💚✴حارس روحــي✴💚 ( كرونيك باللهجة التونسية: مكتملة )

🌸القسم 1 🌸

                    ❇✴💚❇✴

بخطوات ثقال مترددين مشى ناحية الباب ، وقف لحظات مغمض عينو ، خذى نفس طويل ودق الباب ،سمع صوت عندو سنين ما سمعهوش ،رجفت يدو وهو يحل الباب ويدخل ،قابلو وراء البيرو راجل شعرو ولحيتو بين اللون الابيض والاسود لمعة عينو هي نفسها من سنين بدنو مازال كيف ماهو ، اول ماراه تبسم "اهلا ، كنت متأكد انك باش تجي"
تبسم بدورو وهبط راسو ،تلمس مراياتو ايلي على عينيه وهي الفازة ايلي يعملها وقت يضيع عليه الكلام و مايعرفش اش يعمل والا اش يقول .
"اقعد، تحب نطلبك قهوة ....تاي....ڨازوز...عصير ....قلي شنوة تحب "
"من المستحسن نحكاو فيلي جيت على خاطرو "
سكت الراجل  الكبير وهو يخزر ليلي قدامو ، سكوتو كان غامض ماتفهمش شنوة وقتها قاعد يدور في مخو، تمحمح " ايه....نحكاو...اصلا ضروري ندخل في الموضوع طول ....معتز ....انا عييت وانا نلوج ونتبع ونسأل ،لو تعرف قداش تعبت باش لقيتك ، اول ما قالولي بايلي لقاووك ، من فرحتي قعدت نمشي ونجي في ها البيرو و ماقعدتش ، وقت كلمتك وتأكدت ايلي انت هو معتز متاعنا فرحت بارشا"
رمشت عينيه من تحت مراياتو اول مرة يراه يحكي بالطريقة هاذي ، متوتر ،فرحان ، خايف و داخل بعضو وموش لاقي الكلام
"سي شكري....تنجم تقلي علاش حبيتني نجي لتونس فيسع...شنوة السبب   "
"السبب هو شخص يهمني ويهمك "
هبط راسو و تلمس اطراف مراياتو ،قمة التوتر ، مانجمش يهز راسو
"انا ناديتلك على خاطر زياد...صاحبك زياد....كان ما...مازلت تتفكرو بالطبيعة ...انا متأكد انت تتفكرو زياد ، اصلا انت هوني خاطرو هو ...قاعد مقابلني انا رغم ايلي صار في السنين ايلي تعدت ...لا انت نسيتو ولا هو نساك "
بلع ريقو بصعوبة ، بدنو لكل يرعش ، حس بروحو مخنوق على الاخير" و...زياد ...يعني علاه ...." نفخ بقوة يحاول يشد روحو ويحكي نرمال " شنوة الحاجة ايلي تنجم تخليك تلوج عليا وتخليني نجي لتونس على خاطر زياد "
"زياد....في خطر ..."
وساعت عينو وتحل فمو لا اراديا ، استنى شكري يكمل يحكي " زياد...من صغرو عنيد وراسو كاسح ...متهور لدرجة انو معادش تهمو روحو .....انت ماتعرف عليه شي .....زياد توا رئيس جريدة الكترونية ، هو ومجموعة من اصحابو لامهم وعمال يكتبو و يفتوشو في كل حكاية ، تقول موكلين باش يدافعو عن الناس، توا من اربعة سنين وهوما ماخلو شي ما كتبو عليه ، صحيح بارشا ناس توا يتبعو فيهم وكل جديد يهبط في الجريدة يستنوه و يلوجو على اي موضوع يكشفو بيه بارشا قضايا و فساد اما...الشي هذا ولى خطر عليهم ....ولاو مستهدفين من بارشا ناس خاصة ايلي فضحوهم ، انا حاولت معاه و حكيت معاه الف مرة ،اما ما سمعنيش ...ولا يمكن يسمعني...انت الوحيد ايلي يسمعك....وهاكي علاه انا عيطتلك"
"تحبني نقلو فك عليك ملي انت تعمل فيه ...؟؟بالاخير هو اكيد عارف ايلي يعمل فيه ...يظهرلي انا مانجمش نعاونك في هذا "
"زياد من تلاثة شهور هددوه بالقتل ....والشهر ايلي فات ...عمل اكسيدون ...والاكسيدون بفعل فاعل "