SURI

SURI PART 15

SURI
TUSUN 15
DIKARANG DARA MELANJAN

   Pagi siti, tudah Indai Janin nyabak minta buka kerepau kaki ba sepital gila. Abis bala misi di anu iya meda nadai ka muka kerepau nya. "Enti aku tebuka ka kerepau tu, kita bisi makai buku 5 aku, kumbai kita gila aku tu gaga baka tu!" Ku Indai Janin bejaku. Nyadi Indai Janin di kurung sida misi ba siti bilik enda begulai enggau bala ka bukai. Mansa Indai tuai gila siku ba bilik iya. "Eh enti gila gila mih nadai gila ka ngaku, neh aku gila enda mih madah diri gila hahai wai" ku Indai tuai nya ketawa betempik jari.

    Nya mih Indai Janin nyau beketup Ngeli meda Indai Tuai siku nya ka bejaku. "Kala makai bubur dik ibu? Enti empai kala kitu dik" ku Indai Janin bejaku. "Kala makai bubur beri endu misi bajik, engka dik bedau legi aku ngasuh iya meri dik ga" ku Indai tuai nya nyau nyau lelekik iya ketawa. "Enti ku pansut dulu dik bunuh ku ambi dik ngasai dini menua sebayan" Ku Indai Janin. "Wau kering dik wai, bah buka kerepau nya ambi dik betanda enggau aku ditu" ku Indai Tuai nya lalu ngerari kediri ngagai indu Misi. "Endu endu amai gila Indai Tuai kerepau kita nyin, aku tanya ka iya makai bubur, bisi bubur saritu kumang?" Ku Indai Tuai nya ketawa.

    Datai Janin enggau Apai iya ngabas Indai iya dia. Nya mih Indai Janin nyau nyabak balat agi. "Bai pulai aku anak enggai aku ditu, enda nyamai aku ditu anak asai ka diau ba rumah besi" ku Indai Janin merap Janin. "Indai dik ditu dulu au, berubat dulu ngambi gerai,udah gerai ila aku mai dik pulai" ku Janin. "Enda enda aku sakit anak gerai aku, wai wai bai pulai aku au, nadai ngintu seduai menyanak enti aku di tingal ka seduai ditu" ku Indai Janin migai jari laki iya. "Ukai aku enggai wai mai dik pulai, ditu dulu mih dik au, awak ka Lutur meri dik ubat ngambi ka gerai, kitai serumah nyau takut meda ulah dik" ku Apai Janin.

     Nya mih iya nyau bendar agi ka Nyabak. Tama ga Bini Tuai Rumah enggau Tuai Rumah laban ka ngabas iya enggau Suri. "Wai, bai pulai aku wai, enda aku sakit enggai aku ditu wai pedis lengan burit aku di jik bala indu Misi meda aku enggai makai ubat" ku Indai Janin pinta bai bini tuai rumah. "Ditu dulu mih wai, jaga pengerai dik anang enggai makai ubat enti enggai pedis, dinga utai ku misi enggau Lutur ngambi jampat gerai jampat ga pulai, kami nadai ulih lama ditu nyau cukup jam, ingat enti ka gerai Makai ubat dik, enggai dik makai ubat aku ngibun dik bisi sengayuh enggau pemansai di rumah din deh kena aku ngibun dik" ku Bini Tuai Rumah.

      "Pulai kami Indai ingat ka pesan aku, ka gerai makai ubat anang mayuh ulah" ku Janin. Nyabak mih iya tinggal sida empat nya pulai. Nyau reradak nyawa iya ngagau ka Janin. Sida nya lalu nuju Ward endur Suri ka masuk. Aki enggau Ini Suri sigi enda enggau ngabas Indai Janin laban ka nyau kisuk laban Suri. Datai sida iya dia peda Suri benung di tuchi misi telih. "Kasih Suri dih apai, nadai kala senang pengidup iya ari mit" ku Bini Tuai Rumah bejaku. "Ba iya wai, indai nadai ga temu tuju kini ka penunga nadai ga sapa nemu" ku Indai Jugam.

    Nyau Chukup ga jam sida iya ngabas Suri di asuh Jaga  pansut laban ka ukai jam ngabas orang agi maya nya. "Mupuk Aki kumang pagila tua aya dik Apai jugam ngambi dik kitu, ngibun diri dik ditu au" ku Aki iya bejaku. "Au agi, bejimat pulai nibuh tusah ati ngagai aku, nadai ngawa aku bisi misi ngibun" ku Suri. "Kati tua Aki dik enda tusah ati kumang, kengka dik ka siku uchu Asi tua aki dik di gaga baka tu" ku Ini iya nyabak "Anang nyabak Ini, enda aku pedis agi deh" ku Suri. "Au mih. Mupuk kami" ku Aki iya lalu merap Suri..

  Pansut sida iya ari Ward Suri nya mih Aki iya lalu bejaku enggau sida ke bukai. "Ke Rumah Indai Leya kitai, aku ka berandau enggau iya" ku Aki Suri mai sida iya sebuat ngagai rumah Indai Leya. Mupuk mih Sida iya nuju rumah Indai Leya. Datai sida iya nadai ga meda Kereta siku nya. "Nama baka ka nadai orang ditu apai, kada enda ba endu din iya" ku Apai Jugam bejaku. "Enti iya din aram mih kitai" ku Aki Suri. Iya nyau enda sabar ka betemu enggau indai Leya. Dalam ati iya sigi ka nyamah Siku nya. "Anang Semak di nyankai ka van legi dom awak iya enda ulih lari ka kitai" ku Aki Suri. Mupuk sida iya lalu nuju rumah Leya. Laban ka temu nyamai mih sida iya kin.

    Datai sida iya ba simpang penama ngagai rumah Leya meda bisi kereta Indai Leya paking manah ba tengah laman. "Ney ulih ka lari ka iya kitai, legi sepik dik" ku Aki Suri lalu pansut sida iya sebuat. Nadai mih Siku nya ngadang ka Apai Enggau Indai iya datai. Benung Ngirup pagi iya di dapur. Leya benung ngeredai gari meda iya aki enggau ini iya datai. Lalu di ambat Leya. "Apu aki ini,seduai nya tadi pia, ni Mang nadai enggau seduai dih" ku Leya. Leya tu chukup mentas enggau Suri. Leya mih selalu nganjung ka sida iya sebilik pemakai enti bisi pulai ka menua.

     "Nadai Mang enggau tadi, agi di sepital din iya" ku Saut Ini suri. Tekenyit tudah Leya laban enda nemu rita Suri. "Nai Nama pemedis Mang, nama kita nadai madah ka aku" ku Leya nganu. "Nyim Indai dik tanya, nama ga Mang tama sepital" ku Aki iya nyaut. "Aram tama legi sepik Indai, nadai orang bukai ngemedis iya, sigi indai pama udah ngasuh nanya iya, nemu aku ari mit enggai meda Mang" ku Leya. Tama sida iya ka bilik nyau  emsembur ai kupi ka di irup iya bai tekenyit ka sida nya datai. "Aaaaapaiii innnndaiii nnnnaaama seeeduuuaiii kittttuu" ku indai Leya bejaku kekalat.

    Mansang Aki Suri alu di tampar iya Indai Leya. Ney kering Aki Suri semetap kuyu indai Leya Jamah Aki Suri. "Anak nadai guna dik nya, Aku arap ka dik ngibun Suri ngasuh dik nyau ka munuh iya, lapa dik enggai mati ngambi utak di anchur, nadai tuju dik nya idup" ku Aki Suri merak. "Indai nama hal dik nyamah Mang baka nya, enggai dik meda iya anang merinsa iya dik, enggai dik begulai enggau iya anjung dik ngagai aku iya, aku ka nupi iya indai, patut dik dua tiga ari tu diau ditu madah diri enda betah bala uchu, tu pengawa dik!" Ku Leya nganu indai iya.

   Jingkau Leya telipun lalu telipun iya ngagai polis ngasuh ngangkap indai iya. "Ampun Apai ngampun ku ngagai kita anang Leya telipun ngagai polis kasih aku anak" ku Indai Leya merap kaki apai iya. Nadai di kibuh ka sida nya. "Dik sigi tau tama jil chukup penyai mensia dik nya, nadai aku bisi anak ka baka dik nya, bujik indai iya udah muai iya ari mit dik ga anang nunda, iya ada ka dunya ukai di pinta kitai" ku Aki Suri merak. Bisi setengah jam mih udah nya datai bala Polis nangkap Indai Leya. Nya mih iya nyau nyerauh nyabak. "Lepas ka aku, apai kasih ka aku apai, anang ngaga aku baka tu" ku Indai Leya di pelawik ka polis jari. "Alai mih dik ambi dik badu ngaga penyalah" ku Aki Suri. Mupuk mih Indai Leya di bai ngagai Balai isa asai nyamai gaji jai...

     "Aki bemalam ditu seduai lemai legi kitai ngabas Mang, kasih madi aku empai nyamai ati aku empai meda iya" ku Leya nyabak. "Au mih Uchu empai ga kenduai Ini dik pulai, tang tua iya nadai mai gari tadi" ku Aki Suri. "Nadai ngawa legi mih kitai bebeli ka gari, ibu aya bemalam mih nibuh pulai ka menua, lama amai aku nadai pulai sekumbang sida anak nyau sekula tu" ku Leya. Nadai ga sida sebuat mantah. "Au mih endu, kami tu nadai mih bebai gari tadi" ku Bini tuai rumah nyaut. "Nadai ngawa nya, legi mih kitai bejalai bebeli ka gari" ku Leya. Gaga Bini Tuai Rumah ninga Leya ka meli gari ka iya. Tak palu enggau sengayuh ney Leya....