#فوبيا_الحب ❤
الحلقة [61]
الاء : اهلين تفضلي
المراه كبيره شويا : الله يفضل عليك
خشت الولية في مربوعه والاء خشت تكمل في قهوه دق الباب اخري
الاء : عليك قصه والله ماني فاتحه لعند نكمل قهوه
باب مازال يدق كملت القهوه وطلعت بسفره فتحت الباب وخرت
الاء انصدمت بعد فتحت باب فتحاته بصباعها ودفاته بكراعها عشان سفره ف يدها لقت قدامها ابراهيم ماسك شناطي وراء انس وخرت وابراهيم فتح الباب ع آخر
ابراهيم : نورت بنغازي يا غالي خش
انس خش ماسك شنطه سفر لكن صغيره لابس طاقيه ويبحت في الاء : سلام عليكم
الاء متنحه
انس حط شنطه جنب كراعه مد يده ع فنجان القهوة خذها : جت في وقتها فش حمد لله على السلامة ولا كيف
الاء تلكلك : اهلللين حمدلله على السلامة
انس يشرب : الله يسلمك
ابراهيم : في عرب جوا
الاء تبحت في انس ومش مصدقه
انس برم طاقيه لاوراء يشرب في قهوه هو و مصبي ويبحت في الاء
ابراهيم : ندوي انا يا بقره
الاء فطنت وبحتت في ابراهيم : اه شن قلت
ابراهيم : في عرب يا دايخه
الاء : اها باقي جارات شارع الوراني
ابراهيم : اهاا ؛ بحت في انس " خلاص كان هذا ياطيري اركب تريح في مربوعه انا طاق عند ايوب في معرض
انس : خلاص اربح نتريح ونجيكم
ابراهيم حط شناطي في صاله : خلاص تم نتلاقو
هاجر طلعت من حمام وفي يدها منشف تمسح في وجهه
ابراهيم ضحك : استلم احضان هي
هاجر : هييي انوسي حمدلله على سلامتك
انس حط فنجان قهوة
هاجر قربت منه وحظنته
انس : الله يسلمك منوره
هاجر وخرت : امتي جيت
انس : توا كيف وصلت
هاجر : مش قلتلنا في نص رمضان
انس بحت في الاء : لا جو تمام قالي جرحك كويس اشقي بجرح اخري
الاء طبست رأسها وخشت للمطبخ
انس : أنا تعبان نبي نتريح ونبي اندير حمام صبايا مقابلات ولا كيف
هاجر : اها كيف تبي ادير
انس قدم ع شنطه كبيره الاء طلعت من مطبخ بحت فيها
الاء : هاجر خوذي حلو والحقيني
هاجر خشت للمطبخ وانس يبي يطبس حط يده مكان عمليه وثنه كرعيه طبس ع شنطه طلعت هاجر وخشن ع مربوعه قعدن يوزعن ع صبايا وهاجر قالتها للماما وخالتي هدي طلعن للانس يجرن وصبايا قعدن يزغرتن
انس يضحك : يا مرحبا
ماما تبكي وحضناته : حمدلله ع سلامتك يا باتي
انس : الله يسلمك "باس يدها وراسها " كيف حالك انتي
ماما : حمدلله حمدلله دابينك انت بخير انا بخير
انس مسح دموع ماما : أنا حمدلله كويس "بحت في الاء لقاها تبكي رفع حاجبه فيها وبحت في خالتي هدي " خير يا خالتي
هدي قربت حضناته : حمدلله على السلامتك باهي اللي جيتنا صحيحه وطيب
انس حضنها ومتحشم : الله يسلمك حمدلله
ماما : خش تريح
انس وخر مره مره يبحت في الاء : اهو دبشي توا نركب فوق هنا صبايا غير شناطي هذينا محد يقربهن خلوهن في مكانهن
هدي بحتت في الاء : هييي كنك تبكي
الاء مسحت دموعها : لا شي طرفت عيني باظافري
هدي : باهي اركبي وتي للانس فراش عشان يتريح
الاء : حاضر
خشت حطت سفره وركبت
ماما : تعال سلم ع عمتك فتحيه
انس : لالا عنجد نخش نبي نركب نتريح
هاجر ازرطت مع صبايا قعدت اضبح ع ماما : ماما تعالي اشربي قهوتك
ماما : باهي ؛ دير بالك ع عمليتك سلم وليدي الله يربحك بشويش ع روحك
انس : لا خذيت راحه فوق من لازم ليا 3 أسابيع ما تخافيش جو تمام
هدي : باهي حمدلله ان شاء الله ديما طيب
انس : إن شاء الله شو صار في جدي يا خالتي "جد الاء وابراهيم بات هدي "
هدي : والله مازالو بيه في مستشفي باتي قصته طويله شكله وخوتي ما بوش يحكولنا قاعدين في مصر
انس : إن شاء الله خير ربي يطول في عمره
هدي : إن شاء الله يارب
ماما : خلاص اركب تريح
انس : تمام تبو حاجه من محل
ماما : لالا تريح كل شي في
ماما وخالتي خشن للمربوعه وانس خذا دبشه وشنطه صغيره طلع وسكر باب ومسك مكان عمليه وقعد يركب ع دروج بدال درجه يأخذ بالاثنين ثلاث درجات في جرت بعضن وصل حوش عمو محمد لقه باب مردود خش وكح ياخذ في نفس داهش لقاه الاء تبي تخش للمطبخ عزق دبش وشنطه في صاله
الاء برمت توبع من اللي خاش لقاته انس عدت تجري جو للبعضهم حظنو بعضهم ورفعها والاء تبكي وجسمها يرعش وقلبها يدق بسرعه ماسكه فيه بالقوه وانس عاصر ع عيونه من فرحه حضنها و من وجع عمليته عشان الاء بعد جرت وحضناته من قوه حضن لعند وخر انس ع ساس وخبط
انس مغمض عيونه ويشم فيها : اسسسسس عليش بكاء يا هبله اني قدامك ما فيا شي
الاء فطنت روحها وخرت دغري : هييي حي عليا
انس : هههههه يارتني ما دويت
الاء مسحت دموعها جت تبي تنزل خطمت من جنبه اليمين مسكها من يدها
انس : خليك شويا وربي الكعبه مرايف عليك
الاء بحتت في انس : ما نقدرش نطول يعرفوني معاك توا ندوه فون توا تريح
انس قدم عليها وسلح طاقيه : خليك خمس دقائق بس نبي نبحت فيك حتي دواه مش داوي
الاء نزلت رأسها : ما نقدرش يا انس انت عارف
انس تنهد حك شعره بطاقيه تعقد : لازم اندير حل انا هكي مش عيشه حتي كلامنا بسرقه
الاء بحتت فيه لقاته قارن حواجبه حبت تهديه : معلش حبيبي مهم انت جيت والله فرحانه قريب نطير
انس ابتسم : نعليا يا نقطه مرايفه عليا
الاء بصوت هادي : موت مرايفه موت
انس قدم عليها
هدي : الااااااااااء هذا كله تحطي في فراش
الاء : هييي ماما هي سلام
نزلت تجري وانس خبط يده في ساس رفع دبش وخذا شنطه صغيره وخش دار الاء حطها تحت سريرها وفتح دولاب خذا بجامتها شمها ابتسم حطها بحت جيهه سرير لقاه بجامتها اللي كانت لبستها خذا فلينيا وطلع خذا دبشه دار دوش وخش للمربوعه يمسح في راسه بالمنشف وفي يدا فلينيا امتاع الاء بحت لقاها حطتله فراش دايرتله فوطه وحطتله بطانيه وجنب فراش حاطه طفايه وطاسه اميه ودايرتله سندوتش وعصير وجهاز تلفزيون وجهاز مكيف و ابتسم قمعز ياكل وشرب عصير ودخن سبسبي ودزلها مسج " نحبه انا اللي مهتم بيا وعارفني شن نبي نحبه وربي نحبه يا نقطه ضعفي انتي راه خذيت فلينتك اللي ع سرير هههه رقتها معايا " كاين مش مسجل اسمها مخليها رقم بس حفظه طبعا دز المسج وسجله "نقطه ضعفي "
ولع مكيف وسلح تيشرت وكناتيره وتكي ع فراش وحط ع أخبار ولع سبسي اخري كمله شرب اميا وقرب فلينيا امتاع الاء للوجهه ورقد
..............
الاء تستف في موالح : شنو اليوم إنعاش كامل
هاجر ابتسمت : مينو اليوم مروح
الاء : نعليا نا وانا نقول نشاط هذا من وين جاء
هاجر : والله بدون مبالغه يا الاء بعد نسمع صوته نفسه نحس روحي ردتلي قعد حاجه مستحيل نسغنه عليها لو نموت هو قاعدلي كل حاجه كيف يهتم بيا وكيف حبني يقولي انا كنت نحبك لكن سكتت وخليتها في قلبي لعند جهزت روحي بيش بعد نجي باتك ما يردنيش نحس في حبه ليا في تعامله معايا لعند خلاني نحبه معش نقدر بلاه
الاء قعدت تبحت في هاجر كيف تدوي ع منذر بالهفه في عيونها واضح عليها مرايفه عليه
هاجر : علقني بيه وحتي بعد يزعلني والله ما يتريح ونا نسكر راسي ونرقد وانا زعلانه بعد انوض يقولي والله ما رقدت عشان مش راقده في حضني وزعلانه مني يقعد يقولي ما تهونيش عليا انتي حبيبتي يا قصيره
"ابتسمت ونزلت دمعتها " ولا بعد يتغزل بعيوني ينابش فيا يقولي نعليا من خضوري عويناتي خضر انا فشاكه انا نقعد ماسكه ضحكتي يقعد يقولي اهيا اهيا طلعيها نقوله شنو يقولي الي نبيها بعد نضحك يجي يحضني يقولي ضحكتك بس انا نبي ضحكتك "قعدت تبكي" مرايفه عليه بكل
الاء بكت من كلامها حست هاجر ساكته علي بعدها ع منذر حظنتها : خلاص اسكتي يا هبله توا يروح اليوم ومعش تخليه يبعد عليك احبسيه في شقتكم اربطيه جنبك مش لازم منها خدمه بكل
هاجر وخرت مسحت دموعها : ع فكره نحن بنات هبل بكل بعد نحبو يقعدن حاجتين هذينا مستحيل نوقفوهن نحبوهم بالانانيه معش نبوهم يدوه مع حد وغيره قاتله
الاء : ايوه بذات غيره
هاجر قمعزت ع كرسي : منذر ماشيات معه ظابطات حسني مقهوره
الاء ضحكت : نعليا نا وانتي هذا عليش والعه فيك النار
هاجر تنهدت : مشكله أول يوم رن عليا 3مرات بعدها قعد يرن مره وحده ما يطولش يقولي مش فاضي
الاء تصب في شاهي : إن شاء الله خير يا عبيطه والله يحبك منذر بعدين يبي يفوت الخضوري ع قولته ويبحت في هذينا حتي بصاره ما يبصرن يخوفن
هاجر ابتسمت : مبردك
جاء مسج للاء عدت خذات فون قعدت تقرا ومبتسمه
هاجر : شكلك دايره علاقه يا فوينص
الاء بحتت فيها : لالا
هاجر ضحكت : سرك عند ايلاف وسرها عندك هبا عليكن عارفتكن انتن الاثنين
الاء قعدت تكتب : انتي طلعي شاهي توا نلحق عليك بالموالح
هاجر خذت شاهي وطلعت
الاء دزت مسج " طويلي دازلي مسج بشفره ليبيه حبيبي انت انا نموت فيك .. بعدها ردها فلينيا ههههه "
خذت سفره موالح وطلعت وهي مبتسمه قدمن ودارت تبسي لها وللهاجر وهبه وخذنهن وخشن للدار
هاجر : هبه هبه
هبه : امممم
هاجر : نوضي كولي
هبه غطت رأسها : تؤ تؤ
الاء حطت سفره ع وطي قربت من هبه حولت غطاء : حرارتها مرتفعة
هاجر : قاللها بابا نشيلك المستشفي مابتش
الاء : هذا عصام اللي مودرك معقوله تغسلي فرشه ودبشك مبلول تفتحي مكيف وتقابليه وتقعدي تشلطي في فون يا غبيه
هبه صوتها دبوك طالع : فداء روحي
هاجر : ههههههه خليك في فراش باهي
الاء ابتسمت : انس روح
هبه : كذب
هاجر : والله روح وراقد فوق روح وانتي راقده
هبه تبي تصبي : نبي نركبله
الاء ارتبكت وخافت هبه تركب وشوف فلينتها عند انس الاء : لالا قمعزي راقد تعبان من سفر
هبه قمعزت : باه
قعدن ياكلن بعدها صبايا شوي شوي قعدن يروحن خشت الاء لمت مطبخ وردت هاجر مواعين قمعزن يهدرزن هدي والاء ماركبنش عشان انس مازال راقد فوق جاء بابا وخش منتصر يخشش في تموين رمضان شافو شناطي عرفو انس روح بابا قال ديرو عشاء كويس يبي يكلم عمامي
........
باسم خشش تموين وخضرا كامله وحطهن في مطبخ
عميمه : ما شاء الله كيف قعدت تخضر بروحك
باسم يضحك باس ع رأسها : كل عام وانتي بخير
عميمه : وانت بخير
باسم : شوفي كان ناقصه حاجه
سناء خشت : نبي نكسر عصا هههههه باسم جايب خضرا
باسم بحت فيها بنص عين
عميمه : باسم انت عارف ان اول يوم رمضان نفطرو عند خالك وسنه هذه معانا رحاب وايلاف
باسم أذكر سنه اللي فاتت بحت في سناء : يعني تبو تعدو ولا كيف
سناء : نحن اقترحنا ع ماما سنه هذه درنا كناين نحن نعزموهم وخلاص
باسم بحت ف عميمه : ها شن رايك يا امي
عميمه : انا نبي نسال محمد خوك بعدها ساهل
باسم : غريبه ما جا حد لعند توا
عميمه : خالك وبنات في طريق وعمامك حتي هما ع خشتهم قالو قريبين
باسم : باهي تمام تبو حاجه كلموني في حوشي قاعد نتغذا ونتريح شويا ونجيكم
عميمه : اوباهي ع راحتك بيش تجي للخالك
باسم اوووف : حاضر يا امي
طلع رد للسياره نزل شكاير وخش بيهن للحوشنا سناء قعدت ترتب في تموين وخشت اسماء تساعد فيها
...........
باسم فتح الباب يضبح : حبه عيني
انا كنت راقده في دار حط الحاجات فوق مرمر اللي في وسط مطبخ وسلح كويشه وخش للحمام دار دوش ولف منشف وجا للدار شافني راقده رقد ع بطنه قرب وجهه للوجهي
باسم بصوت هااااادي : اوفي حبيبتي وين ع نوم نوضي
انا هزيت راسي بمعني باهي
باسم باسني في خدي : هيا يا روحي نوضي
انا فتحت عيوني : نبي نرقد
باسم : عمامي وخالاتي يبو يجو هيا بيش تصحصحي وتعدي
انا قمعزت وقعدت نحك في عيوني : ساعه كم
باسم : قريب 7
انا : تعرف راقده من 4 مازالت نعسانه
باسم صبي : معناها هيا سادك نوم
انا صبيت خشيت للحمام وباسم غير دبشه وطلع للمطبخ خذا غذاء وحطه في ميكروويف يسخن فيه
انا خشيت عليه : كان قمعزت راه سخنتلك
باسم : لالا انتي تريحي انا توا اندير بروحي
انا قعدت نفتش في شكاير لقيت شوكولاطات خذيت الاثنين وقعدت نبحت فيهن : هذه ولا هذه هذه ولا هذه لالا هذه لالا توا ناكل هذه وخلاص
باسم ضحك : كوليهن هنا الاثنين
انا : بيش نسمن
باسم قرب مني وحط يده ع خصري : كان سمني شنو يعني
انا : بعدين انت تبقي عينك زايغه
باسم باسني ع ... ونزل بالبوسه ع رقبتي : انا في كل حالتك نحبك وبعد شفتك ماه كنتي درهوبه نعليا نا
انا : نجيلي حبيبي يا ربي
باسم وخر : احم احم خلينا نتغذو
انا : نبيش راه كليت
طلع باسم وقمعز ع بار قمعزت جنبه قعد ياكل ويوكل فيا
انا : خلاص معش نبي انا نبي شوكولاطه
باسم : كوليهن كلهن
انا : احم حبيبي
باسم : عيونه
انا : عيت خالك جاين
باسم حط كشيك : اها و انا عند وعدي لك نتريح شويا بس من صبح وانا انزل في بضاعه العيد بعدها نطلع
انا قربت منه حطيت يدي ع خده : لا خليك عادي بس ماتخشش جوا عشان خاطري
باسم : لا نبي نطلع عندي شغل مهم
انا وخرت وخرت عديت للحمام نرجع وطلعت لقيت باسم قدام حمام
انا : اوووف
باسم مسكني : تحملي حبيبي
رقدني ع سرير ورقد جنبي قعدنا نبحتو في بعضنا قريب عشره دقايق دق باب طلع باسم لقاه يزن قاله قالتك جدتي تعال خالك جاء خش قالها ليا لبسنا وطلعنا باسم قعد في جنان وانا خشيت لقيتهم كلهم سلمت عليهم وقمعزت جنب نسرين واسماء
نسرين : شنو جوك ايلاف
انا : حمدالله كيف حالك انتي
نسرين : تمام
اسماء : هاا انتي شن رديتي
نسرين بحتت في اسماء : قاعده نفكر صليت استخاره ان شاء الله خير قالولي يبي مقابله
اسماء : إن شاء الله ربي يسخرلك
نسرين : إن شاء الله
جت رانيا تقدم وانا كنت مش مسلمه عليها صبيت نبي نسلم
رانيا ماسكه سفره : سلامك واصل خير خوذي بس ظهري انكسر
انا انصدمت قمعزت سمعتها نسرين ونسمه واسماء بس كينات جنب بعضنا
انا : لا شكرا ما نبيش
رانيا عدت تقدم ع باقي
عميمه : وين باسم يا اوفي
انا : برا في جنان مع خالي ومحمد
عميمه : باهي مهم قاعد مع خاله
انا : اها قاعد
رانيا سمعتني طلعت بسفره برا وانا شفتها صبيت لحقتها
فتح الله : اهي جت قهوه وأخيرا
رانيا : جيتك يا بابا وانا اللي دايرتها
قدمت ع باتها وع محمد وجت عند باسم حطت سفره ومدت يدها باسم معش عرف كيف يردها بذات قدام باتها سلم بطروف صوابعه وسحبها دغري
رانيا : كل عام وانت بخير
باسم : انتي بخير قهوه نشربش فيها منوره
رانيا قمعزت جنب باتها خذت فنجال باسم : توا نشرب فنجالك انا
انا قمعدت نبحت فيهم لين رن تلفوني نطيت بحتو فيا
باسم صبي جا جيهتي
انا رديت : الو
ملاك : اهلين اوفي؛ كل عام وانت بخير ينعاد عليك بالصحة والعافيه يا روحي
انا : وانتي بخير ان شاء الله وينعاد عليك
ملاك : تسلمي إن شاء الله
انا سكتت
ملاك : اوفي كنك
انا : شي قتلك قولي للبنات بيش تجني
ملاك : حاضر توا نجوك
باسم صبي هز رأسه يعني في من تكلمي
انا : خلاص يا روحي اتفقنا نرجاكن
ملاك : تمام بعيدين افتحي نت نبوك بيش تعرفي يوسف شن دار
انا : تمام حاضر سلام
ملاك : باي
باسم : كنك حبيبتي تبي حاجه
انا بحتت في رانيا وبحتت فيه : سلامتك
باسم : ايلاف كنك
انا خشيت لقيت خالات باسم وصبايا عمامه وعميمه خدوج وفتحيه بيطلعن في جنان لقاني قدام باب قعدن يزغتن انفجعت باسم هش مفجوع حضنتي ام نسرين تباركلي بعدها اذكرت حملي
انا : الله يبارك فيكن
كل مره وحده تبارك ويباركن للباسم جت رانيا تجري
رانيا : كنكم شن فيه
سناء ابتسمت : اوفي حامل
رانيا فنصت عيونها
باسم : ايلاف تعالي نبيك
رانيا : احم مبروك
انا ابتسمت بمكر : الله يبارك فيك عقبال ما نفرحو بيك ان شاء الله
باسم طلع وصبايا كلهن طلعن للجنان قمعزن قعدن يهدرز في رويحه برا طلعت للباسم لقيته في سيارته صبيت قدام باب سواق
باسم : انا طالع تبي حاجه من برا
انا : جيبلي رصيد بس
باسم طلع كرعيه من سياره : توا اندزلك كروت في مسج تبي حاجه اخري
انا : تمام لالا
باسم : نجك ليا
انا تنهدت : دير بالك علي روحك
باسم مسك يدي باسها : حاضر وانتي قمعزي ماتحركيش
انا : باه
باسم : توا نجيب سحور من برا شن تبي
انا : لالا توا انديرو سفره خفيف
باسم : انتي ماديرش توا نروح ساهل
انا ابتسمت : باهي
باسم : خاطري في بوسه
انا كشخت عليه : ما فيش
باسم : هههههههههه تمام باه
انا وخرت مشيت وباسم ولع سياره
باسم بصوت عالي شويا : فكرونتي
انا برمت دغري : اسسس
باسم رقص حواجبه : نحبك
انا خبطت يدي ع جبهتي
باسم بيب فتحله بواب باب وطلع
رديت قمعزت معهم ورانيا تكشخ عليا بعد يفطنولها تقعد تضحكلي
نسمه : ما تعبريهش راه هذه نفسيه وانا اكثر وحده عارفتها
انا استغربت انها تدوي ع بنت خالها معايا
نسمه : كنك استغربتي بعدين بنت خالي حفظتها انا طلعت سوسه وبعدها بفتره عارفتها تبي باسم ودارت معه علاقه
انا ركزت معاها : باهي
نسمه : بعدها بكم شهر جتني وقالتلي باسم يبي يخطبني انا ماصدقتش صراحه باسم كاين يقوللنا توا نجيبها لكم تركيه مش ليبيه بكل كنا عارفينا يبصر عشان زواج آخر هماا بس بعدها سمعت انا يبي يخطب جد رنيت ع باسم وقتله دبالك تخطبها قالي لا نبي اخت صاحبي مش هيا اطمنت وقالي ان هيا مش مفكر فيها بكل هي عباره عن تعارف بسيط وانتهي صح كنت نبي نخطبها بس في حاجه وخرتني عليها
انا نبحت فيها وهيا تدوي : اها بس كم شهر قعد معاها علاقه
نسمه : قريب 5 شهور
انا فنصت عيوني : 5 شهووور
نسمه : اها كنك
انا : لالا شي
نسمه : شكلي ازعجتك اسفه
انا : لا عادي اصلن انا عارفه وباسم قايلي كلي شي
نسمه : بس افطني عشان تبي تخربها وحق الله انا عارفتها راه
رحاب : اوفي شن جو حمل معاك
انا : اه اها تمام ناخذ في دواء وحمد لله
رحاب : يسلمو عليك هلي ويباركولك كنت نكلم فيهم
انا : سلمك ويسلمهم انا رنيت في صبح بعدها رصيدي كمل باسم شوي ويدزلي نرن عليهم
نسمه صبت : توا نجيكن يا كناين عيت خالتي عسل
انا سرحت في كلام نسمه وسكتت بعدها دارو سفره تعشو وروحو كلهم وانا رديت للحوشي
............
سناء : الو
احمد : ايوه نعم
سناء : وينك اليوم
احمد : والله ماني فاضي حتي حوش ماروحتش طالع من صبح
سناء : مازالت مشغول
احمد : اها بعد نفضي توا نرن
سناء : تمام حبيبي سلام
احمد : سلام
.........
عصام : شنو حبيبي
هبه بصوت واطي : تعبانه مازالت
عصام : باهي امشي مستشفي كنك تعاندي
هبه : باه
عصام : صوتك تعبان بكل
هبه : اهاا
عصام : والله كان مش احمد وانس راه جيتك شلكتك للمستشفي
هبه ضحكت بصوت واطي
عصام : نجي ضحكه ياربي
هبه : نبي ناخذ دوش بالك نصحصح
عصام : تمام بعدها رني عليا
هبه : تمام
..........
ابراهيم : وين انس
الاء : راقد فوق
ابراهيم طلع والاء قعدت ترن ع انس عطها مقفل
ابراهيم ركب خش حوش وفتح باب مربوعه لقاها مثلجه وتلفزيون مفتوح وبنتها دخان ومتغطي بالبطانيه زين
ابراهيم فتح ضي : انس انس انت يا فرخ
انس فطن في حد يضبح استنشق ويبي يحول بطانيه شم عطر الاء اذكر انه بايت فوق واخذ فلينيا امتاع الاء حطها تحته وحول بطانية وفتح عين وحده وبحت في ابراهيم
ابراهيم : تي نوض ساعه 11 طولت في نومه راه كلهم لوطا يرجو فيك
انس : باهي اطلع
إبراهيم : عليش نطلع توا نرجاك
انس اووف : جيب منشف باهي
ابراهيم عزقله منشف انس عطه بظهره للابراهيم وحط فنيليا انتاع الاء في منشف وكر كناتيره قعد يلبس وخذا دبشه ماسكه في يده زين وصبي
ابراهيم : خش حمام يا مخمج
انس : مش شورك يا ### عليك وجهه واحد يصبح فيه
ابراهيم : هههههه وين صباح ساعه 11 مساءا يا بيبي
انس يلبس في كويش عفاسي : مثقل ### هلك ؛أحمد جاء
ابراهيم : أحمد انسااه خلاص رمضان كله يقعد مشنوق معش نشوفوه الا ساعه ع فطور
نزل انس وابراهيم وراء استقبلوه كلهم وقعدو يحمدوله ع سلامه ورنو ع عمر كسدو معه وحطو عشاء واسحرو مع بعضهم قعدو لعند واحد كل حد روح حوشه ما عاده الاء
انس " الاء راه فلينيا مازالت معايا ديري جوك وتعالي خوذيها ما عندي وين نحطها "
الاء " مش خذيتها ردها كيف ما لقيتها غاليا عليا بجامتي هذه من جديده نبيها مش شوري "
انس " تمام اليوم ارقدي بلاها مش غاليا عليك توا نوريك من غاليا انا ولا هيا "
الاء " وراس طويلي تردها "
انس " خلي راسي يمشي ف قص ما فيش يعني مافيش "
الاء " تمام عادي براحتك "
انس " تعرفي بعد شميتها ردت روحي تقول راقد معاك "
الاء ماردتش
انس " اوووي هههههه "
انس " تمام تصبحي على خير مع ان عارفك واعيه "
الاء طلعت من دار بنات لقت انس وايوب وابراهيم في مربوعه كل حد ع تلفونه
الاء : احم شباب
بحتو فيها
الاء : نبي شحن
ابراهيم : ما فيش طيري
انس فك تلفونه من شحن : تعالي اهو
ايوب طلع من باب خارجي وابراهيم رد ع تلفونه
الاء قدمت خذت شحن : شكرا "بصوت واطي " فوني في شحن لكن رصيدي كمل
انس : باهي
هاجر : انس انس
انس صبي : كنك
هاجر تبكي : منذر يا انس منذر ومالك مالك
..........
يتبع....
رايكن ..
بنات نبي نقوللكن ع كم حاجه
اولا ضي دايرها فيا لين خلاص مليت😭
ثانيا إمتحاناتي نهائيه بدن يعني معش نقدر انزل هذه آخر حلقه ومع علم إمتحاناتي لعند نهائيه شهر 7😔
يعني مضغوطه نقدرش نفكر في أحداث وانا خلاص نبي نختمها يعني هانت اصبرن عليا وشكرا للكل متابعين روايه
ثالثا لاحظت انكن معش تعلقن 😕 ولا تهيالي😅
رابعا حلقه مش معدله عشان مالحقتش قدامي شيتاتي وفي يدي فون يا الله كملت الحلقه بالله عليكن مانبيش كلام سلبي وحق اللي خالقني مضغوطه بروحي 🤦♀️
نحبكن عرم بكل تصبحن ع خير ❤🙈
Fafe faa
