SURI

SURI PART 26

SURI
TUSUN 26
DIKARANG DARA MELANJAN

Ari ketiga ari Niang Umang di Anjung ka pendam, Apai Lika berunding deka madah ka ulah bini iya ngagai Tuai Rumah enggau Mikai. Mansang iya ngagai Tuai rumah enggau Mikai ai mata iya semampai terutu ngenang bini iya sigi di balas enggau pemati. "Tuai ke bilik kitai sida Dom aku bisi utai di kerandau ka enggau seduai dik" ku Apai Lika nelai Tuai Rumah. Angkat mih Tuai Rumah enggau Mikai ke bilik sida iya tiga lalu berandau, Indai Lika meda laki iya tama ka bilik tuai tang iya enda ulih angkat laban ka mayuh orang meda.

"Nama mih utai di kerandau ka Apai tuai nya bebai ka bilik, anang anang iya madah pengawa aku munuh Umang, manah aku angkat ngelari ka diri ari ujung bilik pulai ngagai Lika ka langkau" pia dih ku Indai Lika lalu angkat ka bilik nadai mih orang nemu ulah iya laban ka ari nyau jauh malam agi orang benung betungga laban ka deka nyimpan tudah Niang. Bai ati sigi jai nadai mih iya takut ka utai agi. Iya sigi mikir ngelari ka diri.

Dalam bilik sida Apai Lika berandau. "Tuai sebedau aku nerus ka utai di padah aku minta ampun ari ujung buk ngagai ujung kaki, aku nemu aku patut ari dulu madah ka utai tu tang mih aku kasih ka anak bini, tang pemuas aku berunding nya alai aku meseti madah ka kita sebilik kelebih agi dik Dom aku nyukur ka diri minta ampun" ku Apai Lika. Tuai Rumah enggau Mikai beperening pangan diri laban sigi nemu nama utai deka di padah ka Apai Lika. "Aya padah ka dia mih nama utai ka temu dik,ngarap ka utai tu bisi kait enggau pemati Niang bini aku" ku Mikai.

Perening seduai iya mua tudah Apai Lika nyau nyabak sesedan, Apai Lika lalu nusi baka ni pemati Niang Umang nyadi. "Tuai pemati Niang Umang ukai laban orang bukai tang mih laban bini aku Indai Lika, di bunuh iya enggau pengaruh Niang entua aku empu, ketegal iya ka enggai meda Niang jadi enggau Dom, laban iya ka ngasuh anak aku Lika jadi enggau Mikai" pia ku Apai Lika enggau sesabak. Ninga ka munyi nya laban ka udah di temu sapa bagi ka munuh Tuai rumah lalu bejaku. "Ukai aku enda bebasa ka anak aku benung gali di tungga orang tang mih aku sigi bebalas ka pemati anak aku!" Ku Tuai rumah bejaku.

Apai Lika enda memunyi iya semina tunduk nyabak. Mikai begengam jari iya lalu pansut ngiga Indai Lika. Meda tudah pansut lalu di titih ka Apai Lika enggau Tuai rumah. Sida iya tiga gining gining ngiga Indai Lika tang mih nadai di peda. Suri laban ka meda sida iya tiga gegining baka bisi utai di giga iya lalu mansang. "Nama pengawa kita tiga gegining wat, nama bisi utai di peda dik" ku Suri nanya menyadi iya Mikai. "Ni Indai Lika endu, nama nadai di peda?" Ku Apai Lika bejaku meda Mikai Lalu enda nyaut. "Udah tama iya tadi aya, madah diri deka kemi, agi di bilik kini" ku Suri nyaut.

Sida iya tiga lalu mansang ka setak ngiga Indai Lika, Suri deka nanya kebuah tang enda sempat sida iya tiga udah bebai ka setak. "Nya nama ga sida iya ngiga Indai Lika kada enda iya munuh Niang nya wai engka udah di temu but iya" ku Indai Janin bejaku. "Pama aku nemu iya munuh anak aku ukai bebula aku bebalas ka pemati Niang, darah sigi di balas enggau darah enda aku peduli di tangkap polis asal mih pemati anak aku di balas" ku Bini tuai rumah bejaku nyaut Indai Janin. Ninga mih orang mayuh mih betelai enggau pangan diri bisi nya ngasuh bebalas bisi nya enda ngasuh.

Datai sida iya tiga ba bilik, sida iya tiga lalu ngiga Indai Lika ka dapur tang nadai ga senaya iya di peda. "Apu kini ka Indu gila tu nadai di bilik" pia dih ku Apai Lika bejaku. "Anang anang iya udah ngelari ka diri aya, baka ni tu dih apai?" Ku Mikai bejaku sereta iya nanya entua iya. "Sigi udah lari iya tu pintu tu udah nadai di tambit agi, sigi udah iya ngelari ka diri pintar Amai Indai Tuai tu!" Ku Apai Lika. Iya udah enggai agi nanah ka bini iya bai ati pedis sereta malu mih iya nyukung ka diri ba mua tuai rumah.

"Awak ka dulu pagila lusa utai udah di intu kitai ngiga iya, sigi nadai ke bukai mih iya sigi lari ngagai Endu Lika kin iya, aram mih pansut kitai nyau chukup jam tu ka nganjung Niang" ku Tuai Rumah bejaku sambil mulir ai mata ngenang anak iya ka nadai penyalah di gaga baka nya. Sida iya tiga lalu pansut tang mih Mikai Dudi iya ninga utai ari belakang bejaku "BALAS KA PEMATI AKU SAYAU" ku di dinga Mikai ari belakang. Tang mih iya enda malik iya nemu nya sigi Niang Bini iya. Laju kaki iya nyingkang nitih ka seduai nya.

Pulai ngagai Indai Lika ka ngelari ka diri tadi. Lari mih iya ari ujung bilik nengah Tanju. Berumban rumban iya belanda bebai ka pichit pulai ngagai Endu Lika ka tinggal ka diri. Ni ka abis terap tetingkap mih iya bai belanda kaki nadai beselipa bai iya ngelari ka diri, Jam maya nya urung iya pukul 3 pagi agi petang bai ati jai iya nadai takut sekali bejalai kediri ukai nyamai dih bejalai petang kediri maya orang bisi ribat antu magang mih ku aku tang Indai Lika nadai berasai takut bisi sejam iya belanda bejalai ngelari ka diri datai ga ba simpang Langkau Bukit.

Iya lalu belubah lubah mansang Nuju ka langkau enggai ka Lika tekenyit. Datai iya ba Mua pintu iya lalu ngalik ka diri ba tanju bai lelak udah lari. "Enda orang nitih dih nyau semak jam tu endur sida iya nganjung antu" pia dih ku Runding iya. Lama diri iya ngalik ka diri nganti seput ka bisi lantang mimit. Bisi setengah jam iya udah datai nya baru iya ngerak Lika ngasuh muka Pintu. Tuk tuk tuk!!! "Lika buka pintu tu, angkat dik aku tu Indai dik" pia ku Iya bejaku ngetuk pintu.Lika ka ninga orang Bisi ngagau ari luar iya lalu angkat.

"Aik dik pia indai, nama nyau ngenumu nya dik ka pulai ni apai dih?" ku Lika nanya. "Anang mayuh utai di tanya dik, utun magang barang ka di guna dik aram tua anang lama ditu kala ka ari bedau siang" ku Iya majak nyimpan barang ka di guna Lika ka enda nemu utai ta nitih aja mih. Udah tembu seduai iya menyanak beirit irit nengah jalai betenggal ka lampu pichit aja. "Indai, kini tua di bai dik, nama ulah dik tu?" Ku Lika. "Dik ku bunuh dik legi enti majak mayuh utai tanya titih ka aja singkang aku ila aku nusi nganti tua lantang!" Ku iya nyaut. Lika pan lalu badu bebunyi iya semina nitih aja pejalai dituju indai iya...