💚✴حارس روحــي✴💚 ( كرونيك باللهجة التونسية: مكتملة )

❇🌸القسم 7 🌸❇

تخزرلو بعين موش فاهمة عين بريئة ومليانة وجيعة ، العين عبارة مرايا تعكس وجيعة القلب ومعاناتو ، ماحكات حتى كلمة اما عينها مابعدتش عليه ، يحاول يهرب من خزراتها باي حاجة ،مرة يخزر على جنابو مرة يتفقد تاليفونو المهم كل مرة يخلق حاجة يلهي بيها روحو و يتناسى خزرتها .

جاه صوت من بعيد "أمي !...أمي!"

عرف ايلي بنتها جات ، اخيرا جات ،وقف محضر روحو باش يقابلها ...لكن الصدمة كانت قوية عليه وقت شاف كاميليا عمال تزرب وتقرب منهم .

ماينساهاش...اصلا من سابع مستحيل ينساها وهي ايلي رغم شافها مرة برك قعدت في خيالو  ...اما هي  فماركزتش معاه ، مشات طول  لامها و هبطت على ركايبها قدامها  ، خذات يديها  بين كفوفها وكبست عليهم  "أمي ، علاه خرجت مرة اخرى...قتلك استناني تو انا نجيك ونخرجك  "

فرحت بارشا وبدات تضحك و تضغط على صوابع بنتها "ليلي...ليلي جيت ! وين كنت ...خرجت نشري في الخبز...الكوشة مسكرة ...و ..." مدت يدها لجيب سروالها " الفلوس! ...ضاعت .....ضاعت ..وين مشات "

بدات تفركس في جيوبها  تقول ضيعت حاجة غالية موش زوز فرنك  ، شدتلها يديها وخزرت في عينيها " الفلوس هام عندي وتو نشرو مع بعضنا الخبز...ايا قوم ...قوم نروحو وتو في الطريق نتعدو للكوشة "

تبسمت ولمعت عينيها " باهي ...هيا "

كان يتبع فيها حركة حركة، كلماتها و فازاتها الكل مع امها ، حس ايلي قلبو حن عليها وسخفتو ، الوجيعة ايلي راها في عينين امها نفسها سمعها في نبرة صوت بنتها . وقت قومت امها تفكرت ايلي فمة راجل واقف قريب منهم الزوز ..وقتها باش فاقت على وضعها...،نفس الصدمة ايلي تصدمها صارتلها هي اول ماثبتت  فيه ، تفكرتو و  هي زادت مانساتش وجهو  ملي راتو عند زياد
"إ...إنت...! ابراهيم ...قصدي سي ابراهيم "

تبسم كيف عادتو ،تلمس ليناتو كيف كل مرة يكون متوتر "وي..انا هو "

ضغطت كفو ومع ضغطها خضت ضلوعو "م...مرسي علي عملتو مع امي ...بالحق مرسي " فمة بارشا شكر في كلماتها ، عينيها قالتلو ايلي هي ممنونة ليلي عملو من كل قلبها واحساسها وصلو .

"ماعملت شي ...واجبنا ...لحظة نحبسلكم تاكسي "

كان عندو حضور طاغي ،يلهف العقل وبالسيف عليها قعدت تثبت  ...وقفلهم تاكسي وعاونها باش تدخل أمها وتقعدها ع الكرسي ، قبل ما يسكر الباب خزرلها وجات العين في العين...كلام تحكى واحساس تحس نقر قلوبهم ... ،تبسم وسكرو  بالخف وبعد ... مشى التاكسيستي و قعد  هو يتبع فيه بعينيه ، فمة حاجة مايعرفهاش شنية بالضبط ، حاجة خلات قلبو يدق بقوة ، حاجة خلات كل  بدنو بكلو يسخن ويعرق ،حاجة تهزو بعيد ...لكن استحلاها .

✴🌸✴🌸✴🌸✴

يلعب بالمفتاح متاع الكرهبة ،يدور فيه بين صوابعو ويصفر في نغمة ماتدريش عليها شنية ،عرضو واحد شباب ووقف مقابلو " خويا..بربي سامحني تعطيني شعول "