دجى الليل الجزء الثاني - عتمة الزينة كاملة

۱۸

معلومة توضيحية على الماشي قبل البارت..

هو سليم عاش في ايه؟!

أب وأمين زي الفل! جدة عسلية! عمة مسخرة زي شاهي! عم هلاس زي زياد ده يوم ما بيشوفه أصلاً! ضحك وهزار وصحوبية؟ وهديل حتى مكنتش تقدر تيجي جنبه لأنها لو زعلته بدر هياكلها!! يمكن الحاجة الوحيدة الصعبة في حياته هو موت ليلى أمه اللي كانت أصلاً مهيئاه ليه!! لكن سليم مشفش صعوبات بجد.. لا عاش زي بدر.. وأكيد حياته غير حياة شهاب اللي الكل ابتدى ياخد باله انها صعبة!

مينفعش شخصية زي سليم تتقارن بشخصية زي شهاب في نواحي كتيرة.. هو لغاية دلوقتي آه شوفنا شوية من ذكاء شهاب وطريقته وخططه ومؤامراته بس لسه سليم مشوفنالوش ده..

وبدر بقا كان مريض مؤامرات وفاكر الكون كله متآمر عليه وعلى عيلته، فكان بيحسبها كويس اوي، وشاف العذاب الوان على ايد أبوه عذاب وعنف جسدي ومن معاملة أمه ليه اللي عذبته عذاب نفسي، إنما سليم طالع لقا صاحبه بدر بيحب مامته الصغنونة اللي مقضياها هزار وضحك معاه والاتنين بيروحوا يزوروا أمه.. هيطلع بيفكر زي بدر ازاي..

وسليم مش مثالي.. سليم متربي تربية نضيفة وفيها حاجات كتيرة صح.. عشان كده طالع إنسان طبيعي!! وبدر كان بيتعالج أصلاً وده لسه داخل في حياته فكان فيه دعم كبير من كذا ناحية خليته يربي سليم صح.. بس بيتعصب، وبيتنرفز.. ومقضيها رسميات سخيفة في الشغل.. واتشد لزينة اوي ومش عارف يتحكم في نفسه قدامها وبيحب ياخد الحاجة على الهادي ولغاية دلوقتي مقلهاش بحبك ولا عرض عليها جواز ولا خطوبة حتى!

وتعاطفه مع مرض ليلى من وهو صغير خلاه حنين زيادة عن اللزوم.

- أرجوكم متستعجلوش معرفة حاجة عن شهاب.. شكراً..

ندخل بقا على الفصل..

تم النشر بتاريخ ١١ فبراير ٢٠٢٠

الفصل الثامن عشر

دلفت المنزل بهدوء وبداخلها تتمنى ألا يلاحظها أحد ولكنها وجدت إياد ينتظرها وما إن تلاقت أعينهما حتى أشار بسبابته على شفتاه حتى لا تحدث صوتاً ليتوجه نحوها وأشار لها بعينيه أن يصعدا فأومأت له بالموافقة وتوجها سوياً للأعلى ..

"ازاي يا زينة تتأخري لغاية دلوقتي؟! وبعدين يا حبيبتي انتي مع ناس منعرفهومش مهماً كانت صلة القرابة اللي ما بيننا بس لسه يعني مش قريبين منهم اوي" تحدث لها أخيها بهدوء دون نبرة منفعلة ما إن دلفا غرفتها

"معلش يا إياد الوقت اخدنا وكمان هما بيتهم بعيد يعني على ما جيت أنا وشهاب وكده اخدنا وقت"

"وبعدين عاصم الحيوان ده ازاي يسبك كده لوحدك معاه؟" احتدت نبرته خوفاً عليها

"بيقول حادثة حصلت لواحد صاحبه وشهاب كويس انه وصلني.. بعد ما سليم وأروى سافروا فجأة"