SURI

SURI PART 38

SURI
TUSUN 38
DIKARANG DARA MELANJAN

Lemai ari datai sida tuai rumah ari begiga ke lauk ,sida pan berintu ka lauk serta ngelulu ka penatai bala ari jauh tauka semak.Bini tuai rumah sigi udah sepa nunga tajau tuak begulai enggau Indai Janin serta bala indu iya ka berintu utai. selemai lemai nya sida iya betundi begagai enggau bala ka datai. Capuh mih sida laban deka rami melah pinang.Indai Leka ari jauh aja meda ketagal ka agi bekena ka mangku roda.

"Gaga mih antu indu nya nyabut anak ampang nyadi ka menantu uji te dik nya anak jadi enggau Jawan,senang pengidup dik!"ko Melia bejako enggau anak dara iya."Te nibuh bejako dik indai enti enda ketegal dik nya kanji kin kia nyual diri nadai aka Suri nya nyadi anak ampang!!"ko saut anak dara, tudah Melia."Gamal dik nyebut utai munyi nya sapa aku tu gaga dik baka nya!! Ulun dik !! Indai dik aku tu nemu dik,enti enda pansut ari aku nadai dik nya ada ke dunya!!!!"ko Melia besai nyawa dalam bilik."Utai ga amai alah dipelalaika dik nya!! Nah but cit enda alah lalai bau iya"ko saut anak Melia. Iya lalu angkat ka dapur laban ka berapi.

Chukup mih pemedis ati Melia ninga jaku anak ka di sayau ka iya bejaku munyi nya."Kempang amai dik nyebut munyi nya,enti ku nemu dik bakanya te tungkup ka enggau dik nya ada suba!!!"ko Melia bejako kediri.. Baru ka angkat tudah tama ga Ini Enggau Aki Suri ke bilik lalu di tambit seduai iya baru ngena kunci ."Nya nama mih nambit pintu nama uduk kami tu nadai tau pansut laban seduai melaki bini!!"ko Melia merak Apai seduai indai iya."Anang ka uduk babi manuk tau mih dik nya!!"ko Saut tudah Aki Suri iya lalu nuju dapur laban ka mandi..

Ari pan mupuk silau nanda ka ari nyau ka malam.sida iya pan udah tembu berintu ka utai serta nyedia diri ka ngerami melah pinang.. Bajik bajik sigat mih sida ka nembiak malam nya ,pia mega bala sida ka tuai nadai enda bekena ka baju lawa. Gaga laban deka ngerami Suri Enggau Jawan.Bini tuai rumah panjai ketawa meda pemayuh bala ka datai. Nyau enda berasai ga ai mata tudah ngenang anak indu iya ."Umang,saritu mih ari besai tua apai dik saritu mih ari besai aka dik Jawan ,berasai pelelenggau aku ka dik anak,enti dik agi idup udah sepa dik rerauh anak diruai gaga meda penantai bala aya ibu aki ini dik bala mayuh,ditu mih sentang di tegali layu sulai anak,ditu mih aka dik duduk besanding malam tu anak ngarapka dik ngemata ka seduai iya anak"ko telai ati Bini tuai rumah duduk ba sentang Niang Umang ka tegali layu suba. Ai mata iya agi majak nerutu.

Malik tudah indai janin meda bini tuai rumah ngedas ai mata enda berasai ga iya ngedas ai mata laban iya nemu bini tuai rumah ngenang anak indu iya ka udah nadai mansang tudah ngagai bini tuai rumah iya pan lalu merap tudah."Umbas wai ngenang niang,besampi mih wai ngambikka petara ngemata ka iya,badu mih ati dik telih bepedi bai endu nyau udah nyemilik dik,bisi ga ka ganti penuduk niang ba ruang bilik kitak menyanak"ko tudah indai janin. Bini tuai rumah mina nyagun ka pala sambil merati ka siku siku orang ka datai.tepantup mata iya enggau indai lika dia ati iya ngerasi.

Iya lalu angkat nuju indai lika . Meda bini tuai rumah angkat te nuju indai lika berumban tudah indai janin nyarit jari tudah tuai."Anang wai,anang guai mayuh penumbuh,saritu ari besai anak dik wai,enggaika orang meda malu kitai,kasih ka anak dik mih wai,pagila lusa dik ngerasi ni ko dik"ko indai janin nyagang tudah bini tuai rumah.Dalam ati bini tuai rumah sigi enda ngasuh indai lika pansut ka ruai tauka enggau semua pengerami sida iya serumah.

Nyau chukup ga jam ,Suri enggau Jawan pan di bai pansut ka ruai . Dia dih orang semua meda pemajik enggau penyigat seduai nya nadai endur nyema. "Apu wai nadai udah indu batang melanjan ditu ngemajik endu Suri nya,te nangka iya mih nya nyau asai ka kala aku meda kumang meda endu Suri nya"ko indai janin tegenung meda Suri ka pansut ari pintu lalu duduk ba mangku. Jawan pan pia sigat wai..nyau labuh asai jantung bala ke dara meda penyigat anak tuai rumah.

Udah tembu semua dia dih sida ka bujang dara besadung ka utai dempa..indai janin enggau bini tuai rumah dudi nyingkau utai bukai dulu seduai iya nunga tajau .semalam malam nya sida iya rami wai..nya nyau jadi ga Suri enggau Jawan.. Amai te chapuh orang ketagal ka iya ka begagai semalam malam nya. Suri enggau jawan pan umbas iya pemabuk laban diberi ngirup.

Nyau chelap asai isi bai ari nyau jauh ngalih.ni ka mabuk tinduk ni ka agi beterauh minta tajau. Lika meda Mikai udah mabuk di ambi iya jari deka bai pulaika bilik. Baru nyarit jari tudah lika lalu diketik ka tudah mikai."cishh berani dik nyarit jari aku! Kati dik enda meda aku agi ngirup dik!"ko Mikai nganu tudah lika.meda Mikai nganu Lika dia dih bini tuai rumah angkat." Kati dik mata dik enda meda orang ngirup!kati mata dik enda iya betunga enggau sapa! Sapa dik deka ngambi jari iya baka nya!! Enda sedar dik iya agi ngirup!!"ko bini tuai rumah nganu."ukai pia ibu meda iya udah mabuk amai nya mih ku ngambi jari iya tadi deka mai pulaika bilik"ko Lika nyaut enggau ai mata."nibuh ngambi aku dik ditu aku tinduk ba bilik entua aku! Pulai kin dik !"ko Mikai.

Lika lalu enda memunyi iya lalu mulaika diri ka bilik."kemaya mih dik ulih nerima aku ,puas aku udah nyabar ati ngetat kediri,kemaya mih aku nyepi penyenang jadi enggau dik"ko Lika nyabak ngedas ai mata iya ba belakang pintu .sekumbang ka jadi enggau Mikai nadai sekali jako mikai manah enggau lika.pemenchi mikai ketegal indai lika munuh bini iya ka di sayau dia mikai malas ba Lika.