الوجيعة المرة هاذي زادت ، اصلا مانجمش يركز جملة ،اشرف ايلي كان معاه وقتها عرفو طول " زياد...قوم نروح بيك "
"لا لا ...قلي وين وصلتو في التقرير على الاسوام "
"زياد..هكا راو موش باش نجم تكمل "
"اشرف قتلك لاباس"
دخلت سمية فرندسي " ماكش لاباس " حطتلو الدواء بعنطزة " تحرك اشرب "
هز حاجبو "تحرك!؟ شكون عرف شكون بربي"
ضيقت عينها وهي تحط يديها ع البيرو وتميل ناحيتو " باش تشرب والا لا "
"الله يبارك " خذا الحربوشة وشربها " وتوا مريڨلين ...نرجعو وين كنا "
جبدتو سمية وقفتو " قوم روح"
اشرف" زياد....اخطانا من الفذلكة...بدنك مايتحملش هذا الكل تنساش الاكسيدون مازالت مابريتش منو "
زياد " قلي تحبو تتخلصو مني لواه ، تكونوش معملين تعملو انقلاب عليا ...اه اشرف نعرفك حاط عينك على البيرو هذا " حط يدو على معدتو مرة اخرى ، ياسر توجع ومعادش ينجم يقاوم
سمية وهي خايفة عليه " زياااااد !"
"باهي باهي باهي" شاورلهم بكفو
عاونو اشرف باش يخرج " خليني نوصلك للدار "
"هيه هيه ...والبيرو شكون بيه...ع الاقل يغيب الشاف يقعد ايلي ينوبو ...تو نروح وحدي"
سمية " شتنجم تسوق في ها الحالة ؟!"
غمزها" شقولك انت ..."
خلاهم وخرج ،وقبل مايفوت الباب تلفت لحسان " سايس عليهم بربي "
خالد وهو يخبي وجهو وراء الايكرون " ماتوصي يتيم على نواح " همزتو وفاء وهي تضحك لانو عارفة حسان ماهوش باش يسمع كلام الشاف...كيف العادة ...و يخرج منهم الزيت
ركب في الكرهبة ،الوجيعة زادت على الاخير ،اش صار باش يجرا فيه هكا ، لا الحربوشة نفعت ولا صبرو نفع، حاول يوصل للدار فيسع باش يتمد ع الاقل وياخو حربوشة نوم يرقد و ينسى معاها الوجيعة كيف مايعمل كل مرة ، الدرجات زادو قلقوه ،كل مايطلع درجة تقول يعفس على جروحو ،تقطع بيه النفس ومعادش منجم يكمل وقف لحظة يتنفس ويدو مازالت على معدتو .
"زياااد "
تلفت يلقى معتز واقف يخزرلو وموش فاهم "شبيك لاباس"
تبسم ونحى يدو على معدتو " لاباس...ياخا موش قلت ماشي للفاك..."
"شنوة يوجع فيك "
"اه...تي حكاية فارغة شوية وجايع في المعدة يظهرلي لبارح في العشاء كليت بارشا"
مد يدو وراء ظهرو و حطلو ذراعو على رقبتو "هيا اطلع لبيتك "
"لبيتي !" حل فمو ماسكرو ..يا لوكان يطل على دارو الا ما يخرج مهبول
أنت تقرأ
💚✴حارس روحــي✴💚 ( كرونيك باللهجة التونسية: مكتملة )
De Todo★الاسم : حارس روحــي ( my soul guardian ) ★النوع : كرونيك ، اجتماعي ، رومنسي ، تشويق ، اثارة ، عائلي ..." ★الكاتبة : ň🅾D🅰 ★عدد الفصول " 46 " ★سنة الانتاج " 2018 " ★القصة " ✴تتعدى سنين على الفراق وماتخلف كان الوحش و الذكريات المنسية 🌸، يرجع بعد مد...
