SURI

SURI PART 21

SURI
TUSUN 21
DIKARANG DARA MELANJAN

Penatai sida Suri di rumah Tinting Melanjan betuai ka Tuai Rumah Mapung mai tanda tanya laban bala ninga Mikai ngagau ka Suri Adi Pia mega Suri ngagau ka Mikai abang. "Sapa nya kebendar iya wai, nama nyau bekangau nyelai nya, suba besayau sayau diatu nyau beadi abang" ku bini Tuai rumah nanya Indai Jugam. "Enda nemu wai nganti orang nesau kitai mih legi" ku Indai Jugam ga nyaut. Lama sida iya beperening pangan diri. Agi Bisi apai tuai orang ka enggau Sida iya nya dikangau ka Suri Apai.

Ba dalam bilik Sida Suri benung berandau. "Aki ini tu mih apai Ambu Mikai, nyadi aku bisi utai ka padah ngagai seduai arap ka seduai ulih nerima nama utai ka di padah ka aku legi" ku Suri migai Jari Ini enggau Aki iya. "Au, nama utai ka di padah ka dik uchu padah ka dia mih" ku Aki Suri. "Aki, nyadi jerita iya baka tu, Mikai tu anak apai aku, anak iya enggau Bini iya. Maya apai begulai enggau Indai. Maya nya Indai Mikai benung bisi ka Mikai" ku Suri.

Lama Aki Suri merening mua Mikai. "Betul mih sagam ati aku ngelama tu, seduai dik endu semadi, gamal seduai nadai bangat jauh taja indai enda sebaka" ku Aki Suri. "Au uchu nadai tua Ini dik enggai nerima, manah mih nya uchu udah temu penatai dik, badu mih orang bejaku berandau ka dik agi, legi mih aku nesau kitai serumah ambi sama nemu" ku Aki Suri. "Terima kasih aki udah nerima aku, terima kasih ini, diatu seduai dik mih kemisi aku, udah tu aku mai adi ngiga Indai, dini dini alai tua semadi sigi ngiga iya, taja pan iya ukai indai ada aku iya mih indai ke agi bisi aku" ku Mikai merap aki enggau ini iya.

Gaga mih sida iya selemai nya kekucah mih aki Suri ngerandau Apai ambu Mikai. Mayuh utai di tusi Man ngagai Aki Suri kelebih agi jerita apai Suri. "Lantang ga anak ati aku dom, ninga Endu bisi menyadi, temu penatai iya, suba puas kami tiga ninga jaku kami serumah ka begedik ka iya, Nyentuk ka kami bemalam ba langkau ka diri suba" ku Aki Suri gaga ati. "Ba iya aya, aku pan ka minta Ampun ngari ka menyadi aku Belayong, laban ka ningal ka Melia enggau Suri pia aja" ku Man.

Nyau silau ari Aki Suri madah ka diri deka pansut ka ruai lalu ngagai tuai rumah mai begempuru ba ruai enggau bala mayuh iya deka nusi sapa Mikai enggau Suri. Datai iya ba bilik tuai iya lalu ngagau. "Bisi dik dom?" Ku Aki Suri. "Bisi apai bisi, ditu kenduai indai Umang benung ngintu diri kitu mih lalu" ku tuai Rumah. Aki Suri oan ke dapur. "Makai apai, enggau kenduai indai Umang" ku Tuai Rumah. "Enda ngawa dom baru udah tu tadi" ku Aki Suri. "Bah nganti enda lama apai, dik enggai ga bai makai" ku Tuai rumah.

Udah ka tembu makai, seduai iya pulai ka bilik besai "nama utai ka di kerandau ka dik apai, nama endu ka belaki pia?" Ku Tuai rumah. "Eh ka mai dik betesau ka kitai serumah, deka madah ka orang ka enggau Suri nya kebatang iya menyadi apai endar Suri" ku Aki Suri. "Apu amai dik apai, baik mih nya enti udah temu, badu mih orang bejaku ka endu udah tu ila" ku tuai Rumah. "Bah aram mih apai aku nyesau kita serumah dulu" ku tuai Rumah..

Pansut seduai iya ari bilik cun endar ga sida Janin Jugam enggau Dino benung duduk ba Ruai. "Dom alai kita tiga nesau kitai serumah Aki Suri bisi utai ka di kerandau enggau kitai"ku Tuai Rumah. Nadai beleman sida iya tiga alu angkat. "Kih nama utai ka di kerandau ka aki nya nih,kada enda ngasuh Akih Mikai jadi enggau Suri,kasih dik kih enda ngempu iya"ku Jugam. "Ish seduai dik uji anang mayuh jaku,nadai aku agi ka ke Endu agi, enti udah atur petara seduai iya jadi nadai ku enggau nadai ati aku nyima Endu suri nyau baka madi kitai tiga"ku Janin.

Udah sida iya tiga betesau ka sida iya serumah nyau makin mayuh mih orang ngenuduk ka diri ba ruai Sida Aki Suri. Sida iya sebilik udah duduk ba ruai seraya ka nganti bala bukai datai. Udah datai magang sida iya serumah. Indai Janin pan bisi enggau tang iya Duduk jenuh labanka semak Bini Tuai rumaj. "Dik anang reragak rerauh dia,orang ka berandau enti enda tekung aku enggau Sengayuh dik legi"ku bini tuai rumah. "Ee kumbai dik bangat gila aku tu ka tekung dik,enggai ka dik tekung aku ngena sengayuh dik nya baru legi"ku Indai Janin kekucau dalam ati..

Meda udah datai magang Aki Suri pan lalu bediri. "Selamat malam ngagai kitai serumah,terima kasih laban udah datai baka ka malam tu,nyadi aku bisi utai deka padah ngagai kita,tentu kita bisi nanya pangan diri meda sapa orang ka enggau sida iya tiga pulai kitu ngalih ari tadi,nyadi Tu mih Man menyadi Apai Suri tauka Apai Ambu Mikai,nyadi Mikai enggau Suri diri menyadi,seduai iya sama apai tang mih enda sama indai,nyadi ditu aku madah Uchu aku Suri ukai anak buai tauka anak ampang,nyadi pia aku enggai enda nyebut,maya Melia ka bisi ka Tudah Suri,Apai Iya pulai ka menua enda pulai agi,laban Apai iya bisi siku bini ka diau di rumah panjai setaun udah nya Melia bepansa enggau Belayong enggau indai Mikai,iya nusi semua utai ngagai dua iku nya,bendar seduai iya bini iya Santi begiga alai menua kitai suba tang enda temu,pemulai seduai iya ngiga Suri seduai iya mati Sidin lantak Lori,nya mih Mikai di ambu apai Iya Tu ianya Man"ku Aki Suri.

Nya mih bala banyak gaga dih ka Suri enggau Mikai diri semadi. "Apuu ulih mih Endu Suri nya jadi enggau Janin ila,arap ka iya ka mih nerima dom aku"ku Indai Janin. "Manah mih Endu udah temu kitai penantai ngambi bala banyak badu ngumbai iya anak buai anak ampang munyi ku bala sekeda,bah Dom enti dik enda jadi enggau Suri,ambu aku dik ka menantu,jadi enggau Umang"ku Bini tuai rumah. "Eee ta nadai udah dik nya indai Umang ngemalu aku,kumbai baka minta anak manuk minta Anak orang"ku Tuai Rumah nyau besai batang rekung. "Eh manah aku minta kati enti aku baka Sanu nyin nyau bepugai pugai enggai gik dik meda"ku Iya baru ngelaban.

Nasib mih maya nya Apai Lika nadai laban ka diau begulai indai Lika enggau Lika kasih ka seduai nya nyau diau ka diri  ba puak kampung. Nya mih orang nyau ketawa ninga Bini tuai Rumah ka minta Mikai nyadi ka menantu iya. "Nai lapa salah ibu, enti anak dik ka ka aku, tau ga deh" ku Mikai ga nundi. "Aku aku aku ka ngambi Suri nyadi nyadi ka menantu" ku Tudah Indai Janin enggai alah. "Tiiii tau nibuh enggau orang begau mih dik nya" ku Bini tuai rumah. Berandau mih sida iya semalam nya bai gaga. Nadai utai ka ngangi ka sida iya agi laban Suri di temu sapa apai sapa indai.

Laun Suri mulai ka diri ka bilik laban ka ngadu ka utai udah di Kena bala ka laki ngirup ari Jauh indai Janin mansang ngagai Suri.. "eh ibu, nama dik bedau tinduk, udah laun tu, legi giga orang dik" ku Suri tekenyit meda indai Janin. "Bedau mang, sigi nganti dik aku" ku Indai Janin. "Bah nama nganti aku dih ibu, ukai aku sebilik enggau dik dih" ku Suri ga nyaut. "Aku bisi utai di randau enggau dik mang, ka dik enti aku ngambi dik ka menantu baru" ku Indai Janin.

Lama Suri enda nyaut mua mata iya merening ngagai Indai Janin "gila ka enda gila ibu tu, nama iya nanya aku baka nya" ku Telai ati Suri. Nangi iya nyaut laban takut salah saut enggai ka Indai Janin ngaga iya baka udah. "Ibu, minta ampun aku ukai ku enggai tang ati aku ukai ngagai Janin enda aku ulih nerima iya ibu" ku Suri. Ninga saut Suri munyi nya nyau bimbik mulut iya ka nyabak. "Au mih mang enti dik enggai badu mih aku maksa dik, tang mang enti dik enggai nyadi ka menantu aku Endu Lenta nya ga sabung enggau Janin" ku Indai Janin ga baru.

Lenta baru ka pansut tepeda ka indai janin berandau enggau Suri. Ninga mih Tudah indai Janin ngasuh iya jadi enggau Janin. Tetuchum orang menua laban sigi bisi ati ngagai Janin. "Nerima aku ibu, nibuh di anti nanya" ku Lenta mansut ka diri. Malik seduai iya tepeda ka Lenta pansut. "Amai dik endu nerima anak aku, terima kasih endu, pagila aku mai aya kita nanya ka dik" ku Indai Janin gaga betempik ka jari pulai ka setak..

"Mutus ati dik Adi, jadi enggau Janin?" Ku Suri nanya Lenta. "Mutus ati aka, lama aku udah nyeling iya belalai" ku Lenta nyaut lalu pulai ka bilik, Suri pan nitih ka Lenta pulai ka bilik. Nadai sida iya nemu Janin enggau Jugam, Dino ninga randau Sida iya tiga. "Enda gila mih indai dik kih, lawa dik enda lama da bebini tinggal kami duai iya aja udah tu" ku Jugam nundi Janin. Janin mina tetuchum bai sigi bisi ati ngagai Lenta. Nya mih iya nyau nadai ati ngagai Suri....