تمشي مع وفاء وماسكتتش جملة "يابنتي راشق عينو فيها ما سيبهاش ، بصراحة اول مرة نشوف خالد مركز اكاكا يظهرلي حصل في المنداف عرفتها اك الفازة ايلي يقولو عليها حب من اول نظرة هي بيدها ، الطفل يخزرلها و في عالم اخر ، ولى يدندن معاها ويصفق كي المهبول ولاااا مشالها بعد ما كملت غنت و يعمل معاها في السلفي ويعاود تقول ستار رقم واحد في تونس "
وفاء" هههه يا والله حال على خلودة مالا الطفلة هزتلو عقلو "
سمية "قول ايلي قعدلو من العقل "
وفاء"واحنا نقولو وينو وعلاه ماحضرش معانا "
كملت كلمتها ووقفت طول على بلاصتها ، تحس ساقيها هي ايلي ما حبتهاش تمشي خطوة اخرى .
"وفاء!"
خزرت سمية لصاحب الصوت وايلي واقف بعيد عليهم خطوات ومقابلهم ، راجل يا في اخر العشرينات يا في اول التلاثين ، شعرو نوار و طولو متوسط عينيه نوار ومرشوقين في وفاء ...صارلو كيف ماصارلها متمسمر فرد بلاصة من الاول ، من بعد كسب شوية قوة وجرأة وقدم منهم ، مد يدو لوفاء وهو مازال مصدوم والا خلينا نقولو موش مصدق "وفاء! مانيش نحلم موش هكا "
"ناظم ! ...لا...لاباس عليك "
"لاباس...شوف الصدفة...شنوة تعمل هوني "
خزرت لسمية و دخلت بعضها ماعرفتش اش تقول ،اما هو فهم على اساس ماتحبش تحكي " اه...سامحني ...الحق قعدت متشكك من بعيد انت والا لا ...وكي عرفتك ماانجمتش مانسلمش عليك "
تبسمت برقة " ياسر متبدل "
" وانت زادا ...ضعفت بارشا "
تفكرو ايلي معاهم وحدة اخرى مدلها يدو لسمية وبكل جونتياس قدم روحو " اه سامحني...انا ناظم ...معرفة قديمة لوفاء"
"نتشرفو ...اه وفاء انا هاني سبقتك اوكي "
وجها حمار و حست روحها باش تدوخ ، علاش عملت فيها اكاكا سمية ... ، تلفتت لناظم وتبسمت تبسيمة صفراء فيها خوف و قلق وهو عرض عليها
"انجمو ...نقعدو ونحكاو ...ماتفهمنيش بالغالط ...اما ماانجمش نراك ومانحكيش معاك "
وقت شافها ساكتة ومترددة وموش عارفة شنوة تجاوبو تنهد و حب يكرم لحيتو بيدو " عموما ..فرحان بارشا كي ريتك بعد ها السنين "
شافتو مكسور الخاطر و حزين وموش منجم يمشي ويخليها " تحب نشربو قهوة "
ضحك وجهو ونور " طابع ونص سكر !"
ضحكت " والباقي يتڨرمش ههه "
"مازلت تتفكرها "
"كيفك انت زاداا مانسيتهاش "
❇🌸❇🌸❇🌸❇
يحرك في القهوة يذوب في السكر و فمو ما نجمش ياقف من التبسيم ، ساعات يخزرلها و تجي العين في العين يدخل بعضو .
"شنوة تعمل توا !؟" قالوها مع بعضهم فرد وقت ،اطرشقو بعدها بالضحك
"اسألي انت قبل !؟"
أنت تقرأ
💚✴حارس روحــي✴💚 ( كرونيك باللهجة التونسية: مكتملة )
Casuale★الاسم : حارس روحــي ( my soul guardian ) ★النوع : كرونيك ، اجتماعي ، رومنسي ، تشويق ، اثارة ، عائلي ..." ★الكاتبة : ň🅾D🅰 ★عدد الفصول " 46 " ★سنة الانتاج " 2018 " ★القصة " ✴تتعدى سنين على الفراق وماتخلف كان الوحش و الذكريات المنسية 🌸، يرجع بعد مد...
