كانت اتبع فيه تحت حس مس ، مرة تتلهى في الخدمة ايلي عطاهالها و مرة تسرق خزرة ليه ، حس بعينيه تخبلت من البي سي ولى نحى مراياتو وضغط على عينيه ب بصوابعو ،ياسر تاعب الحق ،حل عينو لقاها تخزرلو وعينيها قلوب ، تربثت وقت شلق بيها وماعرفتش اش تقول ...اما نطقت بالحق "...أ ...أول مرة نرى عينيك...بربي شنية لونهم ....تحسهم الالوان الكل ...شهل على زرق على ڨري على شوية كحولية ...خاصة في دوايرها "
"اما عينيك انت واضحة.."تبسم على جنب بطريقة شعلت نارها
"يقولو ايلي العين هي مرايا للقلب...عينيك غامضة كيفك انت "
عقد حواجبو " أبون...هذا رايك فيا "
ضحكت "لا لا...اما نراك ...كاااالم ...و...ماانجمش نعرف حالتك...متغشش والا فرحان...حزين والا لا...هاكي علاه قلت غامض "
تبسم وخزر بعيد للشباك " الدنيا تخليك هكا...مازلت صغرونة ...تو تفهم بارشا حاجات ...كي تكبر"
"مانيش صغرونة " هبطت راسها ورجعت لاوراقها، حس كيف ايلي خذات في خاطرها وايلي ماكارهوش يقول عليها صغيرة " شنوة ...تغششت من كلمة صغرونة"
شاورتلو براسها لا من غير ما تخزرلو " شنوة ذنبي اذا انت كيف اابنوتة ...ماانجمش نتخيلك عزوزة مهما حاولت "
خزرتلو "عزوزة!؟" المرة هاذي تلوم فيه كيفاه كبرها
خرجت منو ضحكة بلا ارادتو ،صغرونة مارضت ...عزوزة مارضت ،وشوشلها" في الحقيقة انت شابة مزيانة ،صغرونة في وجهك وكبيرة في عقلك "
ڨوووووول ، مركى بونتو هايل خلى خدودها يحمارو من الحشمة ، ياسر كلامو في الصميم وفرحها ، خزرت لمراياتو وشجعها كلامو باش تتجرأ و تهزها ،لبستها و ثبتت فيهو " نخزر بيها نرمال...ياخا ناقصة نظر وانا مافيباليش"
"لا ...اما هي موش متاع نظر.."
"اه...برستيج يعني" رجعت شعرها لتالي وعملت في ريشة
مخليتو ماياقفش ع الضحك "...لا للتركيز ...وباش نحمي عينيا ...من البي سي مثلا ...نعدي ساعات في الخدمة لين عينينا تتنقب لذا هاكي باش ما تتضرش"
"يعني ماكش ناقص نظر "
"خايفة نراك فلو "
ضحكت ونحتها ..،رجعتها لبلاصتها اما صوابعها مسو صوابعو من غير قصد...ماصت بكلها ...ورعش من راسو لساقو ،هزت عينها لقاتو مثبت فيها ، وجهو كيوت ع الاخير ، حواجبو نوار ورموشو طوال وعينيه يقتلو ، فمو صغير راسم تبسيمة ،بلعت ريقها بصعوبة ورجعت لاوراقها ...حالتها مفضوووحة اصل .
اما هو قعد يخزرلها ، قرر يملى عينو منها ، لو حد قالو راك باش تجي نهار وتحب وتعشق وتعيش ها الحالة راهو قالو تكذب ، فيقو تاليفونو كي نوقز ...هزت راسها وخزرتلو ...، عرف ايلي ماذبيها تعرف شكون هاكي علاه قعدت مركزة معاه ...اما هو حب يشيخ عليها
"اهلا بيك ........شنوة توحشتني ....ويجي منو انا مانتوحشكش ....غير استناني برك"
أنت تقرأ
💚✴حارس روحــي✴💚 ( كرونيك باللهجة التونسية: مكتملة )
De Todo★الاسم : حارس روحــي ( my soul guardian ) ★النوع : كرونيك ، اجتماعي ، رومنسي ، تشويق ، اثارة ، عائلي ..." ★الكاتبة : ň🅾D🅰 ★عدد الفصول " 46 " ★سنة الانتاج " 2018 " ★القصة " ✴تتعدى سنين على الفراق وماتخلف كان الوحش و الذكريات المنسية 🌸، يرجع بعد مد...
