💚✴حارس روحــي✴💚 ( كرونيك باللهجة التونسية: مكتملة )

🌸❇القسم 45 : قبل الاخير ❇🌸

الطريق خلاه يضيع ساعة غير ربع ، وربع الساعة الباقية ضاعت وهو يلوج وين كمال هذا ، قالو ايجاني للاوتيل وماقالوش وين بالضبط ، قعد تايه يخزر يمين ويسار لعل يشوف حد من رجالو يهزو وين البلاصة ايلي فيها صاحبو ، نسى جرح عمليتو ونسى حتى وجايعو ، دار ع الجهات الكل ، تفقد الوقت لقى الساعة تعدت ، النومرو ايلي كلمو بيه اخر مرة مايمشيش ، شنوة ها اللعبة ايلي يلعب فيها كمال .

حط يدو على راسو  وهو يتلفت على جنابو كي المجنون ،  جات عينو على زوز رجال يتبعو فيه وراشقين عينيهم فيه ، باز هاذم جماعتو ، طول مشالهم وقت شافوه قاصدهم تحركو ، خلوه يتبعهم لين وصلو وراء الرستورون الجديد ، فم تحل باب مخزن كبير ، على اول خطوة ليه لداخل ، جاتو ضربة على راسو دوختو طول .

وقت فاق مايعرفش قداش تعدى من الوقت وهو دايخ ، لقى روحو مربوط لعرصة من يديه وساقيه ، لوج بعينيه على معتز مالقاهوش ، اكيد قتلوه "يا كلاااااب ، وينو معتز ، شنوة عملتو فيه "

جاتو ضربة على معدتو وين الجرح خلاتو يتلوى اما ماسكتتهوش" وينووووو ..."

جات عينو على كمال  واقف ومعاه واحد يفتوش في بي سي
"سي كمال  ، هوما بيدهم الفيديوات والتقارير ايلي حاجتنا بيهم  "

ضحك كمال   ولمعت عينو وقدم خطوتين ناحية زياد " سامحنا عاد فركسناك جيوبك وانت دايخ ، ولقينا ايلي حاجتنا بيه "

" كي لقيت ايلي حاجتك بيه ، سيب معتز "

قهقه بصوت عالي متاع انسان متكبر " هاتولو معتز متاعو "

شاور بيدو لزوز رجال خرجو .. قعد يستنى فيهم يظهرو ، مركز عينو  على منين مشاو ، تقول دهر تعدى وهو يستنى يراه ، يدعي من قلبو يكون مازال عايش ، والحمد الله مازال عايش ، اما وقت دخلو بيه كان في حالة ،ضاربينو بقوة كبيرة ، حوايجو ووجهو ويديه بالدم ، جابوه بجنبو ورمو بحذاه ،تململ يحب يسيب يديه " علاش عملت فيه هكا تفاهمنا ماتعملو شي"

"شنوة شنوة !؟ انا كمااال ايلي يقلك ..نتفاهم مع واحد مڨمل كيفك انت ... لا عاد على الدنيا السلام " تبدل وجهو من الضحك للجدية " عقلك وين وقت حليت دوسي وسميتو كمال  ، حبيت تفضحني وتلعب بسمعتي نبهتك اكثر من مرة اما انت صححت راسك وعمال اتبع وتبتبت وتجري باش تدخلني للحبس ، تستخايل هذا باش يتعدى بلاش"

خزر زياد لمعتز ايلي طايح لوطة وهو يحاول ياقف على ساقيه " معتز !؟ اتحمل شوية ، تو نخرجو من هوني"

قهقه كمال "   قالك باش يخرجو.. ، موش يقولو كي دخول الحمام كي خروجو هو ، " ضحكة شر ظهرت اكثر وهو يڨحرلو " انت حفرت قبرك بيدك ...يا زياد"

❇❇❇🌺🌺🌺❇❇❇

مع وصولهم للاوتيل ماعرفوش وين ولا شنوة يعملو ، متأكدين ايلي زياد جاء لفم اما وينو هو  بالضبط هاذي ايلي مايعرفوهاش
خزر حسان لاشرف " شنوة باش نعملو توا !؟ "