💚✴حارس روحــي✴💚 ( كرونيك باللهجة التونسية: مكتملة )

🌺✴القسم 8 ✴🌺

ملمومين على طاولة الاجتماعات، كل واحد لاهي في حاجة ، حسان ماد ساقيه على كرسي ويفتوش في التاليفون، اشرف و سمية فارشين اوراق ويثبتو فيهم ، خالد كيف العادة حاشي راسو في البي سي ،كريم يخنتب الله اعلم فاش و كاميليا شادة كتاب في يدها تورق فيه ، دخل زياد كيف عادتو ، الضحكة و المصاصة في فمو
"ايوا ...تقطعت الخدمة معناها باش سيادتكم تتلمو هكا ، يظهرلي لازمني انحيلكم البريمات "

وقفت وفاء مقابلتو " دوسي الطفلة حضر ، تقرير كامل تحب نهبطوه !؟ "

جبد كرسي وقعد " هيه....فاش قام نهبطو عليها و الطفلة توا راهي راكشة مع امها "

دارلو كريم مستغرب  " لقيتوها...قصدي رجعت لدارهم "

ضحك عليه وهو يغمض عينو ويضربو على على رقبتو بخف خفيف " يا طفل وقتاش يسهل ربي وتعمل عقل وتخمم بيه "

عقد  كريم حواجبو وحس بخيبة كبيرة ،رجع لستيلوه واوراقو ،بالنسبة لكاميليا موضوع يهمها بارشا سكرت الكتاب وركزت مع زياد ،وقت شافها مثبتة فيه ومركزة ،تبسم حاس ايلي بينها وبين كريم فمة فرق كبيييير في الفهم وفي الذكاء"تحب تقول حاجة ...كا...ميليا !؟"

حروفها اسمها  قالهم مفرقين وهو يذبل في عينيه بتبزنيس يعيط يا بابا يا امي ..
سؤالو فاجأها تربثت وهي ترا فيهم الكل يخزرولها ، تحطت قدام ااامر الواقع ولازم تفرغ شكارتها " يعني...المرا...كانت تكذب علينا وفي بالها بالبراكاج ايلي باش يصيرنا ...حكاية اعلان الضياع كان لعبة باش احنا نمشولها "

تبسم حسان وحط تاليفونو في جيبو ...وزياد خزرلو وهو هاز حواجبو ...لقطتها المعلمة

كريم " وعلاه تعمل هكا "

اشرف " تحمي في حد قريب كيما خممت كاميليا "

زياد " بالضبط....تحمي في بنتها منين وعلاش ؟ هذا ايلي لازم نوصلولو "

وقف وهو يحط المصاصة مرة اخرى في فمو "  لين نلقاو بروفة علي قاعد يصير بالضبط ....باش نسكرو ها الحكاية وتوا اتلهاو  في خدمتكم...فمة بارشا حاجات نحكو عليها ...مثلا جريمة امس....الراجل ايلي قتل مرتو ..ماذبيا تركزولي مليح في الحكاية...حسان ... وقيت باش كريم يقوي قلبو "

بلع كريم ريقو مفجوع  " جريمة !؟ باش تهزوني لجريمة....قصدي لبلاصة الجريمة !؟؟"

ضربو حسان على رقبتو بخف جديد  " الجريمة صارت ساياي توا"

تنفس براحة الحمد الله سلكها...مال عليه حسان وهو يوشوشلو  " اما باش نمشو نشوفو الجثة في التشريح "

لخلخ بكلو  الكازي ووجهو ولى اصفر وشفايفو رعشو بخوف  ، بالمقابل حسان يضحك ضحك شماتة و متشفي فيه

كاميليا وهي تحط كتاباها في صاكها  " وانا ؟ شنمشي معاكم !؟"

كتف حسان ذراعاتو وخزرلها  " لازم تمشي"

شاف الفرحة في عينيها و نشاطها وقت سمعت ايلي ماشية معاهم ، سكرت صاكها وعينين حسان عليها ، فيها حاجة تجبدو ليها، حاجة كل ما يراها يوجعو معاها قلبو اما تفرحو  فرد وقت ، في بالو  كان بدنو يخدم و من سنين قلبو مات ، اما مع ها الطفلة بدات حاجات تتبدل .