💚✴حارس روحــي✴💚 ( كرونيك باللهجة التونسية: مكتملة )

🍁✴❇القسم 5 ✴❇🍁

قاعدة في الدروج تستنى والورقة بين يديها ، ماكلها العصب و بالسيف شادة روحها لا تعاود تطلب حسان وتسبو تقلو معادش حاجتي باش نعدي ستاج معاكم ، مازال كلامو يزن في وذنها وقت كلمتو وقتلو زياد راقد وما ينجمش يشوفها ولا يصحح في الورقة المحنونة ايلي تذلت عليها نهار كامل ،قالها بالحرف الواحد " تستناه لين يفيق ...ماترجع لهوني الا والورقة مصححة كان لزم تعدي الليلة فم تستنى للصباح "

حستهم متفاهمين عليها هي وزياد....لولا ماجاتش مستحقة ها الستاج ومستحقة الفرصة ايلي تنجم تاخوها معاهم و قداش عيات باش كلمت فريد باش يتدخللها معاه فماش مايقبلها ،كانت خلتها واسعة وعريضة ع التهنتيل ايلي هي فيه توا ، اما ميسالش مافمة شي يجي بالساهل ، غدوة يلومو رواحهم وقت تثبتلهم ايلي هي صحافية بالفم والملا .

سمعت الباب تحل فرحت ، اكيد زياد فاق وقفت وطلعت الدرجتين تجري ، اما حتى المرة هاذي كان نفس الراجل ايلي راتو المرة الاولى...استغرب كي شافها مازالت فم ... ،ياخا لتوا لا مشات !؟

هبطت راسها حاشمة "سي زياد فاق؟! "

"مازا....." كان معمل يقلها برا روح مازال ...لكن زياد تمحمح من داخل وعيط باسم ابراهيم ، تالمون استنت وعييت وهي تستنى فيه يفق ، خلات معتز واقف ودخلت تجري لداخل وماهمهاش ايلي هو راقد والا داخلة لدار عازب ولا خافت من السيناريوات ايلي عملتهم في مخها ، المهم تصحح في ها الورقة المتعوسة وتمشي .

كان فايق من النوم وموش عارف منين هبطت عليه كيف القضاء ،شعرو داخل بعضو و عينيه منفخة ومريولو طالع فوق كرشو ، مدتلو الورقة في وجهو "سي زياد عندي قداه وانا نستنى فيك تفيق ..قعدت في الدروج لين فقت ...يعيشك صححلي الورقة باش انجم نرجع نخدم "

خزر لمعتز ايلي تبسم وجبد الباب وراه وخرج وهو بلع ريقو بشك "كاميليا ...يابنتي شتعمل هوني "

"حسان...سي حسان قصدي قالي ماترجع الا بالورقة مصححة حتى قتلو راك راقد وماتنجمش وقتلو خلي كي تجي للبيرو قالي لا ...بربي صحح "

فمو قعد محلول وهو يرى فيها تمدلو في الورقة وتقول الدار دارها حلت القجر ولوجت ستيلو " فماش ستيلو؟! "

باقي باهت فيلي يرا فيه ، وقت راتو اكاكا شلقت على حالتها ، تبسمت وهي تغطي في حشمتها "انا...سا...سامحني مسيتلك حوايجك "

"شوف بحذا المنڨالة "

ثبتت مالقاتش "مافماش "

وقتها عاد باش فاق بالوضع وبدا يصحصح ،الدار تقلبت وتبدلت جملة ، نظيفة ومنظمة وكل حاجة في البقعة ايلي لازم تكون فيها ، حتى من حوايجو مطبقة و ع الكرسي و شلاكتو تحت فرشو تستنى ،شافتو يدور في راسو ويثبت في الدار ،مشى في مخها يتفقد في الباب والشباك مسكرين و بالفعل كانو مسكرين ، بدا الشيطان يلعب في مها وخافت لا يكون خمم حاجة خايبة خصوصي ايلي هي وحدها معاه ، هو قام ومد يدو وهي وخرت خطوتين بخفة ،هز حاجبو "لاباس؟!"