حاولت تركز في التقرير ايلي طلبو منها حسان ، ماعندهاش صوابع وكلام كيف كريم هاكي علاه حست بروحها متقلقة بارشا وغير هذا ملزوم عليها تريڨلو وتبرقشو كيف مالازم ،بجنبها كان اشرف وسمية يحكاو و كريم بيناتهم مسلكها عليها ريڨل اومورو بكري ، المنضبط عاد..
اشرف " وينو زياد...موش قال جاي شبيه لتوا ...زعمة لاباس"
سمية " اكيد مع صاحبو الجديد "
اشرف" تقصد في ابراهيم "
هزت عينيها وحضرت روحها باش تسمع كل شي يخص ابراهيم، تحب تسمع كل كلمة كل حكاية ،اي فازة اي حاجة تخصو وداخل فيها من قريب والا من بعيد.
سمية" اول مرة نراه هكا ...بعمرو ماكان قريب من حد لها الدرجة...انت يااشرف تتسمى اقرب واحد ليه فينا...اما ابراهيم هذا...المبجل عندو ولى اقربلو منك "
أشرف" في العادة هو صندوق مسكر"
سمية " موت صاحبو اثر فيه...ساعات نتخيل زياد قبل والا توا لو ماماتش صاحبو "
كريم باهتمام " ياخا سي زياد عندو صاحبو مات "
اشرف "اششش ...رد بالك تحكي ها الحكاية قدامو ولا تسألو سمعتني "
قعد يدور في عينيه بيناتهم ، اشرف كان جدي على الاخير موش يفذلك ، هاكي علاه فهم ايلي مافماش لعب في ها الموضوع...اما عرف ايلي زياد خسر صاحبو ...وقتها وين حس بقلبو مقبوض ومتقلق .
دخل زياد يصفر ويدور في مفتاح في يدو و يدو في جيب سروالو الدجين "اه خالد...وين قضيتنا "
تمحمح خالد في بلاصتو والعينين الكل عليه والناس الكل تستنى اش عمل متاع الانفورماتيك .
"باهي ...هاذوما البنيات ايلي جاونا في الفلاش، هذا ايلي وصلتلو ،كل وحدة عمتلك عليها رومارك ،تنجم تراهم "
"اوف يا خالد...تعرفني نكره قراية الدوسيات والاوراق..تي هات اش عندك"
"باهي بالمختصر...الحاجة ايلي تجمع البنات هاذم انهم فقراء...مافي حالهمش...من عايلات بسيطة...مزيانات ...يلوجو في الخدم ...ويرضاو حتى بصالار قليل "
سمية " هاكي علاش ... غريمنا لقاهم ساهلين وفيسع ما لعب بيهم وحطهم في جيبو "
أشرف " ياخا تخممو فيلي نخمم فيه انا !؟ "
تدخلت كاميليا من بعيد " اذا البنات هاذم يتشاركو في ها الحاجة ...لازم فمة حد يلوج ويلمد فيهم ...يصطاد في كل بنية مزيانة فقيرة مستحقة اي خدمة "
زياد وهو يشاورلها بصبعو " بالضبط "
حسان " لازمنا نوصلولو يعني "
اشرف " وشكون باش يوصلنا ليه "
زياد " بالطبيعة موش البنات هاذم "
كاميليا " تنجم ...الطفلة ايلي امها حبت تقدم بلاغ ضياع...موش قلتو كانت عندها صلة بكمال والا شنوة اسمو"
أنت تقرأ
💚✴حارس روحــي✴💚 ( كرونيك باللهجة التونسية: مكتملة )
Random★الاسم : حارس روحــي ( my soul guardian ) ★النوع : كرونيك ، اجتماعي ، رومنسي ، تشويق ، اثارة ، عائلي ..." ★الكاتبة : ň🅾D🅰 ★عدد الفصول " 46 " ★سنة الانتاج " 2018 " ★القصة " ✴تتعدى سنين على الفراق وماتخلف كان الوحش و الذكريات المنسية 🌸، يرجع بعد مد...
