دجى الليل الجزء الثاني - عتمة الزينة كاملة

مناقشة*

حبايبي الحلوين عاملين ايه؟!

أنا بجد نفسي أكتب وأنشر كل يوم بس فعلاً مش لاقية وقت وبحاول أكتب على قد ما أقدر.. وهحاول انشر الأسبوع ده جزء او اتنين!!

دلوقتي فيه كذا نقطة محتاجة اتكلم فيها .. 

1 - سكوت سليم على سادية شهاب!!

- مينفعش يتكلم لأكتر من سبب!! 

أولاً: الكل هيقول عرفت منين.. ومثلاً شوية نخربه الكل هيعرف إنها ميرال.. فبكده هيكون بيفضحها، ومش سليم اللي يفضح حد!

ثانياً: ممكن بكل بساطة لو الموضوع اتعرف الكلام يوصل لشهاب، ساعتها هيروح يسوح ميرال، فكده مش هيكون فضحها وبس، لأ ده بيأذيها كمان وبيأذي أهلها وممكن شهاب ينفذ تهديده ليها (وده اللي بيفكر فيه سليم لأنه مش مستبعد إن اللي يعمل حاجة حقيرة زي دي، ممكن يعمل الأسوأ)!!

ثالثاً: لو واجه شهاب هيقوله اثبت لو تعرف، غير انه مخبي نفسه بصورة نضيفة اوي هو وباباه + الموضوعين اللي فوق هيتحققوا!! 

رابعاً: بإفتراض يعني أنه اتكلم وقال وشهاب رفض الموضوع واثبت انه معملش كده، كله هيشاور على سليم وهيقول انه غيران أو ش عايز شهاب ما بينهم لسبب غير معروف..

خامساً: مقالش لبدر ليه!! بدر بمنتهى البساطة لو عرف عصبيته هتبقى هباب، يا اما هياخد الموضوع بهزار ويفتكره غيران من ساعة حوار زينة، وبردو هيفضل ورا سليم لغاية ما يعرف اللي حصل لميرال بإعتبار إنه صدقه، يبقا تاني كده بيفضحها قدام الناس، وبدر شايفها بنت كويسة ويعرف أهلها.. غير إن سليم بيحب يتحمل المسئولية، اه بيفضفض لباباه ومصاحبه بس مش بيروح يقوله اعمل ايه واتصرف ازاي!

سادساً: عامل الوقت، يادوب رجع من عند زينة.. تاني يوم قابل ميرال، آخر الأسبوع لقا أروى جاياله بشهاب وبتحطه قدام الأمر الواقع، وفي نفس اليوم (اللي هو تاني يوم) اللي زينة رجعت فيه كانوا بيمضوا العقود!

2 - حياة شهاب وماضيه وليه بيكرههم، وحصله ايه، وليه هو بيعمل كل ده وليه عايز يخلص من وليد .. كل الأسباب دي هنعرفها بالتفصيل الممل.. متستعجلوش ارجوكم .. شهاب مش عنده عقدة واحدة بس ولا حصله موقف واحد بس.. شهاب مكلكع اوي!!

3 - فيه حد قاللي إن المونولوج واخد حيز كبير من الرواية .. 

- كلامها صح جداً لأكتر من سبب.. زينة مش بتفضفض لحد غير مذكراتها، وحالتها النفسية أظن هباب.. فهتتكلم ازاي بسهولة غير كده؟!

شهاب أصلاً قليل الكلام ودماغه مش بتنام، يبقى هيتكلم ازاي كتير؟!

أروى موراهاش حاجة غير التفكير والخطط الزبالة!! شيء طبيعي اوي إن يكون المونولوج واخد حيز أكبر من الحوار!

لكن لو بصينا لشخصيات زي (سليم - بدر - نورسين) الناس دي معندهاش مشاكل فبيتكلموا بسهولة واغلب حوار الرواية معاهم وأظن لما زينة ابتدت تتحسن على ايد سليم سمعنا حسها ولقيناها بتعرف تهزر اهو!

4 - سلمى وشهاب!! مش قصة حب خالص ومتستنوش منها حاجة!! سلمى مجرد مسكن قوي المفعول لشهاب، لا أكثر ولا أقل!

5 - أروى من النوع اللي بيحبه شهاب!! ستين غلطان اللي فاكر كده.. وهنعرف ليه بيكره النوع ده بالذات قدام!

6 - وربنا وربنا وربنا كمان مرة شهاب مش غبي.. اه سادي وشرير وحقود بس مش غبي علشان يمارس ساديته على زينة أو أروى!! لو اتهور وعمل كده ممكن باباه يعرف بسهولة.. هيتفضح قدام عيلة الخولي والك هيبصله أنه حقير.. مش بعيد أصلاً سليم يمسكها عليه ذلة ويهدده بده! فلو حصل وعمل حاجة سواء مع زينة أو أروى هيبقا فيه حتة منه وصلت خلاص إنه مبقاش باقي على أي حاجة!

7 - يا جماعة استهدوا بالله وفكروا كويس.. أروى متنفعش شهاب خالص في اللي عايز يوصله.. واحدة زيها يا إما هتستغله وتتعلق بيه وبفلوسه، يا إما هتطلع من وراه بمصلحة، يا إما هتوجع دماغه وتقوله أنت عايز تعرف ليه.. مفيش غير زينة هي اللي هتستقبل منه لو عاملها بهدوء ومَثل عليها كويس!! مفيش حل تاني قدامه غير كده! 

8 - شهاب مبيحبش غير ابوه لغاية دلوقتي في الرواية دي كلها وبيحترمه وبيسمع كلامه وفعلاً عايز يعرف مكان عمه فين علشان خاطره.

9 - سليم ميعرفش إن بدر كان سادي.. محدش بقا يقولي لو قال لبدر أكتر واحد هيعرف يتصرف! هو معندوش فكرة إن بابي كان كده.. 😂 😂 😂

10 - السرد والوصف كتير.. اه كتير.. وفيه حاجات مش هتبان غير بيهم.. بحاول ازود الحوار وهو كده كده الفترة الجاية في الرواية هيزيد بس مش هقدر استغني عن الوصف والسرد بصراحة..

ومعلش عارفة إن كل الأجزاء دي مجرد مقدمة للي جاي.. الأحداث هتبدأ خلاص تحصل.. بس فيه شخصيات كتيرة اوي في الرواية دي لدرجة إني حاسة إني مقصرة مع شخصيات معينة..

عايزاكم تسألوني بقا أي أسئلة تحبوها.. وتتناقشوا معايا في أي حاجة أنتو عايزنها في الرواية..