SURI

SURI PART 9

SURI
TUSUN 9
DIKARANG DARA MELANJAN

     Pagi nya mupuk mih Suri di anjung Apai Jugam enggau Indai jugam ngagai ibu iya Indai Liya menyadi indai Suri ka diau di sibu.Sinu mih Suri ngenang Aki enggau Ini iya ka tinggal di rumah. "Tinggal mih seduai Aki Ini ila aku bisi belanja pulai ga"ku Suri nyabak ngendas ai mata.sida iya tiga sama nadai bebunyi.. Bisi dua jam sida iya di rantau jalai sida iya tiga pan datai ba rumah ibu iya Indai Liya. Nyadi Indai liya sapit indai Suri tang Suri enda nemu labanka iya enda kala meda indai iya.. Udah ka beranak ka Suri indai iya lalu ninggal ka Suri laban ka enggai ka Suri anak ampang iya..

     Datai sida iya tiga ba rumah indai Liya.. sida iya tiga lalu di sambut Indai liya .. "Lalu mih wai, lalu Suri, nadai orang nyemilik aku, udah ka ika seduai nadai suba" ku Indai liya bejako.. tama mih sida iya lalu duduk indai Liya lalu ngelumai ai ka sida iya tiga. Udah tembu iya lalu mai ai ka bilik besai. "Tu ai kita tiga, nama berita Aki enggau Ini dik endu, gerai seduai?" Ku Indai Liya. "Gerai ibu, nadai ngawa mih seduai iya di rumah" ku Suri nyaut..

   Lama mih sida iya empat berandau Indai Jugam enggau Apai Jugam pan madah ka diri deka mupuk. "Mupuk mih kami duai aya dik Suri, ninga jaku ajar Aki enggau Ini dik, anang ngelaban ibu dik ditu, nyaga diri mih dik kereja manah" ku Indai Jugam merap Suri. "Au mih ibu, peda ka aku Aki enggau Ini, anang ngasuh seduai iya tusah ati ka aku bisi kemisi aku ila pinta ambi seduai ga" ku Suri merap indai Jugam sambil iya mulir ai mata..

      Mupuk mih Indai Apai Jugam mulai ka diri.Dia dih Indai Liya mantai ka Bulu siga iya. "Ohh anak ampang!!! Nya adu ka pingai gelas nya, anang dik diau ditu baka kumang baka intan aku ukai ulun dik!!" Ku indai Liya merak Suri. Nyau tekenyit tudah Suri ninga ibu iya empu getah darah iya meri jaku munyi nya. Berumban mih iya ngadu ka utai udah di kena sida iya ngirup tadi. Udah tembu nuchi pingai enggau gelas iya mulai ka diri ngagai bilik besai. "Ibu, ni bilik aku dah?" Ku Suri nanya. Ibu iya alu angkat Suri lalu nitih..

      "Tu bilik dik, dik diau ba dalam stor tu, bilik ditu udah penuh magang nadai endur dik!!" Ku indai Liya. "Apu ibu, nadai mih aku nemu diau ba dalam tu, kamah amai tu ibu, udah ga mayuh barang" ku tudah Suri nyaut. "Dik ka senang tauka merinsa!! Enti dik ka senang diau diri aja dik dalam tu! Enti asai dik ka merinsa din dik diau langkau manuk aku ujung bilik din!!" Ku Indai Liya nyaut tudah Suri. Ka enggai dia mih Suri diau dalam stor. Tusun iya manah utai dalam nya di sapu iya beresi mih utai dalam nya. Bisi ruang mimit endur Suri ngalik ka diri..

     Di luar indai Liya kekucau. "Nadai geguna anak ampang nya diau gau aku ditu!!sapa iya ka diau menyana begulai enggau aku!dia mih endur dik diau dik sigi anak buai sigi tau diau di dalam stor!" Ku iya bejaku. Suri udah tembu ngadu ka utai, iya pansut baru ka nuduk ka diri ba bangku dia dih ibu iya bejaku. "Dik anang duduk dia, enda alah kami rampit sial dik nya!!" Ku Indai Liya. "Dini aku duduk dih ibu?" Ku Suri nanya. "Nya dia dik duduk di lantai nya dik duduk, anang sekalu dik senang ba bilik tu!"ku indai Liya.

     Nyepik diri enda ditanya ibu iya. Suri nama ka diri dalam bilik, duduk mih dalam bilik nyandar ka belakang ba dinding. "Nama mih nasib aku baka tu, kumbai aku manah mih ibu aku, meda ka getah darah diri, baka ni mih pengidup aku udah tu?" Ku Suri nyabak mulir ai mata iya. "Dini mih aku gawa, diau aku ditu merinsa di gaga baka ukai mensia, sapa mih indai aku, sapa mih apai aku, Aki Ini cukup mih aku enda betah seduai" ku Suri ngalik ka diri. Nyau tetinduk iya bai nyabak ngenang nasib diri..

     Meda Suri enda pansut ari bilik, dia dih ibu iya ngiga iya ka bilik. Peda iya Suri benung jenak sekali tinduk. "Apu neh senang amai pendiau dik di rumah  aku tu neh! Legi sepik dik unsai aku ai celap dik legi!" Ku Indai Liya mansang ka bilik dapur lalu ngambi ai celap.Mansang iya ba bilik Suri baru peda ta unsai iya enggau ai celap tudah Suri. Nyepik diri ka celap dia dih Suri nyau angkat tekenyit. Peda iya ibu iya migai gilin ai. "Senang senang dik tinduk ba rumah tu!! Angkat dik sapu kemas magang rumah tu, pagila dik begiga ka kereja sebelah pasar diatu di gawa di bilik tu anang nyadi kumang nyadi datin dik dalam tu,nadai orang gaji aku kin dik berapi ka aku !!" Ku Indai Liya nganu Suri..Angkat tudah Suri iya lalu ka dapur ngintu utai..

     Udah ka tembu Suri lalu ngagau ka ibu iya makai. "Ibu udah magang utai di intu aku, angkat makai ibu udah nah ka aku utai" ku Suri ngerak ibu iya ka tinduk di bilik besai. Angkat ibu iya lalu nuju bilik dapur peda iya nyamai magang utai di panduk Suri. Baru ka nuduk ka diri mih Suri ba mija makai dinga di perak iya Suri. "Nama hal dik duduk dia! Angkat dik anang sekali kali dik duduk makai semija enggau aku dik anak ampang mai penyial ka bilik kami din dik" ku Indai Liya sambil jari iya nyungkit asi ba pingai. "Nya asi dik nibuh makai belauk dik asi ngerang aja tau di empa dik!" Ku Indai Liya.

     Sambut tudah Suri asi iya lalu makai ba ujung bilik dapur tunga pintu. Nyabak mih Suri ngenang diri merinsa. Baru sari mih udah datai di bilik nya asai ka betaun udah merinsa. "Kering ka mih ati aku, oh Aki Ini enti seduai bisi nadai seduai merinsa aku baku tu, di sagi ka seduai mih aku" ku Suri nyabak sambil makai. Nyau sesedan iya ka nyabak.Indai Liya udah ka makai iya alu mansang ngagai Suri. "Udah dik makai beresi ka magang utai di mija nyin! Udah nya sapu magang rumah tu ninga dik! Aku ka bejalai dulu, ingat aku datai ka ngecek pemeresi rumah tu! Anang sekali di ngular!" Ku Ibu iya lalu mansang ngagai bilik besai nyampai kunchi enggau beg sandik iya pansut. Angkat Suri lalu nyuchi utai, udah nya iya lalu nyapu rumah nya. Ai mata seruran keberai ngenang diru ka baru datai bedau bulih sari udah di ulun ibu iya empu baka orang gaji....