دخلت لقهوة تزرب ،لوجت بعينيها عليه ,شافتو يهز يدو يشاورها باش ماتقعدش تتبهلل ،تبسمت ومشاتلو على اول خلوطها وقف مدلها يدو "بونصواغ "
"بونصواااغ ...وخرت عليك " سلمت عليه وقعدت
"لا لا ..مازلت كي جيت انا بيدي" في هاذي كذب ضرب قريب الساعة يستنى فيها تقول عيد ، ثبتت في وجهو ،يبان صغرون وبريء بارشا ، واهم حاجة كاااالم ورزين ،تبسيمة مالية فمو ...بما انو ساكت بدات هي الحديث " البلاصة ياسر مااحلاها ،ترتح المخ "
"انا قلت هوني نتلاقاو كل مايبدا عندنا خدمة ...بعيدة ع الحس والجوجمة ،نخدمو في راحتنا ،شقولك "
كل شي فيها كان فرحان ،وجها ،عينيها ،تي حتى من يديها ماركحتش اصل "وي فكرة حلوة "
ضحكت وخبات وجها وهو سألها من بين رنة ضحتكو " شفمة .."
"اول مرة نحس روحي مزهارة"
"كيفاش"
"امي في المدة الاخرى خير ببارشا، انا وزياد متفاهمين بارشا في الخدمة... قصدي سي زياد...عندي مشكلة كبيرة في السين ...امممم...وزيد اخر مرة كنت نخدم في رستو و بطلت ...وانت جيت وعطيتني الاوفر هاذي...وانا فرحانة ع الاخير "
تبسم لفرحتها ...ياااسر فرحانة ، وقلبو معاها فرح ، في الواقع هو ماكانش مستحق لا حد يعاونو لا يريڨلو اومورو ، اما يعرف قداش هي محتاجة فلوس ، و قداش عندها خشم وكرامة وماتقبلش اي فرنك يجي اكاكا ، لذا خمم انو تخدم معاه ، باش يزيد يراها ويقرب منها ، لانو قربها منو حاجة تخليه فرحان وطاير في السماء
"ايه...وشنوة باش نخدم ...قتلي كيف السكريتار ...ياخا ماتخافش نبلبز في الخدمة ..وانت بروف جامعي كل شي بحسابو "
ضحك هاك الضحكة ايلي تسحرها " انا عندي فيك ثقة ..وزيد زياد يشكر في الذكاء متاعك "
ضحكت ولمعت عينيها ،حس بقلبو يفرفرط بين ضلوعو ، قداش مااحلاها ، وقداش أثرت فيه ، لها الدرجة تعلق بيها ،وشوفتها تعمل فيه هكا
فيقتو وقت حست بيه ساهي " سي ابراااااهيم ..."
عقد حواجبو "موش قلت عندك مشكلة في السين!... خلينا مالا بلا مشاكل..ابراهيم حاف تكفي"
حمارو خدودها من الحشمة،ديما فاضحتها ها السين المحنونة " حبيت نسألك سؤال ...من مدة نحب نسألو "
"ان شاء الله خير "
"انت و..سي زياد...تعرفو بعضكم من قبل ...خاطر ياسر قراب وكيف ايلي عشرة "
هز حاجبو ،في الواقع ماكانش مستنى سؤال يخص زياد " وانت تسأل خاطر تحب تعرف والا خاطر واحد فينا الزوز يعنيك "
ضربة قاضية ها السؤال ، لمحلها اكثر من اللازم هكا قالو عقلو ، دخلت بعضها بالسؤال " لا..اما...يعني ...انا .."
أنت تقرأ
💚✴حارس روحــي✴💚 ( كرونيك باللهجة التونسية: مكتملة )
Random★الاسم : حارس روحــي ( my soul guardian ) ★النوع : كرونيك ، اجتماعي ، رومنسي ، تشويق ، اثارة ، عائلي ..." ★الكاتبة : ň🅾D🅰 ★عدد الفصول " 46 " ★سنة الانتاج " 2018 " ★القصة " ✴تتعدى سنين على الفراق وماتخلف كان الوحش و الذكريات المنسية 🌸، يرجع بعد مد...
