SURI

SURI PART 11

SURI
TUSUN 11
DIKARANG DARA MELANJAN

Lemai nya baka selama mih Suri pulai kereja, iya ngintu utai di rumah ibu iya. Bepanduk ka asi lauk, betuchi ka gari nyapu. Udah ka tembu Suri nusun gari iya ngagai beg, nadai mih ibu iya nemu pengawa Suri ka lari ari rumah. Benung iya betusun ka gari dinga ibu iya nyerauh ngagau ari luar leka ka iya gari berumban iya pansut laban takut di anu. "Nama ibu ngagau ka aku, bisi utai ka di asuh dik?" Ku Suri nanya ibu iya. "Dik nemu nama penyalah dik! Kitu dik kitu!!" Ku Indai Leya narit buk Suri lalu di irit iya.

"Peda dik gari tu dik nemu baju tu tusur nama hal dik ngulaika enggau garu bukau, meda mata dik baju tu nyau mirah!!"ku Indai Leya ngacuk mata Suri ngena jari. Nyerauh tudah Suri nyepik mata iya pedis. "Akaiii ibu pedis aku ibu, minta ampun ku ibu enda sengaja aku" ku Suri nyabak sambil ngenat ka jari Ibu iya. "Dik ingat enggau dik minta ampun aku sinu aku ngampun ka dik?" Ku Indai Leya. "Kitu dik enggau aku!" Ku Indai Leya ngirit Suri ngagai dapur.

Datai di dapur idupka Indai Leya dapur gas lalu daing iya jari Suri ba atas api. Nya mih Suri nyerauh nyepik jari iya pedis serta betu. "Nya sepik dik anak ampang puas ati aku ka agi dik anang ngaga ulah begulai enggau aku enti ka idup! Ketegal dik mih madi aku sampai ka saritu nadai pulai sampai ka diatu nadai temu tunga!!" Ku Indai Leya. "Ampun ka aku ibu, ukai ka deka aku nyadi anak ampang ukai ka deka aku mih ada ke dunya cara baka tu, anang nyamah aku ibu, minta kasih aku" ku Suri sesedan nyabak ngenat ka jari iya betu.

Bedau puas ati indai Leya ngemediska Suri dia iya ngirit Suri ngagai bilik mandi, datai di bilik madik di selam ka iya pala Suri ngagai bisin. Nyau Seseput Suri enda dapat narit Seput. "Parai mih aku enti baka tu, Aki Ini ngibun diri mih seduai dik di menua mati aku Aki Ini, puas mih ati sida iya enggai meda aku" ku Suri udah enda sedar agi. Meda Suri enda ngeleda Indai Leya lalu ngeleka ka Suri. Aku di irit iya ngagai Stor Suri. Di kunchi iya ari Luar tudah Suri..

Ba Luar Lenta enggau Abang iya udah nganti nyau kekasak tudah Lenta meda Suri Enda pansut. "Nama Suri tu alu bedau pansut iya udah ga ngasuh kitu laun tadi, tu Ibu iya udah tinduk udah padam api lalu bedau ga iya pansut" ku Lenta kekucau dalam kereta. "Ulih dik anang ragak, pedis pending aku ninga dik nya! Ni kaban dik alu enda pansut tu! Ukai ka setengah jam udah nganti nyau sejam tu lalu ga nadai, nama nyadi ka enda iya!" Ku Abang Lenta. Lenta enda nyaut iya majak malik ka pagar engka Suri udah pansut.

Nyau semak Dua jam seduai iya ka nganti nadai ga meda ayas Suri pansut. "Apu nama ga indu tu di dalam din, kada enda di jamah ibuk iya mih Suri" ku Lenta mupuk irau. "Baka ni tu abang tiki tua pagar nya tama ka dalam kin ngiga Suri?" Ku Lenta nanya. "Dik anang ngaga kereja gila aku depan dik tu Polis anang tak sengapa ka pecah rumah orang dik enti enggai di tangkap" ku Abang Iya ga nyaut. "Ya kati tua enggau dih? Kada enda iya di jamah ibu iya Suri din" ku Lenta. "Anti dulu mih nyangka iya pansut legi" ku Abang Lenta.

Ba Tinting melanjan.

Ketegal ka Indai Janin ka ngila diri miau ka duku, dia dih Janin tama ka bilik ngambi jala. Datai di ruai, Janin sigi ukai orang mayuh jaku lalu di tibal ka iya jala ngagai Indai iya peda nyau begulung Indai iya kena jala. "Lepas ka aku lepas enti kita enggai mati di bunuh aku!!" Ku Indai Janin. "Apai saup aku ulih seduai aya tuai rumah pasung Indai tu, aku ngulih ka duku ba iya nya" ku Janin ngasuh apai iya enggau tuai rumah. Peda nyau besaup sida iya serumah masung Indai Janin.

Udah ka duku ulih ambi Janin, iya lalu mansang ka Rumah injin ba baruh rumah lalu ngambi rantai besi enggau kerepau. Niki iya ke atas indai iya lalu di asuh iya irit ka tiang tengah lalu di rantai iya kaki indai iya. "Lepas ka aku Janin! Enti dik enggai di bunuh aku, ila dik ensepik iya tulah di ngaga aku baka tu! Indai dik aku" ku Indai Janin merak anak iya. "Indai enti enda ketegal dik ngila diri enda aku ngaga dik ketu! Dik udah chukup indai ngemalu ka tua apai! Enti deka ingin ati ku asuh ku tating apai dik buai ka ai kin!!" Ku janin merak indai iya. Nyau enda bebunyi iya ninga jaku Janin ka munyi nya.

"Barang sapa agi ngaga ulah di rumah panjai tu agi bejai bebunuh ka orang Sigi di gaga aku baka tu! Aku enda ngira kita tuai tauka biak tauka kita ibu aya aku apai indai aku sigi di gaga aku baka tu! Ku Janin merak sida iya serumah. Indai Lika ka meda enda bebunyi iya nyau takut. Pemuas iya ka bediri di tisi pintu kaki iya enda berasai nyau semak Aki Suri benung Duduk nunga tuai rumah." Apai apai minta ampun aku apai ketegal udah ngaga salah ba kita sebilik, kelebih agi Endu Suri minta ampun aku ukum aku apai "ku Indai Lika nyabak nyium kaki Aki Suri.

Lama tudah Aki Suri enda nyaut malik ka mua enda mih iya bai pedis ati. "Ampun ka aku apai, kasih ka aku badu aku ngaga ulah ka baka nya agi, ketegal aku alah hasut Indai Janin mih aku enggai meda Suri" ku Indai Lika merap nyium kaki aki Suri.. Meda Aki Suri enda bebunyi dia dih Ini Suri lalu mansang. "Indai endu, ukai aku pedis ati ka seduai ukai aku enggai meda seduai tang seduai kelalu ngaga ucu kenduai iya baka nya, ketegal iya ka anak ampang ketegal iya anak buai enda mih ngacau pengidup kitai, udah iya di buai apai di buai indai kenyau ari mit kitai ga anang nunda anang ngemediska ati iya uji asai dik nyadi anak buai nyadi anak ampang baka ni asai ati dik ensiban asai iya baka nya mih asai uchu aku" ku Ini Suri...