SURI

SURI PART 2

SURI
TUSUN 2
DIKARANG DARA MELANJAN

     Nyabak mih Suri sepanjai jalai, ngenang diri ka enggai di peda sida iya serumah. "Nama mih pengidup aku nadai sebaka nge orang, sapa mih apai aku sapa mih indai aku" ku Suri nyabak ngetu di tisi jalai. Gari abis basah laban di unsai indu siku tadi. Nasib ga mata panas udah perenching, bisi rangkai ga baju tudah Suri. Mupuk Suri begadai gadai mulai kediri ka langkau, mai ati sinu nyabak sesedan.Pejalai agi jauh dia iya lelak ngetu ga sebelah rantau jalai.

     Puas ke bejalai nyau semak ga langkau sida iya tiga baru ati iya berasai lantang. "Bedau aku niki, mandi dulu mih aku enggai ke berupai nyabak legi sinu aki enggau ini meda aku" ku Suri nuju pendaie. Udah ke tembu mandi Suri mulaika diri ke atas. "Aki ini, ni seduai udah datai aku?" Pia ku Suri ngagau ke Aki enggau Ini iya. Aki iya laban ke ngeraut wi di tanju lalu nyaut. "Tu kenduai Ini dik kumang, niki mih" ku Aki Suri. "Au niki mih tu Aki, ni Ini nadai di peda?" Ku Suri nanya Aki iya. "Eh nyau ke atas kin Ini dik tadi begiga ke anak lauk kitai tiga, nama dik nyau basah uchu?" Ku Aki Suri. "Mandi dulu aku tadi Aki, Nya alai ku basah, ambi ke aku kain din kena betukar" ku Suri, Aki iya lalu angkat ngambi kain lalu di sua ka iya ngagai Suri..

     Udah ka tembu begari Suri lalu ke dapur, nusun perengka ka di beli iya tadi. "Nasib mih enda basah" ku Suri nelai diri. Suri lalu berapi, Ini iya datai mai lango entekai enggau daun jabang. Gaga mih Suri laban sigi rinduka makai Daun Jabang gusuk gulai salai ikan. Laban sigi indu sikal nadai sekali iya ngelak ka Ini iya gawa. Udah ke tembu iya lalu ngagau ka Ini enggau Aki iya makai. "Aki Ini udah tembu aku, aram ngintu diri dulu matah ka lengan kitai" ku Suri. Aki enggau Ini iya lalu angkat.

    Makai sida iya tiga sambil berandau. "Bisi meda dik orang di rumah panjai tadi uchu?" Ku Aki iya nanya, Irau anak ati iya enggai ka uchu asi iya di saup ka orang di rumah panjai. "Nadai aki, nadai meda aku sida laban aku nengah baruh rumah tadi" ku Suri ngemula ka Aki iya. "Au manah mih nya, Anang enda bejimat dik enti ke rumah" ku Aki Suri. "Aki, legi aku enggau dik ngabas bubu" ku Suri. "Au uchu lemai legi tua ngabas, nibuh tumu tua nurun aku agi ngeraut wi" ku Aki iya. Ini iya sigi nadai entu memunyi.

    Udah tembu makai, Suri lalu ngintu utai di dapur, lama mih iya kiruk kiruk betuchi ka pingai mangkuk di dapur, puas nyau tegenung iya. "Sapa mih apai aku, nama seduai iya indai muai aku, nama mih penyalah aku ada ke dunya?" Ku Suri betelai kediri. "Ingin ati ku belelang ninggal ke Ini Enggau Aki, kasih ga seduai tinggal Ka diri, ukai seduai iya bepengerai" ku Suri. puas iya ka tegenung tembu ga pengawa di kereja Suri. Angkat iya lalu mulai diri ka bilik.

     Gumpul gari kamah sida iya tiga, Suri lalu madah diri ka bebasu. "Aki, aku nurun ke ai dulu, bebasu ka gari kitai tiga, enggai ke nadai panas legi nadai gari kitai" ku Suri iya lalu nyimpan gari kamah dalam Uyut, jari sepiak sepiak penuh minching gilin.Datai di pendaie iya lalu bebasu.Aki enggau Ini iya di langkau berandau enggau pangan diri. "Wai,kasih aku meda uchu tua,enggai ka tua irau biar iya bula"ku Ini Suri. "Nya mih wai,mata nyau bangkung bai iya bendar nyabak,cukup jai ga kitai serumah ngaga iya baka nya"Ku aki Suri.

~~~~~~~~~~~~~~
Ba rumah panjai..

    "Pedis ati aku ketegal anak ampang nya wai,ketegal iya kitai nyau ka di buru bini tuai rumah"ku indai janin. "Aku pia mih wai,nadai guna anak ampang nya agi diau di menua kitai tu"ku Indai lika.Suba nyangka pemanah indai Lika enggau sida Suri sebilik.Tang udah ka di hasut Indai janin mih indai Lika mati mati enggai meda Suri.Suri laban ka benung berangkat dara di kumbai indai janin deka gila enggau apai Lika.Nya mih indai Lika cukup begedik ka Suri.

     "Aku sigi enggai meda iya wai,enti enda ketagal iya ka ngacau  laki aku enda aku bangat begedik meda iya" ku Indai Lika. Indai janin tetuchum ninga indai Lika bejaku munyi nya. "Hahaha, sepik asai dik Suri puas ati aku meda dik enggai dipeda orang, enti enda ketegal dik nulak jadi enggau janin Enda aku pedis ati enggau dik" ku Indai Janin bejaku dalam ati.

~~~~~~~~~~~
Tikau pulai.

    "Indai, aku deka amai ngambi Suri nya ka bini, ulih seduai apai nanya ka Suri nya ka aku?" Ku Janin. "Au anak, pagila indai ke setak kin nanya Suri sebilik" ku Indai Janin. Gaga mih anak ati Indai Janin laban deka ngambi Suri nyadi ke Menantu, taja iya nemu Suri nya anak ampang tang Iya enda milih, laban Suri bagas gawa di peda iya. mansang iya ke bilik besai, iya lalu madah ka Laki iya.

     "Wai, oh wai, lemai pagila nuju sida Suri sebilik tua ke setak kin" ku Indai Janin. "Ya lapa nyau bebai kin dih Wai"ku Apai janin. "Eh dom tua nya, ngasuh nanya ka Suri nyadi ka bini" ku Indai janin. "Au mih pagila kitai kin" ku Apai janin. Tetuchum mih indai Janin laban sigi deka ngambi Suri nyadi menantu. "Ngarap ka Suri nerima mih Janin nya pagila" ku Indai Janin.

   Lemai nya sida iya tiga menyanak betunda udi niti ruai nuju ke bilik sida suri. Datai ba mua Pintu Sida Suri dia dih Apai Janin lalu ngagau. "Ni kitak aya, bisi di bilik kitak?" Ku Apai janin. "Bisi wat, bisi lalu mih tama ke bilik" ku Aki Suri. Sida iya lalu tama. Duduk mih sida iya tiga, Suri lalu angkat ka dapur ngelumai ai kupi. "Nama pejalai kitak tiga wat" ku Aki Suri. "Nya mih aya, kami tiga kitu deka nanya ka Suri nyadi Bini Janin" ku Apai janin nyaut. "Au, aku enggai nyadi nyaut wat, nanya orang ka ngemou tubuh mih kitak" ku Aki Suri. Suri lalu datai mai ai kupi. "Aki tu ai kupi kitak" ku Suri lalu deka Angkat baru. "Anang guai uchu, duduk dulu dik, nya sida aya dik datai nanya dik, jadi enggau Janin" ku Aki Suri. Lama Suri malik mua Aki iya, peda iya Ini iya peda iya ga sida tiga nya menyanak. Tarit iya panjai seput iya lalu nyaut. "Aya ibu, Minta Ampun mih aku, nyukung kediri mih aku, enda aku ulih nerima Janin nyadi ka laki, ati aku bedau deka belaki" Ku Suri.

     Ninga Suri ke nyaut munyi nya indai Janin lalu Angkat. "Aram wai pulai kitai, ngemalu kitai indu tu!!, udah ga anak Ampang, udah manah mih anak aku ka mai dik nya jadi!!" Ku indai janin ngeludah mua Suri. Sida iya menyanak lalu mulai kediri....