SURI

SURI PART 28

SURI
TUSUN 28
DIKARANG DARA MELANJAN

Nyau semak dua bulan seduai iya mindai udah pulai ka menua. Dia Lika berunding ngiga jalai ngelari ka diri. Ati iya irau ka Apai iya tinggal nadai nemu kini penunga seduai iya. "Keni mih aku ulih ngelari ka diri ari indai, kasih apai nadai nemu penunga kenduai indai, nama ulah indai ta ngelari ka diri baka tu" ku Lika bejaku kediri dalam ati.

Angkat tudah Lika pulai ka bilik besai. "Indai tu tua udah lantang tusi ka dia nama kebatang tua lari ngambi aku enda tetanya tanya bakatu" ku Lika. "Dik ka nemu nama kebuah, aku udah munuh Umang ngena pengaruh aki dik tang mih apai dik jai madah ka tuai rumah enti enda pia nadai aku tu ngemai dik nya lari" ku Indai Lika. Nya mih Lika tekenyit ngiga indai iya berani munuh orang. Nadai mih iya nemu Umang udah nadai ngelamatu. "Apu indai nama dik berani munuh Endu, nama dik enda ngasai ka diri salah anak menyadi apai dibunuh dik indai betunggal aku nya!! Lapa mai ati dik ta jai amai suba Suri di gaga dik baka nya tu Umang mati dik ila indai enti orang bebalas nama dik nadai ngerunding tua apai!!"ku Lika bejaku.

Angkat iya mansang ngagai Lika lalu  di cekak iya. "Dik berani rani ngajar aku, dik enti aku ka munuh ulih mih enda ngira dik anak mih aku!" Ku indai Lika bejaku. Lika lalu badu memunyi ninga diri deka di bunuh Indai iya. Nyau takut tudah Lika laban nemu indai iya berani kempang munuh orang. Malam ari kekasak tudah Lika berunding ka ngelari ka diri ngambi iya lepas ari begulai enggau indai iya. Angkat iya begadai gadai nuju peninduk indai iya Peda Lika jenak indai iya tinduk.

Nikal iya pulai ka peninduk, iya lalu ngadu ka gari ka ulih di bai iya. Mupuk begadai gadai iya nengah dapur pansut ka ujung tanju. Berumban kaki iya nyingkang enggai ka ari nyau jauh malam betengal ka lampu pichit enggau senaya bulan nya mih kena Lika ngelari ka diri.Lama iya belanda nuju simpang nyau pemuas datai ga iya ba mua jalai. Iya lalu bejalai semalam malam. Penakut nibuh di kira malik kiba kanan mih iya laban ka takut. Jam maya nya urung iya pukul 2 pagi.

Semalam malam mih tudah Lika bejalai iya ngetu ba siti langkau umai alai iya neduh ka diri lelak. Ari nyau majak kerebak tawas. Iya nyau tetinduk ba langkau nya. Tumu pagi bisi apai enggau indai tuai orang datai ka langkau tekenyit meda Lika ngali ka diri ba langkau seduai iya. "Endu dani endu nama dik tinduk ditu, sapa nama dik ari ni dik, nama dik baka ka lari ari rumah?" Ku Apai Tuai nya nanya. Angkat tudah Lika iya lalu duduk gamal iya nyau puchat bai kelalu jauh pejalai malam tadi. "Aya ibu aku minta kasih tulung aku nganjung aku pulai ka menua apai aku, nama aku Lika uchu Manang Limbang ari menua ili nyin rumah panjai sida Aki Tuai rumah Lidum, ninga ka nama Manang Limbang apai gau indai tuai nya tekenyit laban seduai iya chukup ngelala Manang Limbang nya di menua sida.

Lama Apai enggau Indai tuai nya beperening pangan diri seduai iya sama takut laban orang ka nama Manang Limbang nya Chukup berita enggau penyai sapa nangkah penemu iya sigi di bunuh enggau pengaruh ti bisa. Nyau pemuas seduai iya enda bebunyi Lika lalu nanya baru. "Ulih seduai nganjung aku Ibu Aya, kasih ka aku ibu, aku lari ari rumah laban ka di bunuh indai aku, nya alai aku lari, enti seduai enggai nulung aku nadai ngawa ibu meri aku duit ke tambang bas mulai ka diri" pia dih ku Lika bejaku.

Meda pia Apai tuai nya lalu nyaut "Au mih endu aku nganjung dik ngagai menua apai dik enggai mih aku meda dik merinsa baka tu" ku Apai tuai nya bejaku. Lika lalu gaga. Sebedau nurun Lika di beri indai Tuai nya makai dulu nangka iya lapar udah bejalai semalam malam tadi. Udah tembu sida iya lalu mupuk Lika lalu di sekambung seduai iya ngena kain ngambi ka nadai orang meda. Mupuk mih sida iya tiga nuju ka sibu..

Ba rumah panjai sida indai lika.

Pagi nya indai Lika angkat peda iya bilik agi petang. "Laun ga indu tu dani ngemuruk nya ka angkat ngelumai kopi, nya mih nadai orang laki ka ke dik nya" ku iya kuchau kuchau. Nadai mih iya nemu pengawa Lika ka lari. Angkay iya tadi lalu nuju dapur iya lalu nangal ka kitil kena ngelumai kopi dah nya lalu berapi. Udah ketembu peda iya mata panas nyau udah manchal bedau ga Lika dani. Meda Lika bedau angkat iya lalu mansang ka peninduk Lika.

Buka iya pintu peda Lika nadai gali di peninduk. "Apuuu berani anak tu ngelari ka diri nadai geguna anak baka dik nya, legi dik temu aku dik nya, nadai bangat jauh dik nya bejalai nadai duit dik ketepan pulai kin!!" Ku Indai Lika bejaku mata iya bekuring iya lalu pansut ka ruai ngagau ka anak madi iya Belayong. "Dom ohh dom ni dik" ku Indai Lika. "Tu aku ibu nama nya di baruh ditu aku ngadu ka moto" ku Belayong nyaut. Iya lalu nurun ka Baruh.

"Dom aram tua pasuk ka baju dik ngiga endu tua lari iya demalam" ku Indai Lika. Belayong enda tekenyit laban iya meda Lika ngelari ka diri demalam tang iya enda madah laban iya ninga randau Lika enggau Indai iya maya iya ka tama ka bilik. "Anang guai ibu kereta aku tu enggai nyadi idup nganti enda lama mih" ku Belayong nyaut. Kebatang iya kereta iya manah tang sengaja ngambi Lika ulih ngelari ka diri. "Ehh au mih enti udah madah legi enggai ka nyau jauh pejalai iya nya" ku Indai Lika. "Au ibu au" ku Belayong nyaut.

"Ngarap ka dik ulih lari mih endu kasih pengidup dik begulai gau ibu baka nya nyau gila, minta ampun ibu aku ngemula ka dik" ku Belayong. Indai Lika nyau kekasak enda puas ati meda Lika ngelari ka diri. "Sial anak baka dik nya Lika, enti di temu ku bunuh dik nya legi ngenusah ka aku nadai geguna dik nya idup, ta tungkup ka dik nya ada suba!!" Ku Indai Lika kekuchah bejaku ke diri. Empa pemedis ati nyau enda ingat ka diri berapi sium nyau bau rum bilik asi iya angus.. ipak jai nyamai makai asi angus. Lapa enda iya angus gaji litan jai..