حل عينو لقى روحو في السبيطار ، على يمينو قاعد معتز و على يسارو بوه ، شكري، عاود غمضهم وضحك بتمسخيرة " اهوووه ...تي هاي تلمت الاحباب "شكري مفجوع" زياد...لاباس "
حل عينو مرة اخرى " في خيار الخير "
وقف بوه من جنبو " نمشي نقول للطبيب بايلي انت فقت "حب ياقف لقى السيروم معلق في يدو ، حاول ينحيه حس بيدو تخدرت من شدة ايد معتز القوية " قالك باش يجيب الطبيب ،اعمل العقل واستنى تو هو ينحيهولك "
خزرلو لقاه يڨحرلو وعينيه باش تاكلو ، حواجبو مقرونين تقول شيطان يخمم في حاجة من حاجاتو " تحسك تحب تقتلني ...عينيك تلعب بخباثة "
"هذاكا كان ماعملتش في روحك هكا ، راني قتلتك بسهولة "
حط راسو ع المخدة " انت ايلي جبتني لهوني!؟ "
"لا طارت بيك الجنون "
"شتعمل الساعة بحذايا ، نرمالمون راك حذى كاميليا، علاش مخليها "
"اولا ماخليتهاش ،ثانيا مستحيل نخليها ....خاصة ليك انت "
"نرمال انت تحكي هكا مع حد مريض...نعلمك انا زادا مستحيل نخليهالك ....باش نكونو واضحين مع بعضنا "خزرو في عينين بعضهم ، ماتنجمش تفهم اذا من حديثهم فذلكة والا جد ايلي يحكاو فيه و تفاهمو عليه.
دخل الطبيب ومعاه شكري ،تفقد السيروم وقرى اوراق كانو بجنب سريرو من بعد وقف مقابلو ووجهلو الكلام " من الطاف الله جيتنا في الدقيقة التسعين، كيفاش نجمت تصبر ع الوجيعة الايامات هاذي لكل "
مط شفايفو بقلق "قلي وقتاش انجم نخرج ، انا لازمني نمشي عندي بارشا قضيات "
"سي زياد...مافماش خروج الا بعد ما نتهناو عليك ، توا لازم ناخذو منك شوية تحاليل قبل العملية '"
تنفض بكلو وخزر لمعتز الجامد والقاعد على حالو بكل برودة دم " عملية ! اما عملية زادا! ؟ ابراهيم ....فاش يحكي هذا"
"عندك التهاب حاد في معدتك نتيجة القرح والمادة تعباات فم ، لازمتك عملية استعجالية "
"اما انا لاباس توا ، موش حاس بشي" تلفت لبوه ولصاحبو لعل يلقى حل والا تكذيب ليلي سمعو اما من وجوهم فهم ايلي مافماش لعبة ولا تخويف .
★**"★
وقت هزو زياد للتحاليل تفاضى شكري ب معتز وجبدو على جنب "شنوة هذا ايلي عملتو ، جبتك من استراليا لواه ؟ تنجم تقلي ماهو والا نسيت علاش جيت وتلهيت اتبع في الستجارة متاعو "
"اعرف شتحكي ع الاقل احترم انها توا في البلوك "
"كنت انت تحترم اتفاقنا ، كنت انت ترد بالك وتحسب حساب يوم كي هكا ، انا نبهتكم وعييت انبه فيكم ، وجبتك انت من اخر الدنيا باش توقفو علي يعمل فيه قتلك وعاودتلك حياتو في خطر ....انت شنوة عملت عاونتو باش يكمل"
أنت تقرأ
💚✴حارس روحــي✴💚 ( كرونيك باللهجة التونسية: مكتملة )
De Todo★الاسم : حارس روحــي ( my soul guardian ) ★النوع : كرونيك ، اجتماعي ، رومنسي ، تشويق ، اثارة ، عائلي ..." ★الكاتبة : ň🅾D🅰 ★عدد الفصول " 46 " ★سنة الانتاج " 2018 " ★القصة " ✴تتعدى سنين على الفراق وماتخلف كان الوحش و الذكريات المنسية 🌸، يرجع بعد مد...