#فوبيا_الحب❤
الحلقة [41]
تلفون عمر رن
احمد : رد يانكد نازل نا
عمر : سكر وراك باب يا بشوش انت
احمد : خطرها ع بشوش باسم خذا طريحه من مدرب اليوم لعند خلاه يدهش ونا وفارس وحسن ميتين ضحك
عمر : شكله ملخبط ف نظام غذائي
احمد مصبي ع باب : مكملها وكال في تركيا هيا تصبح على خير
عمر : قدام خير
طلع احمد وسكر باب
عمر رن علي خطيبته وقعد يهدرز معاها
.......
باسم خش للدار : خميره
انا برمت عليه غمضت عيوني : ضي
باسم سلح جاكه : نوضي شوفي شنو جبتلك
انا قمعزت فتحت عيوني بشويش : شن
باسم قمعز جنبي عطني كيس : شوفي بروحك
انا فتحت كيس : هييي فون
عزقت كيس ومسكت فون كويس وحظنته لين طحت نا وياه
باسم : هههههههه عليك فرحه كنك ماقلتي انك تبيه
انا وخرت : تحشمت نطلب صراحه
باسم : مازالنا في قصه حشم
انا : ههههه شوي شوي توا نتعود
باسم : شن عجبك
انا : اها يهبل شكرا حبيبي احسن حاجه سامسونج
باسم : عارفك ماتبيش ايفون جيبته من امبدري غير رديت به درتله شاشه كسر وجو
انا : نجك ليا
باسم : تعالي نوريك
خذا تلفون قعد يوري فيا لقيته مسجل روحه حبيبي1
انا : هههه من قالها حبيبي واخري واحد
باسم رفع حاجبه : املا من انا بعدين عندي شفرات واجد ما يقارب 2 للعمل 2 للحوش و شفرات تركيا ومصر ولبنان
انا : نبي نسجلك بانجليزي ❤My love وباقي ساهل توا نكسدو عليهن كل شفره اسم بروحها
باسم باسني في خذي : نعليا نا حبي الاول اه "غمزلي"
انا : هههه باهي تعالي نسهرو في صاله
باسم : انتي شابعه نوم
انا : هههههه تعبان ارقد خلاص
باسم : نبي نخش للحمام ديريلي حاجه خفيفه خليني ناكلها نسهرو شويه ونرقدو
انا صبيت فوق سرير : حاضر بسرعه بسرعه وانت حطلنا فيلم سمح نكسدو عليه
انا اجلبته نطيت من سرير
باسم : ايلااااف
انا برمت : نعم
باسم : معش تنطي آخر
انا : باهي فجعتني
خش باسم للحمام وغير دبشه وحط علي فيلم رومانسي
نا في مطبخ درت سندوتشات توست وصبيت عصير وحطيت مكسرات جميع أشكال جيت قعدت نحط ع طاوله هو واخذ تلفوني وتلفونه يسجل في اسماء وموقف فيلم قمعزت جنبه
باسم حط تلفونات ورقدني علي صدره فتح ع فيلم ناكلو ونتفرجو جاء مشهد رومانسي
انا خذيت تلفون قعدت نبحت فيه
باسم : شن نسكر ولا كيف
انا : براحتك
باسم : وعليش تقوليلي خلينا نسهرو
انا : خليه باهي
باسم خذا تلفون وحطه ورفع راسي : فوبيتي
انا ضحكت معش سكتت
باسم : بشويش تقول قلت نكته ههههه
انا : هههههه اصلا اسم يضحك
باسم : شن اخري يضحك فيك
انا : حاجات واجد نا بعد نقعد فرحانه نقعد نضحك وخلاص بعدها تستغفر هههه نقول ان شاء الله يرده عليا بخير كان ضحكت واجد نبكي عارفه روحي
باسم طبس قعد يبوس فيا : ماعاش اللي يبكي روحي وحبيبتي ان شاء الله ديما فرحانه و معايا
انا حطيت ايديا ع شعره : إن شاء الله حبيبي
باسم : شن رايك نخشو نرقدو
انا ابتسمت : تمام هيا
باسم صبي طفي تي في ونا صبيت لميت حوسه من ع طاوله قعد يشيل معايا خشينا للدار باسم رقدني عليه ورقد ونا ماجنيش نوم قعدت واعيه ونبحت فيه لعند ساعه2 وكل مره نتحرك لين ناض
باسم : كنك حبيبي
انا : مش جايني نوم
باسم خذاني وحظني زييين : شن نهوي عليك
انا : لالا هكي توا نرقد
باسم بحت فيا : نعليا نا طفي وناسه من جنبك طفي
وخرت طفيتها ورديت رقدت عليه وباسم باسني بوسات خفيييفه كنه مخذر
ورحنا في خبر كان ....
.........
سناء : اها صار ماعديتش
احمد : كنت عند عمر ملتمين ف كافي ونا ماعديتش مانبيش نشوف وجه باسم بكل
سناء : عليش جاك هو
احمد : اها بس ماكنتش قاعد
سناء : كنكم في مشكله
احمد : لالا مافي شي غير هك مانبيش نشوفه
سناء : لا في حاجه تبيش تقولي
احمد : قلت مافي شي هك
سناء : اها تمام خلاص
احمد : واخير فهمتي
سناء : هههههه حبيبي نحن جمعه ماشين للمزرعة
احمد : كلكم
سناء : اكيده ياروحي نحن وجدودي
احمد : تمام وشاح ماينسلحش قدام شباب واستك لا
سناء : حاضر اي اومر اخري
احمد : سلامتك وقولي خوك يجيبلنا اختنا سكرت شهر راه
سناء : هههههه مافيش اختكم
احمد : ساهل توا نردها في اخته بشهرين
سناء : لالا ماتجيش عاد
احمد : هذا اللي عندي
سناء : اهااا تمام باه
احمد : يعني
سناء : شي
احمد : هههههه حسيته تهديد
سناء : صار حسيت
احمد : اكيده نحس املا شنو
سناء : نجك ليا نا
احمد : حبيبتي شويا ونرد عليك نشوف انس
سناء : حاضر توا نرجاك باي
........
انس مقمعز في سيارته ويدخن وفتح موال "نا ياوطن حالي كيف حالك ميت غير بين عايشين" ومعليها في شارع ويقرأ في مسجات الاء عزق تلفون تحت كرعيه ورقد الكرسي وحط ايديه علي عيونه جاء احمد دق ع قزاز انس نقص صوت وفتح قزاز
انس : شن فيه
احمد : كنه حالك
انس : حالي كيف حال الوطن
احمد : شن صاير معاك تعال نخشو للحوش
انس : لالا خليني عندي موضوع نمخمخ فيه نبي نرسي علي حل
احمد : باهي نقص اغاني شارع
انس : نبي نطلع بسياره قول للباتي بايت عند صاحبي
احمد : تي كنك ازف وين ماشي ساعه 1 ومعاها خش تعشاء وارقد
انس ولع سياره : مش جايني نوم ولا نيه للعشاء
احمد : نرن رد عليا ياراس
انس قعد يوخر : تم
احمد رد يكلم وانس علاه اغنيه وطلع برا منطقه بكل
.......
الاء نطت من نومها ع هزت تلفونها شافت لقتها صاحبتها
الاء : ايوه
صاحبتها : اهلا شن صار
الاء : تعركنا اخري
صاحبتها : عليش
الاء " قعدت تحكيلها"
صاحبتها : شن هلكلام عليش كلمه جاهل توا عيب عليك
الاء : بدون قصد طلعت مني وهو ماصدق قهرني ندوي معه وعطيني بظهره ويدوي فوق من خشمه
صاحبتها : انتم الاثنين غالطين في بعضكم وعلي فكره انتي اكثر
الاء : عارفه بس انا تنرفزت واليوم كله مادوينش بكل ماسمعتش صوته بعد شفته فرحت قلت اكيده توا يفوت هزبني صبح خلاص تاريته مازال شايل مني نحس في حاجه نقصتي بلاه
صاحبتها : قصه والله
الاء : حتي نا زدتها عليه بكلام صح
صاحبتها : شن رايك بس غريبه دويتي قبل ديما هو اللي يمشي في كلمته عليك
الاء : واليوم اللي دويت فيه سيبني
صاحبتها : بلكي حامق بس
الاء : قالي اللي جابك يجيب غيرك و رن عليه رقم اكيده بنت وقريب نطرشق والله نقتل روحي
صاحبتها : غير وسعي بالك ما حتي في يوم يدير علاقه كنك غبيه انتي
الاء : تي لنا يومين ماندوش اصلا كنه متناقشين ع مشيه للعيت خوالي هو قالي معش تمشيلهم عويل خوال مش تمام
صاحبتها : عليك سريب درتيه للروحك مش كان قعدتي تحبيه في قلبك خير ما تقولي هكي ولا هكي تغذبتي
الاء : شن اندير، ياريت ايلاف قاعده
صاحبتها : عليش ايلاف ونا فيش اندير عطيه عين الحمراء استكردييييه الكلب توا يجي للطريق ويتاسف
الاء : احم معش تقولي كلب
صاحبتها : هههه باهي استكرديه حبيبك
الاء : معش نشوفه وخلاص
صاحبتها : حي كان يرد للجبهه
الاء : مافيش حرب توا
صاحبتها : مهما كان بس ماكملتش مرات يرد انتي عليش تقوليله رد اصلا تعرفي يومها صاحب خويا ينظف في سلاح جت رصاصة في صاحبه توفي وقتي
الاء قعدت تبكي : خلاص اسكتي كنك اذكري فيا حي عليا كان رد وتصير فيه حاجه نموت
صاحبتها : هييي خلاص اهدي اسفه والله معش تبكي هو مش مدور تعبريش اسكتي
الاء قعدت تبكي صاحبتها تهدي فيها
الاء : توا ندو بكرا نحس في راسي من بكاء خلاص
صاحبتها : تريحي باهي ونوضي بدري اقري امتحان نظري اسبوع جاي ساد العملي مش قريا فيه
الاء : ماعنديش نيه لكن جايا في امتحان عملي ربي يستر وخلاص سلام
صاحبتها : اقري كويس سلام
سكرت من صاحبتها رقدت في سريرها وقعدت تبكي لعند رقدت اخري
.........
روحت هاجر ثاني يوم ع ظهر وانس ماروحش للحوش واحمد غطه عليه عشان بابا مايهزبش الاء عدت للامتحان
سناء : ها اوفي واتيه
انا نلبس : شويه بس كنكم ماقلتولي
سناء : تحملي حتي نحن مانندرو عليهم لين طابو علينا
انا طلعت من دار : ها تمام
سناء : تهبلي
انا : مالقيتش الا هذه دبش اللي شاريته قعد يطيح مني
سناء : اصلا نقصتي فجاء
انا : شعري كويس
سناء : تي احلي حاجه شعرك
انا : باهي هيا كعب ستين ميترو
لبست عبايتي وطلعنا ع فيلا خشيت سلحت سقمت منظري وخشيت للمربوعه صبايا واجد كلهن أقاربهم قعدت نسلم عليهن كلهن تبيلي سنه بيش نحفظهم ماشاء الله عايلتهم كبيره قمعزت جنب رحاب قعدن يهدرزن كل مره وحده منهن تبحت فيا وانا ساكته جن جنبي بنات وصبايا قعدن مع عميمه
رانيا : امس باسم كاين عندنا
انا ابتسم : اها عارفه
رانيا : كرهتا في عيشته كل مره اندز فيه للمحل هههه
انا : قالها ليا
رانيا : شن قالك اخري ان شاء الله
انا : شي هذه بس
رحاب : كنك يا رانيا مع بنت
رانيا : نهدرزو انتي كنك نحس فيكم كلكم خايفين عليها ههههه
سناء : آخر كنه لازم نخافو عليها
اسماء : تعالن يا بنات نخشو للدار اخري
صبينا ونا قعدت نبحت في رانيا نحس فيها غاير ولا تهزاء معش عرفتها وتعزق في ادواس ع أخلاق
رانيا : والله بنات معش يتحشمن بكل
نسمه : عليش ان شاء الله
رانيا : يأخذن في رجال حتي من صبايهم يبقا مرتبط وتكلم فيه ماتحشم بكل
هناء : هما عليش يكلمو مادام مرتبطين
رانيا : حتي بنات هبا عليهن
اميره : لا ياماما راجل بعد المراه تقعد منقصه عليه حاجه ولا معش تهتم به من طبيعي يبحت برا
عمت باسم خديجة : مهما كان مفروض يدوي مش يخون
سناء : والله ياعميمه صدقتي انا كان احمد يبحت برا نبلطله عيونه تي من اول شهر تعركنا ع موضوع تبحيت نذكرها جانا لعند هنا بيش يصالحني
رانيا : يعوينك
بنات : ماشاء الله ربي يحفظهم
سناء بحت في رانيا بنص عين : شكرا ان شاء يحفظنا من عين
هدي : شن جو انا مخطوبه وخايفه علي خطيبي ههههه
انا مسكت ضحكتي وسناء بانت فيها انها راقتلها
سناء : لا نا مش منهم بس عين انذكرت في قرآن صراحه عندي حق نخاف عليه
اسماء : ههههههه خلنها في حالها والله هذه تضرب حتي ضرب علي احمد ولا لا يااوفي
انا : ههه اها خلوها
رانيا : حتي اللي دايره روحها متحشمه تلقيها من تحت تحت تي هنا حتي واحد مرتبط يشفطنا من حبيبته "وبحتت فيا"
انا : كان يحبها راه مابحتش في غيرها "ابتسمت"
حنين : ايووووه هذا كلام صح سكتت سكتت وعطتكن كلمه سكتتكن
انا : مش قصه سكتهن بس اللي يحب من سابع مستحيلات يبحت في بنت اخري وبعدين رجاله يبرومو يبرومو ويردو وين ماكانو متريحين
عميمه خديجه : ايوووه كلام صح برم برم برمته هههه
رانيا صبت : هذا صح لقانه برم برم برمته يبرم برمه ويجني انا
سناء : هههههه أكثر بنت رافعه خشمها رانيا بنت خالي
هدي : صدقت فيك بجد ربي يشفيك
رانيا : عندي حق نفشك ياماما
باسم يضبح : جماااعه
عميمه : في مربوعه تعال صبايا عمامك وخالاتك
باسم خش : سلام عليكم
قدم قعد يسلم عليهن
خالته فتحيه : وينك معش نشوفو فيك
باسم : والله قاعد غير مافضيتش
عميمه : مكملها عمل اليوم من صبح طالع
باسم : والله شغل فوق راسي
خالاته وصبايا عمامي : ربي يعطيك صحه
باسم : إن شاء الله، امي وين ايلاف وبنات
عميمه : في دار رن عليهن
باسم : هيا نستاذن
هنا : تفضل اذنك معاك
باسم طلع ورن عليا وانا كنت حطه تلفون فوق طاوله ورن "❤My love "
بنات : اوووه
انا انحرجت رديت : ايوه
باسم : وينك حبيبي
انا : عند عميمه وبنات
باسم : تعالي نا برا ف جنان
انا : حاضر هيا هي
سناء : يبي غذاء
انا : اها اكيده شويه توا نجيكن
قعدت نلبس في عبايه بسرعه وبنات يهدرزن
رانيا صبت جنبي دوات بشويش : بشويش مش طاير
انا راقتها ليا صراحه من اول ماجيتهم كل مانتقابلو تعزقلي في كلام ونا نمشي فيها نقول فرخه فرخه لكن شكلي نا اللي مكبره عقلي فوق لازوم نفخت بشويش وطلعت
سناء : رانيا تعالي نبيك في مطبخ
رانيا : توا نلحقك
