دجى الليل الجزء الثاني - عتمة الزينة كاملة

الخاتمة ومناقشة

أولاً : شكر كبير أوي وسلام مربع لكل الناس اللي فضلت تتابعلي بعد غيابي الطويل ده ومش عارفة صراحة ألاقي كلمات تعبر قد ايه أنا ممنونة ليكم وشكر خاص لـ ريهام أحمد اللي مش بتسبني في رواية وبتفضل تتناقش معايا في التفاصيل وبترتبلي أفكاري 

omfarida2014

ثانياً : أنا آسفة جداً إني مكنتش بنزل مناقشات ومش برد على كل التعليقات ولا بتناقش معاكم فيها زي ما اتعودنا لأني كنت مكثفة كل وقتي إني أخلص الرواية قبل رمضان 

ثالثاً : الجزء التالت هبتدي فيه بعد العيد على رواقة علشان كل جزء هيكون عايزله كوبايتين قهوة من اللي همّ واستعداد نفسي بشع 

رابعاً : هنتناقش واحدة واحدة في أغلب شخصيات الرواية على قد ما أقدر وعلاقتهم ببعض وأقولكم على كام حاجة كده علشان وحشني أتكلم معاكم

بسم الله الرحمن الرحيم، هنبدأ المناقشة.. وأهم حاجة أفتكروا اني بحب النقد وإختلاف الرأي لا يُفسد للود قضية ولو ملقيتش نقد عمري ما هتطور

1 - بدر

أول مرة في حياتي أحب شخصية راجل كبير في رواية، بطل اتغير بجد، شوفناه وهو كئيب وسادي وبيحب ومريض نفسي وشوفناه بعد لما اتعالج واهتماماته اتغيرت وخوفه على الناس اللي بيحبهم كبر معاه وبقا ليه اهتمامات جديدة غير البطل اللي بيجري ورا شركاته ولا البطلة اللي بيحبها..

2 - نورسين

كبرت، عِقلت، ربت.. ست فاهمة جوزها صح.. اه طيبة وحبوبة وقاعدة في البيت مش الست اللي مهتمة بحياة الشغل بس أنا شايفاها شخصية كويسة وأم لذيذة على عكس مثلاً هديل أو وفاء أم بدر في الجزء الأول أو هويدا اللي في جسارة الإنتقام!!

3 - علاقة بدر ونورسين

الناس دي حبت بعض خلاص وكبروا.. اللي كان مستني مشاهد جنسية ما بينهم أحب أقولكوا انتو مستنين حاجة عمري ما هاكتب عنها بالتفصيل في الرواية دي، طب حد هيجي يقولي انتي كتبتي عنها في الجزء الأول ايه الجديد؟! هجاوب وأقول إن الجزء الأول كان بيورينا سذاجة وطيبة نورسين وعنف بدر وصل لإيه وإذا كان استمر على مرضه كان ممكن يأذيها فعلاً زي ما أذى ليلي قبل كده.. 

أنا راضية جداً عن العلاقة اللي ظهرتها ما بينهم وطريقة حوارهم مع بعض بتريحني نفسياً وأنا بقراها، بحس ان اتنين فعلاً بيحبوا بعض متجوزين من زمان ولسه محتفظين بروح الطفولة اللي جمعت ما بينهم وخليتهم يحبوا بعض..

4 - سليم!!!

وتلت علامات تعجب، أنا كتبت عن البطل السادي، والبطل البارد، بس اللذيذ ده مكتبتش عنه قبل كده.. سيبكو كده من الأبطال الأشرار وبصوا حواليكم لحظة.. لو أتقدملك ولا اتقدم لبنتك ولا أختك ولا صاحبتك واحد زي سليم وواحد زي شهاب الغامض، ولا واحد زي جاسر بطل جسارة الإنتقام.. هتختاروا مين؟!