شاد تصويرتهم القديمة بين صوابعو ، وكاميليا بجنبو تستنى فيه يحكي علاه طلب يتقابلو ...خذى وقت طويل باش بدا حديثو"التصويرة هاذي اعز من روحي عندي... ماتنجمش تتصورش قداش غالية عليا يا كاميليا ، التصويرة هاذي هي الماضي متاعي ، هي عايلتي ...باختصار هي دنيتي "
غامرت بايلي تعرفو " انت وصاحبك ايلي توفى ؟!"
"روحي الثانية ، الشطر متاعي ، الخوه ايلي موش من دمي ، الذكرى الوحيدة ايلي قعدت منو ، نشم في الريحة متاعو منها ، قبل نومي وبعدو نقعد نثبت فيها ، نحس كي نخزرلو وهو يضحك هكا كاينو واقف قدامي "
ترددت قبل ما تسأل "كيفاش توفى "
"اكسيدون ....بنفس الموتور ايلي واقفين قدامو " عدى صوابعو على وجه صاحبو في التصويرة " معتز .....نهارتها قعد يتعارك معايا على شكون يسوقو ...يغلبني بكلمة انا اكبر منك ...وهو الفرق بيناتنا عام برك ، يبدا يدز في صدرو عليا بيها ...اما في الاخير ذبلتلو عينيا وتسوخفتلو باش خلاني انا نسوق...الفرحة ايلي حسينا بيها وقتها ماتتعاودش...يقولو بعد بارشا ضحك تجي بارشا مصايب "
"نهارتها...صار الاكسيدون ؟"
"نهارتها صارت الكارثة ، من بهامتي وقلة خبرتي فيهم مانجمتش نكونتروليه ، حاولت اما هو غلبني ، كنت عارف ايلي نهايتها اكسيدون لانو وقتها في وسط الطريق ، معتز ورايا قالي هيا انڨزو ،ربما كان هاكي حل ، كان نڨزنا ربما رانا توا مع بعضنا ،بايلي باش تكون النتيجة كسر والا جروح ....اما موش موت "
"ومن بعد شنوة صار"
"عرضتنا كرهبة ، هي تجري واحنا نجرو ،ايلي يرانا يقول صغار يلعبو يستاهلو ، صار الاكسيدون واخر حاجة نتفكرها وجه معتز بكلو دم ، حاولت ...والله العظيم حاولت نحميه ، رميت روحي تحتو باش ما تكونش طيحتو كبيرة و تكون الجروح اخف ، اما وقت حليت عيني من جديد مالقيتوش...قالولي توفى من اول نهار جيت فيه للسبيطار نزف ومات.." غص في حديثو و هبطت دموعو ،دفن راسو بين كفوفو و سيب روحو للبكاء" انا كنت سبب في موتو ، انا ايلي قعدت نزن عليه باش نركبو الموتور ونسوق ، انا ايلي مانجمتش نهرب بيه من الاكسيدون ، حياتي من بعدو ظلمة ...كانلي الخو والصاحب ..هو عايلتي...عايلتي الوحيدة "
عدات يدها على شعرو وجبدتو ليها عنقتو " كل شي ليه عمر وعمر صاحبك كان صغير ، انت لازم تربحو رحمتك، ماتقعدش تلوم في روحك كل ها السنين ، هاكي حاجة مقدرة ، انت حاولت تحميه ورميت روحك تحتو ، ضحيت بروحك على جالو ، اما ربي حب انو يموت "
سيطر على روحو شوية وبعد منها ،مدلها التصويرة " نحب نراه ...نحب نشوف كيفاش ولى بعد ها السنين لو جاء عايش، شعرو كيفاش ، عينيه! وجهو ؟ بدنو !؟ وانت يا كاميليا الوحيدة ايلي تنجم تعاوني "
أنت تقرأ
💚✴حارس روحــي✴💚 ( كرونيك باللهجة التونسية: مكتملة )
Random★الاسم : حارس روحــي ( my soul guardian ) ★النوع : كرونيك ، اجتماعي ، رومنسي ، تشويق ، اثارة ، عائلي ..." ★الكاتبة : ň🅾D🅰 ★عدد الفصول " 46 " ★سنة الانتاج " 2018 " ★القصة " ✴تتعدى سنين على الفراق وماتخلف كان الوحش و الذكريات المنسية 🌸، يرجع بعد مد...