يجري بالكرهبة على اخر فيتاس وزيد عامل كيف ع الفازة ...و قت حبس طول هبط كريم يرد ودايخ وتبطح لوطة مسلم ،يرا في الدنيا تدور و ساعات تظلام قدامو ، خزرلو حسان بقلة صبر وبعدها تلفت لكاميليا ، لقاها تعاوظ تشد في شعرها وتبعد فيه على عينيها ، ماتأثرتش جملة وباقية طبيعية ع الاخير ، همز كريم بساقو " تحرك ريڨل حالتك ع الدزة هاذي باش تعطلنا بارشا...خلينا نمشاو ...اهيكا الدار مقابلتنا "
مشى ومشات وراه ديراكت كاميليا و بعد لحق كريم وهو شاد روحو بالسيف لا يدوخ والا يرد مرة اخرى ، دق الباب و قعد يستنى ،خرجتلو طفلة صغيرة في عمر المراهقة ،استغربت كي راتو اما هو بكل جدية سألها من غير حتى مقدمات " مدام عزيزة موجودة"
"شكون انتوما "
جاء صوت من وراها "شكون جانا !؟" ظهرت مرا في الخمسين من وراء الباب ...ع الاول قعدت تخزرلهم ومن وجها تفهم ايلي ماكانتش مستنيتهم ،سهل عليها حسان ااحكاية " احنا من بيرو زياد..."
كحال وجها و ولات في صينة عبد مرعوب و معادش عارف اش يعمل "اه...لقي...لقيتو بنتي...فمة خبر عليها "
حسان "مانجموش نلقاوها واحنا مانعرفو عليها شي"
كاميليا " انجمو ندخلو نحكاو شوية"
تلفتلها حسان وعينو تقلها اش دخلك والمرا شاورتلهم بكفها
"تفضلو..."
كريم بدا يرجع لحالتو الطبيعية تقريبا و نجم يركز فيلي قاعد يصير ويفهم الوضع ، دخلتهم للصالة و وصت بنتها على قهاوي ليهم ،كاميليا لوجت مليح في الصالة بعينيها ومن بعد ركزت على الام ... كانت تفرك في صوابعها و تبلع في ريقها و باين خوف كبير على وجها وهي اتبع في حسان ايلي كان ماخو راحتو ومتكي ع الكرسي تقول الدار دارو.
حسان "مدام...تنجم تحكيلنا شنوة صار بالضبط ومن وقتاش بنتكم مارجعتش للدار "
"اممم...عندها ...حكاية شهرين "
"وعلاه كان توا تفكرت تهبط اعلان الغياب "
"اممم...في بالي تخدم و لاهية "
تدخلت كاميليا مرة اخرى " علاه ماقبلتش تجي حذانا ...فمة حاجة مخوفتك والا خايفة من حد "
بلعت ريقها وزادت كمشت صوابعها" لا...مانيش خايفة ...سامحوني ...انا فاش انجم نعاونكم ...كل شي عطيتو كي حكيت بالتاليفون وبعثتلكم التصويرة ..علاه جايين لهوني .... "
استغربت كاميليا من لومها " مدااام ...انت متقلقة خاطر احنا جينا والا خاطر ركزنا بارشا في حكاية بنتك ...وحبينا نعرفو الحكاية الكاملة ...نفهم ايلي ندمت كي كلمتنا "
وجها دخن و تربثت ...تنطرت جات واقفة "بون سامحوني ، القهوة وشربتوها و حكيت كل شي قبل ....عندي مانعمل تو نخليكم....زهور ايجا وصل الجماعة للباب "
أنت تقرأ
💚✴حارس روحــي✴💚 ( كرونيك باللهجة التونسية: مكتملة )
Aléatoire★الاسم : حارس روحــي ( my soul guardian ) ★النوع : كرونيك ، اجتماعي ، رومنسي ، تشويق ، اثارة ، عائلي ..." ★الكاتبة : ň🅾D🅰 ★عدد الفصول " 46 " ★سنة الانتاج " 2018 " ★القصة " ✴تتعدى سنين على الفراق وماتخلف كان الوحش و الذكريات المنسية 🌸، يرجع بعد مد...
