💚✴حارس روحــي✴💚 ( كرونيك باللهجة التونسية: مكتملة )

🌸❇القسم 44 ❇🌸

برنشا البي السي وهو يبربش فيه ووراه وقف كمال   " اه ...تي شنوة عندك قداش تبعول فيه وهو باقي مظلم "

" سي كمال ، ماحبش يتحلي ، يظهرلي مكسر والا مايمشيش اصل "

"شنوة هاذي مكسر " تلفت لشيرين ايلي دخلت بعضها واضطرت تفسرلو  " والله هو نفسو البي سي متاعو ديما يستعملو كان هو "

"يكونش شلق بيك وبدلو !؟ " سألها كمال بشك واضح

" لا لا نتصورش لاخر لحظة ما شكش فيا "

نفخ بقلة صبر وهو يضرب قفا هاك ايلي يبربش  " تي تحرك انت سي وذني ،شوف حل لازم تخلقلي الفيديوات "

★***★

روحت لدارها وهي موش منجمة تسيطر على روحها ، من الاول كان لازم  ماتحس شي ناحية خالد ،لانو عارفة باش تمشي وتخليه ولازم تهز منو ايلي حب عليه كمال  ، اما لقات قلبها يدق ويتعلق بيه  ، اصلا هو فيه كل شي يتحب  ، سمعت الباب ينوقز ، زعمة هذا واحد من رجال كمال  باش يستغلها في حاجة اخرى والا زادا بخصوص ها البي سي المحنون .

كركرت ساقيها للباب وحلتو ..جمدت في بلاصتها "خالد ! شتعمل هوني ؟ كيفاش عرفت الدار "

دز الباب بساقو وعينو ماتنحاتش من عليها ، فيها بارشا لوم وبارشا شك و اهم حاجة الصدمة و الغدرة ايلي ماتوقعهاش منها " يظهرلي نسيت ايلي انا انجم نطلع ايلي حاجتي بيه ومايصعب عليا شي موش كان الادراس زادا  "

بلعت ريقها وهي ترجف من ساقها لراسها ، حست بروحها صفر وتافهة و غدارة ورخيصة وماتسواش فرنك قدامو ،قدم خطوة منها ولانت خزرتو " انا خالد يا شيرين  ..ايه خالد ايلي حبك من غير مقدمات و لا طلب شروط ، عطاك قلبو من غير حساب وماستناش ترجعلو ، انا يا للا ، يا فنانة ، لليوم صدقت الصدفة ايلي جمعتنا ، لليوم كنت نظن انو لقيت المرا ايلي رسمها خيالي ، المرا ايلي نحبها كان هي ونعشقها كان هي الاولى والاخرى ،...غير اي وحدة تراها عيني ، صدقت كل كلمة منك ، ...كل حركة... كل ضحكة وكل شي مثلتو عليا.... ،برافو ....نجمت تغدرني ....،برافو نجمت تخون ثيقتي... ، والله برافو نجمت تعداها عليا وتلعب دورك في المسرحية "

"خالد انا ..."

ماخلاهاش تكمل " مانحبش نسمع ...حتى شي منك "

تبدل وجهو وشافتو واحد اخر غير ايلي استانست بيه، عبد جديد يخوف ورعبها في بلاصتها ، ركز في عينيها وكمل حديثو " البي سي ايلي هزيتو ، مستحيل يتحللكم ، هو مبرمج في صورة ما تسرق والا تبلوكا والا فسد ، كل ايلي فيه يتبعثلي ع الايميل ، ومعادش يتحل عند السارق ، ايلي عملتو مشى خسارة يعني ، اما بالنسبة ليا  فانا الرابح ، انا وبفضل ايلي عملتو عرفت حقيقتك "

"علاش تلوم فيا ، علاش ماتسمعنيش وتفهم السبب ايلي خلاني نعمل اكاكا "

"الفلوس! الشهرة !؟ العيشة الكلاس!؟ تولي فنانة عظيمة ويتبناك كمال  !؟ هاذم حكايات ماتتقارنش بالغدرة والخيانة في حقي "