SURI

SURI PART 1

SURI
TUSUN 1
DIKARANG DARA MELANJAN

   Di menua Tinting Melanjan bisi siku indu benama Suri, Suri diau enggau aki ini iya ba langkau kediri jauh ari rumah panjai, laban ka Suri enggai di peda sida iya serumah, Laban Suri anak ampang, anak buai pia dih ku jaku sida. Aki enggau ini iya mih ke ngibun Suri ari mit nyentukka besai. Lemai nya, kira ke silau mata panas, dia dih Suri duduk nunga aki iya ka ngeraut wi di tanju. "Aki, nama Suri selalu amai di keji ka kitai serumah, salah Suri nyadi anak ampang?" Pia dih ku Suri nanya aki iya. Lama aki ya ngenung meda mua tudah Suri.

    "Enda salah uchu, anang ninga ka jaku orang, kitai ga ke diri" ku Aki Suri nyaut. "Au mih aki badu ga aku kiruh" ku suri, iya lalu angkat kediri ka bilik. Laban nangi ka nyau jauh malam, suri pan alu berenah, udah ka tembu iya lalu ngagau ke aki iya tama. "Aki, umbas agi nuan diak, legi petang sepetang utai, enggai ke nyau malam, ngetu dulu dik" ku Suri rerauh ari dapur. "Ini dulu ngintu diri dulu, Umbas berayam ka tikai nya, ukai lansik mata dik nya" ku Suri ngagau ke ini iya.

     Makai mih sida iya tiga lemai nya. Udah ka tembu aki iya duduk ba mua pintu, sambil ka ngeraut wi. Ini iya nyau ngali kediri ba peninduk ngenat kediri. Suri agi ngintu utai di dapur. Laban ka diau di langkau ukai baka diau di rumah panjai nadai karan. Ngena put kekula mih sida iya tiga ngaga kelita. Kena nyerang ka langkau. Umbas iya pemesai mih langkau sida ya tiga. Laban ka aki Suri tu sigi agi kering pendiau. Lempung magang semua pengawa di kereja ka iya..

    Udah ka tembu gawa di dapur Suri lalu mulai kediri ka peninduk. Dunga dunga mih iya laban  bedau ati ka tinduk, agi tumu ku anak ati iya. "Ini, pagila Suri nyangka niki ke rumah panjai dulu deka meli kupi enggau gula ka kitai tiga" ku suri. "Nibuh mih dik uchu, ngelakka aki dik aja ke atas kin" ku Ini Suri. "Enda ngawa ini, Suri aja mih kin, nadai utai di kenangi ka dah" ku Suri nyaut. Ninga ka Suri munyi nya, enggai ga ini iya nyagang agi. Ini iya lalu mejam ka mata. Suri lalu ngalik kediri.
Tinggal aki iya bedau ngalik kediri laban deka ngambis ka wi ka bedau di raut iya..

~~~~~~~~~~~~~~~
    Pagi nya, tumu Suri angkat, iya lalu nurun ke pendaie laban deka ngauk ka ai. Udah ka tembu ngauk iya lalu mandi. Udah tembu Suri lalu  mulai kediri baru. Datai di atas iya lalu nangal ka kitil. Udah tembu ngelumai kupi,Angkat iya ngerak  aki enggau ini iya. "Aki ini, umbas nya dani seduai tu aku udah ngelumai ka kitai tiga kupi" ku suri. Ninga uchu iya ngerak angkat ga tudah aki Suri lalu nuju tanju empugau mua. Ini Suri laun gi angkat pedis belakang ku iya.

     "Aki, pagi tu tumu mih ku niki ka atas legi, enti kelalu laun panas aku nengah jalai" ku Suri. "Au mih uchu bejimat mih dik legi anang ngerindang diri rantau jalai" ku aki Suri. "Au aki, enda mih ku ngerindang diri" ku Suri nyaut. Iya lalu nyediaka  perengka ka di bai iya ke atas. Laban ka jauh umbas iya endur mulai ka diri ngagai rumah panjai, tembu iya nyediaka perengka iya lalu madah ka diri mupuk..
"Aki ini, mupuk dulu aku, ngalih ke tengah ari aku mulai kediri" ku suri. "Au uchu au jimat ka dik" ku ini Suri.. Mupuk mih Suri nengah jalai betengalka picit laban jalai ka agi petang tegayam..

~~~~~~~~~~~
Ba rumah panjai..

     Datai Suri, iya lalu nuju kedai tuai rumah, nasib mih tuai rumah sida iya manah. "Bisi diak dik aya?, aku tu suri" ku iya ngagau. Enda lama udah nya di bukai tuai rumah pintu kedai. "Nai nuan tadi endu, bisi aku anak tama mih, nama utaika di beli dik?" Ku tuai rumah. "Ka meli kereban dapur mih tu aya, lama amat udah puang utai di langkau din, nya mih kitu" ku Suri nyaut. "Au pilih ka dia mih, ni aki enggau ini dik gerai seduai?" Ku Tuai rumah. "Gerai seduai iya nadai ngawa" ku Suri.Nurun bini tuai rumah ari sadau meda Suri. "Nai dik tadi endu, kumbai ku sapa tadi, sapa enggau dik, ni aki ini dik gerai?" Ku bini Tuai Rumah. "Au aku mih ibu, nadai orang enggau aku tadi, aki enggau ini di langkau gerai seduai iya, aku deka bebeli ka perengka dapur" ku saut Suri. "Au endu dia dulu mih aku ngelumai ka kitai ai kupi dulu" ko Bini Tuai Rumah.

    Udah ka tembu ngirup begulai enggau Tuai Rumah Suri lalu madah diri deka mupuk mulaika diri.. "mupuk aku ibu, aya, kasih ini enggau aki nganti penantai aku legi" ku Suri. "Nadai ku enggau mih anak nuan ga enggai lama, jimat ka pulai legi ninga" ku Bini Tuai Rumah. "Au ibu, mupuk mih aku" ku iya. Mupuk iya mulai kediri. Enda memukai indai Tuai siku tepeda ka iya, Indai tuai nya sigi enggai meda Suri...

     "Apu anak ampang tumu amai dik kitu, nama pungka dik kitu, kami udah madah suba anang mulaika diri kitu dik!!!" Ko indai tuai nya. Iya lalu ngagau ka bala mayuh ka duduk di ruai. "Wai, wai kitu kita peda bisi anak ampang di baruh dedin" ku indai tuai nya.Angkat mih urang nyau begau sida iya enggai meda suri. "Amat nadai empedu malu dik nya anak ampang" ku indu siku. "Nyah tanjah ai enggau, anak ampang ngudi ari!!" Ku indu siku ga nyaut. Suri nyau enda dapat bejaku iya lalu belanda landa ngelari kediri. "Badu kitu dik enti enggai mati" ku Indai tuai nya. Ninga Bini tuai rumah tadi sida iya begau di luar. Malik iya peda Suri belanda lari.Mansang iya ke tunggung bala mayuh dia dih bini tuai rumah lalu bejaku.

     "Nai salah pengawa kita baka tu, nyau nadai adat kita enti baka tu, nama kebuah kita ngutik Suri baka nya!! Nadai penyalah di laya kita enda beiga iga iya, kita ku ukum kita ila pama kelalu amai, enggai meda orang uji mata kita nya acuk!!" Ku bini tuai rumah nganu sida. Peda ka sebal lari abis teterap tetingkap sida lari ka bini tuai rumah. "Ketegal ulah kita ka enda menuku nya mih sida iya tiga merinsa diau di kampung puang kediri diri, puas aku beratika ulah kita ku buru kita ari rumah panjai tu ila, nadai nemu beguna ka rayat ka jai" ku Bini tuai rumah kekucau niti ruai  mulai kediri ka bilik......