دجى الليل الجزء الثاني - عتمة الزينة كاملة

۲۲

أولاً وحشتوني جداً

ثانياً.. مش معنى اني بنشر على المدونة يبقا خلاص هبطل انشر على واتباد، انا بنشر على المدونة الجزء وبعدها ب ٢٤ ساعة بنشره على الوتباد

ثالثاً هحاول بكرة ان شاء الله انشر فصل كمان على المدونة

رابعاً انا اسفة لكل اللي بيسأل على مواعيد ثابته للرواية بس فعلاً انا مش عارفة احدد مواعيد خالص

ندخل بقا على الفصل

تم النشر بتاريخ ٢٢ - ٣ - ٢٠٢٠

الفصل الثاني والعشرون

دلف بأنفاس متسارعة وملامح الغضب التى رآها الجميع طاغية على وجهه كادت أن تحرقهم بأكملهم ولأول مرة يراه إياد بمثل ذلك الغضب وكذلك أروى وشاهندة مثلهما هي الأخرى شعرت بالدهشة فهذا ليس سليم الذي تعتاده العائلة أمّا عن هديل فسرعان ما التحفت بالتحفز الشديد واستعدت لذلك العراك القريب ونظرت له لتبادله نظراته الغاضبة بنظرات عدم إكتراث وغضب مثله!!

"سليم يا حبيبي أنـ.." حاولت شاهندة البدأ في التحدث له حتى لا يتفاقم الموقف ولكنه حتى لم ينظر لها وسلط نيران غضبه الهاطلة من عيناه تجاه هديل وحدها

"بصي يا ست أنتي.. أنا طول عمري بحترمك وبعملك خاطر عشان بدر الدين الخولي، وبقول إنك كبيرة ومحترمة، إنما هتروحي تغلطي في أهلي في بيتهم مش هاسمحلك بكده أبداً" صرخ سليم منتهى الإنفعال وتشربت عينتاه بحمرة الغضب وقاطع شاهندة دون إكتراث

"ما تحترم نفسك يا قليل الأدب.. جاي تتكلم عن الغلط وجاي تغلط فيا في بيتي" صرخت به هي الأخرى

"بغلط فيكي عشان غلطي في أهلي.. اسمعي اما أقولك، واسمعوا كلكوا" رمق الجميع بنظرة خاطفة ثم سلط نظره عليها متناسياً أن الجميع لم يخطأ أياً منهم ولكن غضبه تجاه ما حدث أنساه حتى اسمه "بدر الدين الخولي ومراته وولاده وأي حد تحت سقف بيته خط أحمر.. اللي هيهوب منهم أنا ممكن أموته بإيدي!! سمعتوني ولا لأ؟!" صرخ بالجميع لتتوسع عينا شاهندة بينما ابتلعت أروى في خوف من تأثير هذه المُجادلة على علاقتهما التي ظنت أنها أخذت أولى خطواتها وإياد كاد أن يتدخل ليهدأ من غضبه ويعرف ما الذي حدث لكلماته تلك ولكن هديل نظرت له بسخرية بل وإستهزاء وضحكت ضحكة إستفزازية ليتعالى غضب سليم ورمقها الجميع في إندهاش

"وأنت جاي بقا تدافع عن بابي بدر عشان يا عيني معرفش يدافع عن نفسه ولا خايف يجي يكلمني؟ امشي يا شاطـ.." وهنا قاطعتها شاهندة بمنتهى الحزم

"هديل احترمي نفسك بقا.. أنتي نسيتي أنتي بتتكلمي عن مين؟!"

"هاكون بتكلم عن مين يعني" التفتت لها لتقابها بنظرة غاضبة مستفزة "بتكلم عن بدر باشا اللي عاملكوا البحر طحينة وعايز يكحوش هو وابنه على كل حاجة.. الشغل وولادي وأختي وولادها، إنسان أناني وفاكر إنه هيقدر يتحكم فينا ورايح يضحك هو وابنه على عقل بنتي وابني.. فاكرني هسبله الجمل بما حمل، لا، نجوم السما اقربله.. دي فلوسي وفلوس ولادي اللي تعبت زيي زيه وأنا بكبرها.. بدل ما أنتي جاية تدافعي عنه فوقي.. فوقي لنفسك يا ماما.. ابنك رايح يخطب بنته عشان ايه؟ مش عشان بنته تنفذ اللي في دماغه ويسيطر هو وولاده على كل حاجة!! لو كلكوا مش فاهمين بدر أنا فاهماه كويس.. دخل بيتنا وقولت اهو اخونا وفتحناله بيتنا ولمناه من الزبالة اللي كان فيها وعاملناه احسن معاملة، نزل الشغل وتعب فيه قولت وماله اهو زيه زينا.. إنما فاكرها ايه بيورث ابنه على حياة عينه تعبنا وشقانا كلنا وكمان جاي يضحك على إياد وزينة.. كله إلا ولادي وتعبي!!! اللي هيقرب منهم أنا هاكله.. حتى لو كان مين!"