💚✴حارس روحــي✴💚 ( كرونيك باللهجة التونسية: مكتملة )

✴🌺القسم 41 🌺✴

خذات هواء وتنفست مليح قبل ماتمدلو الورقة " هاذي تهمك بارشا "

استغرب منها ، خذا من عندها الورقة وخزر ليلي راسمتو ، وجه معتز وهو صغير مستحيل مايعرفهوش ....وهذا ابراهيم ....حس ببدنو الكل تخدر ، وعينو ماتحركتش من على الورقة ، كان عندو احساس انو هو معتز ، اما قعد يكذب وينسي

" انا تعديت بمرحلة خايبة بارشا ، مرحلة كنت قريبة فيها من الموت ،وقت فقت ولقيت روحي مازلت في الدنيا اول حاجة جات لبالي هي ها السر ، انا كنت خايفة وقتها وضايعة وموش عارفة شنوة لازم نعمل... نحكي وقت ايلي رسمتهم ...، ، خفت نبعد بعيد ونخلي حكايتي موش كاملة ....، طلبت مني نرسم صاحبك ونتخيلو كيفاش ولى ...كذبت عليك وقتلك مانجمتش ....خبيت عليك سامحني....وتوا ماانجمش نخبي اكثر، ....انت يظهرلي وليت تعرف ايلي معتز عايش "

مازال راشق عينو فيها وماعمل حتى رياكسيون " ابراهيم ....هو صاحبك معتز ....انا ماقتلكش خاطر حبيتو هو يصارحك ، وماحبيتش نتدخل بيناتكم ، انا مانعرفش شنوة صار من عشرين عام لتالي ، وخلاكم تتفارقو ، انا عندي كان شطر الحكاية ، وهي انو معتز ،رجع على خاطرك انت لتونس ومن اول يوم كان عارف ايلي انت هو صاحبو و قعد مخبي حقيقتو باش ينجم يحميك والا ربما فمة سبب اخر "

رعشت شفايفو و تحركت رموشو بدموع مقهورة "ابراهيم هو معتز!!! ...يعني ها الشهور الكل نقوم ونرقد وهو قدام عيني !؟ ...القبر الفارغ ايلي نزورو !!، السنين ايلي عديتهم ندعيلو بالرحمة ......كل شي لعبة ؟! .... "

"يظهرلي ربي استجابلك، ورجعلك معتز ، موش هاذي كانت امنيتك "

"كنت ندعي نراه لحظة برك ، طلعت اعمى وهو قدامي ديما "

هز راسو للسماء وغمض عينو ، تنفس بقوة من بعد رجع يخزر للورقة ، متبعة كل حركة عاملها ، تصورتو باش ينڨز وباش يطير ويجنح ، اما هو جامد اصل ، موش لاقي كلمة يقولها وموش عارف شنوة يعمل في حالتو.

"لازمك تمشيلو وتحكي معاه ، ها السنين ايلي تعدت مستحقين تقعدو قعدة وتحكو عليها ، ايلي نعرفو قلبك مليان حكايات ليه ، فازي هاذي فرصة "

تلفتلها بعين تايهة " و....وينو توا "

" ماعنديش فكرة ....قالي عندو مايعمل وباش يرجع "

خلاها واقفة ومشى ،اما عقل مازالو باش يعرف يسلم قبل مايمشي ، فاهمتو وعاذرتو ، حست براحة كبيرة في داخلها ، الاصحاب الزوز باش يرجعو كي قبل وباش يتلقاو بهويتهم الصحيحة بعد عشرين عام ، الحمد الله نجمت تعمل حاجة ع الاقل ، وتوا لازمها تكمل بقية الحكاية .

❇❇❇💚💚❇❇❇

يخزر لولدو الواقف قدامو ، كمل سيڨاروه ووقف بحذاه ،نفخ في وجهو الدخان هكا قالو مخو ، بعدو معتز بيدو ، هو لايتكيف ولا يحمل ريحتو " جاي لهوني....وتحب تقابلني ....يظهرلي فهمت وفقت على وضعك...مافمة حد في ها الدنيا يحبلك مصلحتك غيري ، غير بوك ، انا ضحيت بكل شي على خاطر وباش توصل بروفيسور قد الدنيا "