💚✴حارس روحــي✴💚 ( كرونيك باللهجة التونسية: مكتملة )

🌺✴القسم 26 ✴🌺

واقفة بين وفاء و سمية حاسة روحها منبوذة وناقصة بالنسبة ليهم ، هوما بنات نظاف وهي مسخة ، خذات لنجات من عندهم ومسحت المكياج على وجها بيدين يرعشو ووفاء سخفت عليها وحاولت تهديها
" هدي روحك كل شي صفا توا ...ارتاح "

مدتلها سمية قطعة من دبشها " خوذ هاذي جيلاي طويلة لف بيها روحك الطقس بارد "

قصدها تعاونها تغطي روحها من الروبة ايلي لبسوهالها بالسيف ..بجنبهم حسان يدادي بلا عقل  " انا ماانجمش نقعد نتفرج ..باش نرجع للاوتيل "

زياد " وانا جاي معاك ، مانخلوهاش وحدها "

سمية وهي تاقف قدام زياد  " ياخا بجدكم ، اكيد توا عرفو شكون احنا بالضبط ، باش تمشيلهم بساقيك"

زياد " مالا تحبني نقعد مكتف يديا وواقف هوني نستنى فيها ....كاميليا توا وحدها غادي الله اعلم شنوة صاير معاها"

تخيلت انو يعمل في هذا الكل على خاطرها هي بالذات موش على خاطر وحدة من الڨروب ، سكتت وطلعت في الكرهبة بلا ما تحكي كلمة اخرى اصلا زايد تناقشو طبيعتو وتعرفها  سمعتو وهو يوصي البقية قبل ما يشد ثنيتو راجع " اشرف وكريم وخالد ...اقعدو مع البنات انا وحسان راجعين للاوتيل "

           ★***★

بالنسبة لكاميليا اول حاجة عملتها هي الخروج من الاوتيل فيسع.. مالازمش توخر ، هوما كشفوهم وكشفو وين يحبو يوصلو اذا طاحت بين يديهم الله اعلم شنوة يصير فيها وزيد وصلها مساج من حسان "اخرج فيسع ، خلي كل شي واخرج نستناووك وين الكيوسك "

جرات بايلي تنجم باش تبعد ، لوجت بعينيها تاكسي مالقاتش ، خزرت وراها للسوجيغارد ايلي شاك فيها و يحكي في الانترفون اكيد راهو  يقلهم هاهي الطفلة ايلي تلوجو عليها و شوي اخر يشدوها ، شنوة باش تعمل توا ، ماعندها حتى حل غير تكمل تجري واكاهاو ....وقف قدامها موتور مولاه لابس كاسكة كحلاء مانجمت ترا منو كان عينيه  خزرلها وشاورلها براسو تطلع وراه ...شعندها تعمل قدام ااوضعية غير انها تطاوعو حتى لو كان بليس المهم تهرب من فم... ، شدت في ذراعو و ركبت وراها ، عدات يدها على وسطو و كبشت فيه حطت راسها على ظهرو وهو فتس بيها ..ضربتها نسمة الليل على وجها ، حست ببرودة في خدودها ، قلبها يضرب في الماية ، ممكن من الخوف ومن ايلي عملتو ، ماتخيلتش نهار تكون عندها الجرأة هاكي ، ليوم هو يوم السعد الثاني متاعها زهرت معاها لداخل وقت ادخل ناظم وتوا زهرت معاها مرة اخرى كي ظهر مولى الكاسك ، من الاول تخيلتو زياد اما  ضربتها البهتة ودخلت بعضها وقت وقف بيها وشافت حسان وزياد واقفين بعيد عليها شوية... وهو دور موتورو و رجع ، غاب في الظلام وماتعرفش وين مشى ، قاعدة مستغربة وموش فاهمة ، جرالها زياد ملهوف " كاميليا يا مجنونة ....شنوة ايلي عملتو "

مازالت موش منجمة ترجع لحالتها الطبيعية...تلز حسان يرجها  " كاميليا....اخر مرة نخليك تعمل هكا فهمت ماهو "