دجى الليل الجزء الثاني - عتمة الزينة كاملة

۳٧

تم النشر على موقع واتباد بتاريخ ٢٢ - أبريل ٢٠٢٠

الفصل السابع والثلاثون

"بدر بيه.. أنا فهمتها إنها متتكلمش خالص غير لما أكون معاها.. وهي فعلاً مش عارفة أي حاجة.. بس انا لما روحت ساعة ما كلمتني عرفت إن البلاغ واضح وجي بإتهام صريح للشركة نفسها وإن أنتو اللي ليكو المسئولية التامة في المخازن اللي كان موجود فيها شحنة الأسلحة، ومتقدم كل الإثباتات اللي بتقول إن المُهندسة زينة هي اللي مسئولة عن المواقع وهي اللي مستلماها وده بيفيد إنها تحت مسئوليتها.. للأسف مش هنعرف ننفي التهمة عنها غير بعد تحقيقات طويلة وإثباتات هي كانت فين وقتها.. وهل كانت بتزور الموقع ولا لأ، ونثبت سفرها وكل التفاصيل دي هتاخد وقت" 

سمع سليم تلك الكلمات التي خرجت من فم المحامي لينظر في ساعته ليرى أنه قد مر ساعتان منذ  أن تركت زينة المنزل وغضبه أخذ يتعالى لدرجة أن بدر الدين لم يراه من قبل بمثل تلك الهيئة التي عليها الآن وهو يجوب حولهما يتلك الخطوات الهوجاء..

"معرفتش مين اللي بلغ البلاغ ده؟" سأله بدر الدين 

"للأسف اتقيد ضد مجهول" اجابه المحامي بنبرة اتضح بها خيبة الأمل

"طيب والحل؟!" سأله بدر الدين 

"لسه هنروح ونشوف القضية و.."

"لا مفيش قضية.. الليلادي زينة هتروح ومش هتبات في القسم" صاح سليم مقاطعاً اياه 

"اهدى بس يا سليم لغاية ما نشوف الـ.."

"مش هاهدى.. عايزني اسيبها يا بابا تتسجن؟" نظر له بخوف بعد أن قاطعه وقد شعر بدر الدين بالآسى على حاله وفي نفس الوقت شعر بتلك الورطة التي وقعت بها زينة والخوف الشديد عليها 

"طيب على الأقل يومين لغاية ما نثبت إنها مالهاش علاقة بالمواقع.. أو مش بتشرف عليها.. صعب نخرجها من قضية زي دي بكفالة أو حتى بمنع من السفر" ساد الصمت بينما عقد سليم حاجباه وكأنما وجد الحل

"لأ مش يومين.. دلوقتي حالاً!!! زينة مبتشتغلش في الشركة" همس لينظر له بدر الدين في تعجب بينما نظر له المحامي بإهتمام 

"فيه حاجة تثبت انها مبتشتغلش في الشركة؟!" 

"آه فيه.." صاح ثم تركهم ليتوجه للخارج ليُعد الأوراق اللازمة بمكتب بدر الدين بينما أخرج هاتفه ليجري إتصالاً هاتفياً عله يستطيع أن يُفيدهم! فهو على إستعداد تام أن يطرق كل الأبواب ليجد ولو بصيصاً من أمل لينقذ زينة من ذلك المأزق حتى ولو كان الثمن أن يتحمل هو كل شيء..

❈-❈-❈

"أنت قولتله ايه بالظبط؟" صاحت أروى بعصبية بعد أن تمالكت نفسها بصعوبة وهي تحاول أن تُقنع نفسها بأن كل شيء سيكون على ما يُرام مع سليم ولكنها عليها أولاً أن تفهم بم أخبره شهاب لتستطيع حل كل شيء حتى ولو بخطة جديدة أخرى