SURI

SURI PART 32

SURI
TUSUN 32
DIKARANG DARA MELANJAN

Seminggu pengudah Indai Lika di bai ke Sepital ketegal ka di palu bini tuai rumah enggau indai Janin, indai Lika pan pansut. Dalam ati iya sigi enda puas iya deka bebalas. "Ila seduai dik nyepik iya aku malas penyai seduai dik" ku ati iya bejaku kediri.Datai Lika enggau Mikai ngambi iya pulai ke rumah iya lalu bejaku. "Dom pulai ke menua indai dulu kitai tiga legi aku bisi utai di ambi"ku Iya bejaku.

Mikai laban nemu nama utai ka di ambi iya Mikai lalu bejaku. "Nadai ari bejalai kekini aku,tu pansut enda lama laban ke ngambi dik indai tu legi nganjung dik aja lalu pulai baru ka rumah kenduai laban aku gawa"ku Mikai nyaut. "Enti pia tua aja Lika pulai kin"ku indai Lika nanya anak iya.Tang Lika enda nyaut laban udah di perening tudah Mikai mata. "Ka dik enggau aku pulai endu"ku indai iya baru nanya meda Lika lalu enda nyaut.

Meda ke tanya indai iya baru,Lika lalu nyaut "Minta ampun indai aku enda ulih laban aku enggau Mikai pulai,enti aku nyau enggau dik legi nyau nadai orang mela Mikai"ku Lika. Nya mih iya nyau melut melut mata ninga anak iya enggau menantu iya enggai di bai pulai kin. "Nadai geguna seduai dik nya nadai ulih di karap lalu"ku iya mutap.Lika lalu pansut laban ka ngambi ubat enggau bebayar.

Tinggal mih Mikai enggau Indai Lika aja di dalam nya.Dia Mikai lalu bejaku. "Dinga dik manah manah jaku aku tu,aku jadi enggau anak dik ukai ketegal aku sayau tang ketegal aku bedendam enti dik mayuh ulah seput Lika ba jari aku!"ku Mikai nelai pending iya. Ninga ke munyi nya iya lalu merening tajam ngagai Mikai. "Dik anang memacham enggau anak aku,enti dik enggai mati baka bini dik suba"ku iya nyaut. Anang ke ngasuh Mikai takut tang ngasuh Mikai ketawa.

"Hahahaha dik ka munuh aku,sapa dik sebedau dik bejaku ingat nama pengawa udah dikereja ka dik,aku ulih nepu dik dalam jil enti dik berani ngelaban aku ingat dik nya udah kala munuh orang"ku Mikai bejaku. "Nadai bukti dik nyangka aku munuh Umang " ku iya ngelaban Mikai. "Aku nadai bukti baru tadi dik ka munuh aku baka dik munuh bini aku salah orang dik dinga dik tu au" ku Mikai lalu ngambi talipun culik iya lalu di pasang iya rakam nyawa indai Lika.

Nya mih indai Lika melut mata ninga nyawa iya empu madah ke diri ka munuh Mikai baka iya munuh Niang Umang. " Ingat au anang mayuh ulah enti enggai lenyau Lika" ku Mikai mesan. benung seduai iya belaban beperening mata. Lika pan tama. "Udah aram pulai kitai tiga" ku Lika. Nadai mih iya nemu indai iya enggau laki iya belaya nya tadi. Nya mih indai Lika meda mua anak iya lalu neritik ai mata.

Ketegal ulah iya ke jai anak nyadi mangsa. "Bedau dik diatu ari dik ila ari aku dik sigi mati bunuh aku" ku Indai Lika betelai ati kediri sambil iya nitih ka singkang Lika. Mupuk mih sida iya tiga mulai ke diri ngagai rumah panjai. Bisi sejam lebih sida iya tiga datai ga ba tengah laman sida. Udah ka sangkai pansut Lika enggau Indai Iya tang mih Mikai enda pansut iya lalu nyebut ngagai Lika. "Anang lama aku ka masuk gawa baru legi" ku Mikai. Lika mina nyagun ke pala.

Pengudah Lika nganjung Indai iya tama ke  bilik Lika lalu madah ka apai enggau indai iya, madah ke diri mupuk baru laban Mikai gawa. Udah sida iya beberap Lika lalu pansut. Indai Janin laban ke benung nutuk daun empasa meda mih iya tadi Indai Lika udah pansut ari sepital. "Nai gerai mih antu buntas nya, nyau udah pansut" ku iya bejaku kediri ba ruai. Sekali mansa anak Mit bemain ba ruai iya. Lalu di kangau ka iya. "Jang oh jang kitu dulu dik, alai dik ngagau ka bini tuai kitu, padah aku ka mai iya ngirup" ku Indai Janin.

Nemu ga anak mit nya iya lalu belanda nuju bilik sida tuai rumah. "Ibu tuai oh ibu tuai ni dik?" Ku Anak mit nya ngagau ari pintu bilik. Laban ka bini tuai rumah benung ngintu dapur ba din enda entu di dinga iya. Meda nadai orang nyaut iya mansang ke dapur. "Ibu tuai, nyin ibu indai janin ngagau ke dik mai dik ngirup" ku Anak mit nya. "Au au legi aku pansut agi ngelap utai di dapur aku tu" ku bini tuai. Anak mit nya pan pansut baru iya alu mansang ngagai indai janin. "Legi iya pansut ibu, agi ngelap utai di dapur iya" ku anak mit nya lalu belanda ngagai bala bakih iya ka benung bemain.

Udah tembu ngelap utai di dapur Bini tuai rumah pan pansut lalu nuju Indai janin ke duduk benung nutuk daun empasa. "Nai nama ngirup ku dik tadi nama nya agi betutuk ke daun empasa dih" ku Bini tuai rumah. "Ehh enda aku tu ngirup, sigi aku ngasuh dik pansut nemu dik" Ku indai janin bejaku. Pansut ga Lenta alu duduk ngimbai Entua iya laban ke baru tembu ngintu utai di dapur. "Nai nama mih ngagau enti enda ngirup dih" ku Bini tuai rumah. "Nyin nyin antu buntas udah pansut tadi baru datai iya anjung Dom Mikai enggau Lika, tang Dom enda niki nganti dalam kereta aja, Lika enda lama enda duduk kini iya tadi" ku Indai janin nusi.

"Udah pansut pia, bah aram ngabas iya tua kasih iya sakit palu enggau  sengayuh" ku bini tuai rumah nyarit jari tudah indai janin angkat. Nya mih seduai iya bebai tama ke bilik indai Lika laban ka meda indai Lika. Tama seduai iya peda indai Lika benung gali ba tilam mit laban ke enda ulih duduk lama laban tulang rusuk iya bisi patah. "Sangka aku pahai dik wai, meda te lama masuk sepital nama pemedis dik wai bisi patah tulang dik?" Ku indai janin. "Pansut seduai dik enti enggai di pantap aku legi!!" Ku Indai Lika muru seduai iya.

"Eee kitai ngabas di buru enda ngasai kediri jai dik nya ka muru kenduai iya, eh manah kami tu ngabas dik ka meda dik agi idup ke mati lapa mih semengat Niang enggai ngacau dik nya" ku Saut bini tuai rumah. "Pansut seduai pansut apai Lika oh apai Lika bai duku dik dia kena muru jelu dua tu" ku Indai Lika meradak ke nyawa iya. Ninga bini iya ngasuh muru jelu engka te bisi amai jelu tama nya mih apai Lika berumban ke bilik besai "ni jelu ni jelu ke asuh dik buru aku" ku Apai Lika. "Nya nya dua iku jelu nya buru biar ke dia duku dik nya" ku Indai Lika nunjuk ke seduai nya.

"Eee amai jai adat dik nya kenduai kitu ukai ngiga laya tang mih ka ngabas dik, enti bakatu adat dik muru kami tama bisi maya aku muru dik berumah ditu" ku Bini tuai Rumah bejaku. Ninga menyadi iya munyi nya Apai Lika lalu ngampun. "Minta ampun ku Madi laban ulah iya kenya anang muru kenduai iya madi, duduk mih seduai aku ngaga ai ke seduai" ku apai Lika lalu ke dapur. "Enti aku enda kasih ke menyadi aku udah lama dik nya di buru aku ari menua tu, indu enda tau enggau betampung dik nya jai baka niang apai dik udu beberi pengaruh, ingat petara enda kala tinduk iya semampai ngemata, bisi maya dik di atas bisi maya dik di baruh anang ngasai senang dik udah munuh anak aku" ku Bini tuai rumah bejaku lalu bediri ka pansut. Apai Lika ka baru udah tembu ngaga ai iya lalu ke bilik besai.

"Kini dik madi, tu ai udah di lumai aku tadi duduk dulu ngirup ai" ku Apai Lika. Ninga madi iya ngasuh duduk. Duduk baru ga seduai iya indai janin. "Kini ke tuai tadi madi ari pagi aku meda iya nadai" ku Apai lika nanya. "Enda nemu aku engka nyau enggau apai janin undur kini iya tadi mal iya nya nadai nemu madah bejalai" ku saut bini tuai rumah. Udah ke tembu ngirup seduai iya pan deka pansut. Perening iya Indai Lika benung gali iya lalu bejaku. "Jaga pemakai dik wai enggai ke enda gerai sayau sengayuh aku lama enda makai belakang dik" ku Bini tuai rumah pansut lalu di titih ka indai janin.