظكم للبعضكم
باسم بعد تلفون باسني ع..... : احم ان شاء الله كيف حال شباب وعمي
انا 😳
ماما : حمدلله كويسين كلهم
باسم يشيرلي ادوي وخر ع طاوله
انا : باهي ماما سلميلي عليهم كلهم وقولي للاحمد يجيني
ماما : إن شاء الله يوصل ديري بالك على روحك وعلي راجلك وعزوزك سلم بنتي واستودعي راجلك
انا : حاضر تبي حاجه
ماما : لا سلامتك نبيك صحيحه
انا : تسلمي ياماما قتلك قولي للهبه ترن ع سناء نبيها
ماما : ان شاء الله بسلامه
انا : سلام
سكرت وعطيته تلفون صبي
باسم : تبي حاجه حبيبي
انا : لا سلامتك
باسم باسني في خدي : هي سلام
باسم طلع ع باب يلبس في كندره
انا : استودعك الله الذي لا تضيع له ودائعه
باسم ابتسم وطلع سكرت باب وقعدت نلم في مطبخ لميت حوش قعدت نمسح فيه وفتحت قرآن كملت مع ساعه 3 دق باب لابست ملايه صلاه
انا : من
سناء : حلي ياحنه
انا فتحت : اهلا خشي
سناء خشت : شن جو
انا : تمام
سناء : اهي هبه ع خط
انا : اها ، أيوه هيبو
هبه : يا مرحبا شن جوك
انا : تمام حمدلله كيف حالك انتي
هبه : تمام حال حوسه كيف كملت انا وبنات خلطه عصبان
انا : يعطيكن الصحه اكيده توا تجيكن مع 6
هبه : اها مع ظهر جاء خوه جاب خضره وحولي
انا : ماشالله سلميلي عليها
هبه :كنك ماتجي
انا : باسم مش فاضي
هبه : باهي يوصل سلامك تبي حاجه انتي
انا : احم اها نبيك تقوليلي كيف اندير دجاجه محمره
سناء وهبه : هههههههههه
انا : اسكتن كنكن
هبه : تستاهلي ديما ماما تقولك تعلمي تعلمي
سناء : كنك ماقلتي راه درتها لكي سيلا ولا ماريا
انا : لالا نبي اندير بروحي
هبه : باهي توا نقولك اغسلي دجاجه كويس بخل ودقيق عشان تحول بنتها بعدها خوذي صونيه حطي فيها بزار احمر واصفر لكن مش واجد وحطي ملح وزعتلر وحرارات كامله وفلفل اكحل وطماطم حكيه وصبي ميه شويه وخلطيهن مع بعضهن بعدها قرضي بطاطا وطماطم وبصل دوائر وفلفل افتحيه عادي بنص حطيه في طاجين حراري شراته لكي ماما ادهني طاجين بزيت بس مش واجد حطي فيه دجاجه وخوذي خلطه ادهني بيها دجاجه واربطي كرعين دجاجه بسلك وزعي خضراء اللي قرضتيها حطيها في طاجين ماتخليش مكان فاضي في دجاجه ادهنيها كلها وحطيها في كوشه خليها ساعتين او اقل وديري جوك انتي عارفه اقلي بطاطا وجو فاهمه
انا : تي ماحفظت شي
هبه : ووووه ان شاء الله تبي تحشيها
انا : لالا مش حاشيه
سناء : ههههه دزي في مسج وخلاص
انا : هيبو بخطوه الله يربحك قولي للماما تقولي كيف اندير الرز ابيض
هبه : باهي توا اندزلك لكي سلام
انا : شكرا سلام
انا سكرت ورن اخري لقيته "حبيبي"
سناء : احم
انا : خوذي ياحنه
سناء فتحت وخرت : ايوه حبيبي
احمد : في من تكلمي مشغول لكي ساعه
سناء : كنت مع هبه تبيها اوفي
احمد : اها شن جوك
سناء : تمام احمد توا نرن عليك بعدين عند اوفي نا
احمد : عطيها ليا
سناء عطتني فون
انا : ايوه وينك يا ظالم
احمد : هههه شن جوك يا بطه
انا: تمام حمدلله كيف حالك انت
احمد : تمام اسمعي توا نرن بعدين في زبائن خشو
انا : تمام بس تعال اليوم
احمد : إن شاء الله ان شاء الله
سناء : كنه سكر
انا : خشو زبائن
جاء مسج خذيت كتبته في ورقه وسناء عدت ونا خشيت للمطبخ قعدت اندير كيف ما كاتبه بمقدار وحطيت دجاجه في كوشه وفتت رز لقيته في سريب قليت بطاطا كملت مع ساعه 5ونص طفيت ع دجاجه بخرت حوش ومسكره خشمي مانحبش بخور بكل بس بانت اوكال طاغيه خشيت للحمام غسلت جلدي لابست بدله شرت شيفوني وجففت شعري ورفعته وصليت وقمعزت ع تلفزيون لعند سبعه خش باسم
باسم : اوفي
انا راقده ع صالون مابيتش نرد
باسم جاء حط كيس فوق طاوله صاله : يطروح انتي
انا انقلبت عطيته بظهري
باسم : ههههه هيا جعان والله ماكليت حاجه عابي ع دجاجه راه
انا فتحت عيوني : ماصارش منها دز ع غذاء قصدي عشاء
باسم نزل عليا وقمعز ع ركبيه : شن طلعتي بايره غشوني هلك
انا : اها مش عاجبك
باسم باسني ع خدي : عاجبني وراضي بس شن البانه سمحه هذه
انا بصوت هادي : كنك طولت
باسم : والله مافضيت شغل فوق راسي هذا كله روحت وسيبتهم قتلهم توا نرد مع 10 وعندي تمارين ساعه 8 وقصه معش تكمل
انا : يعني تبي تطلع
باسم "غمزلي" : شن رايفتي عليا فوبيتي
انا قعدت نبحت فيه حطيت يدي وهي ترعش علي لحيته
باسم مسك يدي وباسها من جوا : نجك ليا شن نردو للتركيا
انا قمعزت : ههههه
باسم : نعليا نا
انا : تعال نتغذو
باسم : هههه درتي يعني
انا😌 : اها نبي رايك اخري
باسم : ربي يستر نخش نغير ونصلي مغرب ونجيك
انا صبيت خشيت للمطبخ قعدت نوتي طلعت طاقم ابيض حطيت فيه بطاطا كاتشب ومايونيز سخنت دجاجه وحطيتها هو جاء قمعز ونا صبيت عصير وجيت قمعزت جنبه
باسم ياكل : والله اليوم جدول اوكال كله تلخبط
انا : انت طولت
باسم : لنقاني جيعان توا نحرق في صاله
انا : شن سمح
باسم : والله ناكل من جوع
انا : من جوع
باسم : ههههه نبصر معاك سلم ايديك
انا : صحه حبيبي
باسم رقص في حواجبه ويأكل بسرعه
انا : بشويش كنك
باسم : عنديش وقت
انا صبيت خشيت للحمام كديت سنوني وطلعت لقيته يشرب في عصير وهو مصبي
باسم خش للحمام : حبيبي وتيلي شنطه فيها دبش تمارين
انا طلعت شنطه كتفين حطيت فيها منشف كبير وصغير وشرت وتي شرت طلع باسم ولابس شرت وكناتيره عريضه وشخشير وكويش وخذا شنطه باسني وطلع بعدها رد
باسم : اوفي
انا : نعم
باسم : كيس فوق طاوله جيبيه
انا جبته له : شن فيه نفتح عادي
باسم خذا كيس : لا ملون تفتحش سلام
انا ضميت مطبخ ولابست عديت للفيلا
.........
ماما : كيف حالك شن دايره مع عربك
هاجر : حمدلله يهبلو طيبين بكل
ماما : منذر كويس معاك
هاجر : اها حمدلله
ماما : ربي يسعدك ويهنيك
عمت هاجر : والله يا فاطمه بهدلني فرخ
عميمه فاطمه : زوزيه تفكي منه حطي في رقبته مراه توا يرزن
ماما : وسعي بالك عليه ياحنه توا يعقل
عمت هاجر : مافي الا تسكير الرأس خش محاور كلهن وزيدها عليا منذر حتي هو يلعب بنار
ماما : ادعيلهم ربي يحفظهم لكي
عمت هاجر : إن شاء الله والله قلبي وكلني عليهم
هاجر : إن شاء الله خير ياعميمه
عمتها : إن شاء الله
خشن بنات وقعدن يمدن في عزومه وعمت هاجر تبحت في الاء مش دايره مكياج تمد فوق نفس لابسه بنطلون وقميص طلعت من دار ضيوف خشت للحمام قعدت تبكي تبكي غسلت وجهه وهدت وطلعت مبتسمه قعدن يحوسن وانس ماخشش بكل منتصر وعبدالله بس يحوسو ع رجاله واحمد وانس مقمعزين بسيف كملن عزومه وروحو عرب هاجر وصبايا عمامي وعميمه وهاجر باتت معاهن ومسكن الاء تبات معاهن
.......
انا خشيت للفيلا ولقيت رحاب وزينب هدرزنا نحن وبنات وعميمه ساعه 9وربع خش باسم
باسم : سلام عليكم
نحن : عليكم سلام
باسم : ايلاف كأس اميه والنبي
انا صبيت جبته اميه خذا شرب ونا قمعزت جنب رحاب
باسم : محمود رووح
رحاب : لالا ماسك اليوم
باسم : اها تمام
سناء : شكلك تعبان
باسم : نزل عليا نزله شينه في تمارين
عميمه : هذا كله صحه لكي
باسم : هيا تصبحو علي خير
عميمه : خليكم للعشاء
باسم : لالا وين
عميمه : جمعه نبو نعدو للمرزعه راه نحن وعيت جدودك الاثنين
باسم : حاضر نفضي روحي ونطلعو
انا : تصبحو ع خير
عميمه وبنات : تلاقو خير
طلعنا خشينا للحوش
باسم : ناخذ دوش ونجيك
انا خشيت للدار غيرت وقمعزت في صاله رن تلفونه صبيت نجري
انا : هذا فارس
باسم طلع من حمام بحت فيا : فيش اديري
انا : تلفونك رن نشوف فيه من
باسم : باهي من
انا : فارس
باسم جاء وسكر تلفون : ديريلي فواكه
خش لابس وطلع قمعز ع صالون ياكل في فواكه وبحت في تلفون بعدها صبي يلبس في كندره : توا نجي مش مطول
انا : ماحسيتش روحك اليوم كله برا كان شلتني للهلي ارحم
باسم : والله سريع سريع يبوني شباب في كافي
انا : خلاص اطلع غير كان خليتني مع بنات
باسم رفعني ع طاوله باسني : مش مطول ساعه وجاي
انا ☹ : باهي
باسم : هههههه تكسدي عدي للهلي
انا : لا توا نرقد
باسم قعد يبوس فيا
انا حطيت ايديا ع رقبته وخرت : خلاص عدي
باسم : عنشكلك بكل سرحت معاك
انا : هههههه
باسم قعد يبحت في مرايا يرفع في شعره
انا : حسيتها مقابله انا
باسم : هههه والله ما صارت
انا نزلت من طاوله : حبيبي حددلي يوم نعدي للهلي
باسم : حاضر اسبوع جاي عشان جمعه ف مزرعه
انا : لعند اسبوع جاي مازال 3 أيام
باسم : هههه معلش
باسم طلع من هنا ونا خشيت رقدت من هنا
.........
الاء : توا نجيكن نشرب اميه
هاجر : جيبيلي معاك
خشت لقت انس مقمعز ع وطي ويأكل من طنجره
الاء : احم
انس رفع رأسه ونزل ياكل
الاء : كان قلتلنا راه حطينالك مازالنا واعيات
رن تلفونه بحت فيه لقه رقم داره صامت وحطه جنبه
الاء : ماشاءلله شريت تلفون جديد عليش يعطي فيا مقفل
انس : حرقت شفره
الاء : مش قلت مقلب نا وتاسفت كنك مازالت راقيلك توا
انس : هك بجوي
الاء : جوك مايجيش علي حساب نفسيتي
انس صبي : لا تحرقي دمي عادي لعند صبح ونا نرجا فيك
الاء خنقتها العبره : والله طفي شحن مش مقصوده اني نحرق دمك
انس يغسل في ايديه : باه
الاء : خلاص عاد قريب نسكرو سنه مع بعضنا نتعاركو مره مره لكن انت هذه ثاني عركه تكبر فيها
انس : فوتي امي مش جوك
الاء تنرفزت : اسمع حركات هذه مش عليا نا انت واحد مغرور علي فكره ماتحبش تنزل خشمك حتي بعد تغلط لا بال مغلوط فيك يعني لازم اذل شخص اللي غلط فيك وانا جو هذا مايمشيش معايا عشان نفسيتي تتعب خساره فيك كل شي حتي احساسي خساره فيك مش عارفه عليش شايف روحك بس نا حماره اللي حبيت واحد نفسك شخص عصبي مغرور جاهل ومايحبش حتي بصاره كان مع اصحابك 32 سن باينه نقولك حاجه معش نبي نشوف وجك بكل رد للجبهه ارحم ليا ولك مسج اللي جاك اعتبره صح مش مقلب
جت تبي تطلع كر يدها
انس : من مغرور وعصبي جاهل
الاء ماسكه دمعتها بسيف : أطلق يدي
انس طلق يدها : خلاص معناها كل حد في طريق مش نا جاهل
الاء : بسهوله هذه
انس : اها شن فيها اللي جابك يجيب غيرك
ع خشت هبه
هبه : لولي وينك
الاء ماسكه في رخام وعطيتها بظهرها : هيا هي
هبه : انس كنك
انس : كانت تحطلي في عشاء امبدري ماكليتش كويس
الاء تغسل في ايديها وجها : توا نصبلكن اميه ونركب
هبه قربت منها : كنك جوك مش تمام بكل اليوم
الاء : لا تمام غير خايفه من إمتحانات نفكر فيهن ونا مازالت ماقريت شي
هبه : خليك معانا
انس قمعز ع كرسي ويبحت فيها
الاء تصب في اميه ماسكه بطنها : لالا نبي نركب
انس بهزوه : اه خليك مع بنات
الاء بصوت عالي : لااا
هبه : براحتك شكلك تعبانه
الاء عطتها اميه : اها سامحيني تصبحي على خير
الاء ركبت وانس طلع بسيارته
الاء فتحت باب وخشت طربقت باب بالقوه خشت داراها تبكي : خزي عصبي مغرور واطي يقهر فيا
دق باب دارها
ابراهيم : الاء ركبتي
الاء تمسح في دمعها : اها كنك تبي حاجه
ابراهيم : حديدي سوريتي
الاء : أي قميص
ابراهيم : ابيض
الاء : باهي
طلعت حددتله وخشت رقدت
......
هاجر : ايوه
منذر : مكانك فاضي
هاجر : هههه توا نجيك بكرا
منذر : كلا امي هذه مافيها الا تسكير رأس
هاجر : هههههه وين قاعد
منذر : كيف نبي نطلع من شقه ماشي للعمل
هاجر : دير بالك علي روحك حبيبي
منذر : حاضر يا عيوني شن درتي قوليلي
هاجر : شي انتم روحتو لمينا حوسه ولبست بجامتي وخشينا للدار نا خواتي نهدرزو
منذر : حبيبي راك تسلحي وشاحك حدا خوتك وباتك
هاجر : لالا لابسته
قعدو يهدرزو لعند وصل للمكتب بيش سكر منذر
.....
هبه : بايته اها
عصام : نحصلوش كسيره
هبه : ولا فتفوته
عصام : عليك مكر يا سي
هبه : اها مكر
عصام : ع اقل بوسه
هبه : هذا كله ع اقل
عصام : ههههه اها
هبه : فش شن رايك في مكر هذا
عصام : ديري بجوك توا تلفون بعد توصلي عندي ما نطلب شي كل شي ناخذه بجوي
هبه سكتت
عصام : ديري روحك تحشمتي توا ساهل ساهل والله كان مس ولد خالتي توفي وامي سكرت رأسها حتي ع عرس سكوتي راه توا قاعده
هبه قص عليه : باهي خلاص كيف حالها عميمه
عصام : هههههه كويسه تسلم عليك
هبه : سلمك وسلمها
عصام : شن حبيبي نا بتبقي هكي
هبه : عصام نحن في نفس دار رقدات راه
عصام : يرقدن رني عليا ضروري نبي نهدرز معاك
هبه : حاضر توا سلام
عصام : نعليا نا والله كان درتيلهن منوم خواتك مش وقتهن بكل
هبه : هههههههه
عصام : ههههههه اسكتي
هاجر وايمان : كنكم
هبه : شي كملن هدرزتكن
عصام : شكلهن يقرمن
هبه : اها فات عليا نص تقريم من وراك سلام
عصام : رقديهن ماتهدرزيش معاهن
هبه : هههه باهي
عصام : سلام حبيبي
.......
عمر : كيف يعني
احمد : كان هذا نطلعو مع بعضنا
عمر : لالا والله ماهي صايره تي نحن هكي وعين معلقه معانا
احمد : باهي امتي فرحك يا راجل طولت راك ريت لحيتك كلها شيب
عمر : عطيه للاسامه قطعه ارض وفيلا كان انباعن نحدد فرح بعد شهر دغري يطلع
احمد : والله كان تخلينا مع بعضنا نا بعد شهرين لعند اثاث يجي من برا
عمر : لا انا من برا ولا من جوا تكاليف واجد فكني منهن اثاث من هنا وطالع ع شقه هو اسبوع الفرح صلي وارفع صباطك
احمد : شن ناقصك باهي
عمر : شي كل شي واتي حتي هي واتيه حاجات خفيفه بس
احمد : خلاص نا عليا سياق وماشيه للمصر ع حسابي
عمر : اكبرن ياشورخي مش طالع من بنغازي نا
احمد : تطلع وانت ساكت شهر عسل يا جاهل هذا
عمر : تي سكرلي فمك فوق من اسبوع مش قاعد
احمد : غير اقعده اسبوع بس
عمر : بارد ازف هههههه
احمد : خزي يانكد
عمر : صح فارس حدد فرحه
احمد : اها قاعد يوتي حتي هو
تلفون عمر رن
احمد : رد يانكد نازل نا
عمر : سكر وراك باب يا باشوش انت
احمد : خطرها ع بشوش باسم خذا طريحه من مدرب اليوم لعند خلاه يدهش ونا وفارس وحسن ميتين ضحك
عمر : شكله ملخبط ف نظام غذائي
احمد مصبي ع باب : مكملها وكال في تركيا هيا تصبح على خير
عمر : قدام خير
.......
#يتبع...
#رايكن 😉
رايفت عليكن🙈
اسفه جدا ع تأخير بس نا قلت عندي إمتحانات وعندي ظروف مش لازم من كلام 😊 والاحد عندي امتحان بس حنزل لكن بشويه ونزل هذه ونبدا في حلقة اخري نكملها ونزلها دغري بس شن رايكن في رمضان نوقفها لان مستحيل نختمها قبل رمضان😅
شكرا عطر الريحان ع تصميم❤ تعبتك😅
#Fafy fa
