SURI

SURI PART 25

SURI
TUSUN 25
DIKARANG DARA MELANJAN

Nyau bebulan udah berandau datai ga ari deka melah pinang Janin enggau Lenta, Umang enggau Mikai di sereta ka Tuai rumah sekali. Gaga mih tudah Indai Janin enggau Bini tuai rumah nyambut menantu. Mabuk mih seduai iya laban ka berambu isan enggau orang ta nadai di kelaung ka seduai iya mih tiap kali orang nyadung ai. Laban ka da Bisi rami ba rumah panjai Dia tuai rumah ngasuh bepadah ka langkau sida Indai Lika ngasuh pulai.

Gaga mih Indai Lika ninga ka tuai rumah ngasuh pulai nadai mih iya nemu Mikai di sabung jadi enggau Umang. Laban ka laun datai enda meda iya Umang enggau Mikai di sanding duduk ba tawak. Semina iya nemu Janin aja ka Bebini. Laban ka enda berentak nemu dia dih iya nanya Indai Dino sapa ka melah Pinang meda ka ruai Tuai rumah mayuh mensia duduk "oh wai, sapa ka bebini belaki ta mayuh amai orang duduk enda di kelala ba ruai sida Tuai din" ku Indai Lika. "Au Umang enggau Dom Mikai jadi wai, sida iya empat Janin enggau Madi Mikai ka indu" ku Indai Dino. Ninga ka nama Mikai Jadi enggau Umang anak Tuai Rumah nya mih Mua iya berupai angat iya lalu tama ka bilik.

"Sial, mati dik Umang dik enda ulih jadi enggau Menantu pilih Aku, enda aku takut ka indai dik, malam tu dik sigi mati di jari aku!" Ku Indai Lika lalu ke dapur ngambi kain chelum ka di tepu iya dalam kambut ka di kait iya ba dapur. Ambi puchung mit lalu di bai iya pansut ka ruai. Mansang iya nuju ruai sida Tuai rumah nya mih iya lalu merap Umang, "selamat melah pinang Umang ngagai Seduai dik Dom" ku Iya merap Umang. Sambil iya murus belakang Umang ngena puchung ubat siti, Umang lalu meri Ai tuak ngagai iya tang mih  di asuh iya nyilih gelas dikena iya. "Terima kasih ibu, nasib ga seduai  aya nemu mulai ka diri kumbai ku enda pulai mih kita" ku Umang. "Nemu endu, laban sida apak dik bisi ngetu kia empai lama" ku Iya nyaut. "Au, terima kasih ibu au" ku Umang.

Indai Lika lalu ngaga diri duduk ba sepiak bini tuai rumah. "Mati mih dik enda lama da Umang" ku iya tetuchum. Empai jauh Tudah Umang nyingkang  ka Kaki ngagai bala temuai ka datai dia dih iya lalu tegali. Nya mih orang nyau begau meda Umang tegalik ba tengah Ruai. Pengudah ka ngirup ai ka bisi di tepu ka Indai Lika utai. Nadai mih orang nemu nya ulah iya. Meda umang nyau temuntah ka darah mata nyau ngelanit dia dih Mikai sereta Tuai rumah lalu ngatung Umang ka Bilik.

"Sayau nama pedis dik madah sayau, anang baka tu, nama utai makai dik intan" ku Mikai merap bini iya enggau sesabak. Umang udah nadai nemu utai semina ninga nyawa orang aja tang enda ulih bejaku. Bini tuai rumah nyau nyabak rerauh meda anak asi iya nyau nadai nemu orang agi, orang anang ngira nyau penuh ba dalam bilik laban ka begau, nya mih Indai Lika ngaga diri enggau orang. "Udah iya ngirup enggau dik iya baka tu tadi wai nama utai di beri dik ngagai anak aku" ku Bini tuai rumah nunjuk ka indai lika.

"Dik anang nunduh ngapa wai, amai jai nadai aku ka munuh anak dik nya" ku Indai Lika ngering diri. "Dik anang memain enggau aku wai, enti ku nemu nya ulah dik ukai sengayuh kena ku malu dik senapang gajah kena aku munuh dik!!" Ku Bini tuai rumah enggau sesabak. "Umbas seduai dik wai anak tua nya udah nadai nemu orang agi, baka ni kitai enggau tu" ku Tuai Rumah bejaku iya nyau tusah ati. Umang udah nadai nyadi mensia agi nganti ka padam seput aja.

Nya mih orang ka sinu nadai enda nyabak meda. Suri sigi udah lama deduie nyabak merap Lenta. Ngenang Umang ka ninggal ka madi iya nadai bepadah. Iya ga ari seduai iya di padu umang ninggal ka Mikai. Angkat tudah Mikai lalu mansang ngagai Indai Lika. "Dik ibu, udah chukup endur aku bebasa ka dik!! Nyema aku nemu nya ulah dik ukai dik aku bunuh tang anak dik LIKA aku Bunuhhhhh!!!" Ku Mikai nunjuk ka mua Indai lika.

Apai Lika laban nemu nya sigi ulah Bini Iya pulai iya ka bilik peda iya kambut chelum enggau Kain Chelum atas Mija. Nemu mih iya nya indai Lika. Berumban iya nepu utai nya ngagai benda, ukai ngelalai ka penyalah Bini tang kasih ka anak iya Lika nadai nemu utai ka tinggal kediri diri ba langkau. Iya lalu pansut ka ruai baru. Sunyi mih Ruai nadai betundi agi semina tinggal leka sabak menuh ka ruai.

Indai Lika sigi agi ngering diri ngumbai diri enda Munuh Umang. Indai Janin pan bejaku. "Eh sigi dik munuh Umang nya, laban dik sigi ka ngambi Dom Mikai nya ka menantu nadai enda nemu kami tu ulah dik nya suba ngenyati Dom ngambi jadi enggau anak dik" ku Indai Janin. "Jai aku nemu berubah ukai nya aku aja ka jai. Kada enda Suri ka Munuh Umang laban Mikai ka  enda Jadi enggau iya" ku indai Lika ngalih ka jaku. " Dik wai peda dulu ka bejaku, kapa Suri nya jadi enggau Dom, madi iya nya dik aja ka enda nemu Mikai nya madi Suri" ku Indai Janin.

Nya mih iya tekenyit laban enda nemu ku jaku iya ngalih ka jaku ngambi orang enda nyangka iya. Lama iya berunding ngiga jaku. "Tau uji ga giga utai ba tubuh aku, enti amai aku!" Ku iya ngelaban. "Umbas  kita umbas anak aku udah nadai bebasa ka iya!! Ukum aku kita legi bangat enda bebasa ka anak aku!" Ku tuai rumah. Sida ka bukai nadai memunyi. Ni ka ngadu ka utai di bai Niang, meri niang  mandi.Bini tuai rumah mina deduie enda dapat bejaku agi.Suri pan pia enda angkat semina  merap bini tuai rumah. "Chukup puang aku ila asi dik udah ninggal ka aku, ku jaku saritu melah pinang seduai Dom nemu nya ngintu dik" ku bini tuai rumah madam dada....