💚✴حارس روحــي✴💚 ( كرونيك باللهجة التونسية: مكتملة )

✴🎶القسم 46 : الاخير 🎶✴

       
       ★ 💚 __*بعد سنة*__💚   ★

"سي كريييييم ، سي كرييييم "

جراتلو طفلة في العشرينات من عمرها مازالت في اول جمعة ستاج في البيرو " سي حسان قالي باش نعطيك تراجع الرابور هذا "

خذاه من عندها ودوب ماورقو ورجعهولها " عاودو ، هذا يجي كل شي الا رابور "

ومن غير ما يسمعها اش تقول اخر ... حط يدو في جيب سروالو ولبس لينات الشمس النوار و قصد الباب خارج ..عرضوه في الباب ناظم  ووفاء اليد في اليد بتمعشيقة ظاهرة

" اوهوووو ...وين على خير سي كريم " سألتو وفاء

دوب ما هبط ليناتو وكشف عينيه " عندي روبرتاج مع سفير  بريطانيا وانتوما هاكم ماخليتو شي على عصيفرات الحب "

ضحك ناظم ودخل يدو لجيبو ومدلو استدعاء" انت اول واحد من الجماعة تاخو استدعاء العرس"

هز حاجبو " اهووو ....فمة ربوخ على قريب مالا "

جاه خف على رقبتو من حيث لا يدري رجعو لشهور لتالي  ... خزر وراه مرعوب  لقى حسان لابس تريكو كرمال ودجين ازرق فاتح و شعرو طوال شوية  ، نحى ليناتو  وتسنتر "سي .. سي حسان "

عاود حسان  ضربو على رقبتو " لتوا مازلت ترعش من حسان .. ياولدي راك وليت صحافي قد الدنيا " عاود لبسو اللينات ومانساش يزيدو خف آخر  " ايا اقصد ربي وبرقشلنا حاجة مزيانة نهبطوها غدوة "

خزر لوفاء " ياطفلة شبيك ملي قرب عرسك معادش تسكت من الضحك "

كملت ضحكت وضربتو على صدرو ودخلت غمزو ناظم ودخل وحسان تبعو وهو يحكي بصوت واصلو  " باهي سي المترجم متاعنا ،برا هوكا عندك نود خدمة تنساش روحك و انت تتمعشق في وفاء عاااد... ، العمل قبل كل شي راو ، هذا موش كمال  تكركر عندو "

ذاكرتو لكمال  خلاتو يتفكر حد عزيز عليه بارشا ، حد خلى طابع خاص عندو... خلاه يفيق انو الدنيا تنجم تكون لون اخر غير اللون الاسود ، تبسم للذاكرة... و ليلي مذكرها ... توحشها بارشا عندو عام ما قابلهاش خلينا نقولو بالحساب تسعة شهور واربعة ايام ...، دار راجع لداخل ... فمة برشا خدمة ....، جريدة زياد وبعد قضية كمال  ايلي  في ڨلبو و بعد المحاكمة متاعو والادلة الواضحة لقى روحو مورط في بارشا  قضايا منها الاتجار بالبشر  ، تبييض الاموال ، تكوين عصابة و محاولة القتل العمد وغيررررو وغيرررو ...