SURI

SURI PART 23

SURI
TUSUN 23
DIKARANG DARA MELANJAN

Pemuas seduai iya ngirup beterauh ngiga tuak abis setajau, manuk Indai Lika ka di bunuh seduai iya nyau Abis. "Amai pama mih seduai dik nya begulai dih apai, manuk Indai Lika di bunuh seduai, bisi ukum orang seduai dik nya ila" ku Tuai Rumah ngelara seduai iya. Nadai mih seduai iya mending ka jaku Tuai Rumah nyau majak ka enggau seduai iya aja. Abis tuak kin seduai iya beririt irit ngagai bilik sida Aki Suri. "Aya ohh aya meri tuak aya aus nyawa tu" ku Indai Janin. "Tama mih seduai legi Endu ngulih ka seduai" ku Aki Suri.

Angkat Suri ngulih ka tuak. "Nya ibu tuak seduai, ngirup mih, legi aku manduk ka tabas" ku Suri iya lalu ngagai dapur manduk kasam ikan ka di gaga Ini iya dulu suba. Bendar mih seduai iya ngirup mansa Mikai Alu di tarit Bini Tuai Rumah ngirup. "Ngirup kitai Dom, pagila pulai Umang aku, ila dik meda anak dara aku" ku Bini Tuai Rumah. "Dik anang ngambu Lenta dik, nemu ku anak Bujang dik bedau bebini, endu nya ambu aku nemu dik" ku Indai Janin ga. "Ehh enda aku dih Dom Mikai tu sigi Ambu aku" ku Bini Tuai Rumah.

Mikai ka ninga seduai iya semina tetuchum, Lenta laban ka ba dapur enggau Suri manduk ka tabas. "Pama diri entua dik nya Mang, munyi ku dik iya, tau sedia sengayuh ila" ku Suri nundi Lenta. "Sengapa dik aka, mali malu orang ngena sengayuh" ku Lenta ketawa. "Aka, ninga dik ibu Indai Janin madah ibu bini tuai Rumah bisi anak bujang kada enda satup iya enggau dik nya ila dah" ku Lenta. "Eh anang bejaku sengapa dik, nya anjung kin nya" ku Suri nyaut.

Seduai iya sama ka bilik Besai nganjung kasam tadi, sida tiga nya benung bendar ngirup. Ka pama gik nyau betunging ngirup. "Amai bendar mih kita nya, nya anang ngirup agi legi, galau nyawa seduai" ku Suri. "Kapa ka ngalau nyawa, pama ka ngirup nadai nemu ngalau iya arh" ku Indai Janin nyaut. Nyau pemuas sida iya ka ngirup nyau ga abis tuak, Suri enggai agi mantai ka sida iya, laban ka ingat ka berandau lemai nya legi.

"Enggai mih Endu meri agi, pulai tua, lemai legi ngirup baru pala aku asai tinggang lesung batu" ku Bini tuai rumah. "Baik mih lesung batu enti enggau aku tu nyau asai ka tekung dik ngena sengayuh" ku Indai Janin. Nya mih seduai iya sama engkakah. "Enti dik agi gila sigi sengayuh mih kena ngidup ka dik" ku Bini tuai rumah. "Eh aram pulai tua, ka tinduk dulu aku, lemai legi tua ngirup baru, lemai legi aku ka nanya Endu Lenta" ku Indai Janin.

Nya mih seduai iya sama mulaika diri beririt irit. Mansa siku tarit seduai iya, mansa siku kenya ga seduai iya enggau. Penatau nadai ngira majak tatau. "Amai gila mih seduai dik nya, abis orang kachau" ku Tuai rumah ngilik ka pala. Pemuas seduai iya ka beririt peda tegalik seduai iya ba ruai nyau telentang lakak lakak ba ruai.

"Chukup mih seduai dik nya, uji te tekung enggau sengayuh jera nadai mending ka jaku" ku Tuai Rumah. Benung iya ka kekuchau peda datai kereta anak bujang iya enggau anak dara iya. "Apu seduai tadi Dom Mang, lalu mih tama, nadai indai seduai nya nemu seduai pulai mabuk nya" ku Tuai rumah. "Dini seduai iya nya ngirup ngemendar nya tadi apak ku anak Bujang Tuai rumah benama Jawan nanya.."Eh din seduai iya nya ngirup ba aki dik setak din, dulu tadi di ruai diak "ku Tuai Rumah.

Ba bilik Suri.

"Endu nyin anjung ka aya dik kasam ensabi ka pinta iya kemarik" ku Ini Suri ngasuh nganjung kasam ngagai Tuai rumah. Nyau mih Suri nganjung kasam ngagai tuai Rumah. "Ni dik aya, tu kasam dik asuh Ini anjung aku" ku Suri nadai ga orang nyaut. Ke dapur iya nya meda sida nya menyanak benung bekedunga. "Bisi seduai tadi pia Umang" ku Suri. "Bisi, baru datai kenduai iya" ku Umang nyaut. Jawan ka meda Suri nyau enda telilap laban ka enda kala meda Suri semak, agi Suri diau di langkau nya mih iya jarang meda.

"Au, tu ka nganjung kasam ngagai aya, asuh Ini tadi" ku Suri iya nyau enda nyamai lama dia laban ka di peda Jawan enda berilap ilap. "Au nya simpan dia Endu" ku tuai rumah. Udah Suri ngengkah  kasam nya, iya lalu minta diri pulai. "Pulai ka bilik dulu mih aku aya, agi bisi pengawa aku tu tadi" ku Suri. Udah Suri pansut nya mih tuai Rumah bejaku. "Pama dik Dom, ngemendar nya meda Indu Dara" ku Tuai Rumah. "Ba iya apak, pama amai nyau enda telilap iya" ku Umang nundi. "Eh seduai tu apak nyau enda tau meda orqng indu kami tu" ku Jawan nyaut.

"Enti ka anang lama kala ka endu nya agi dara" ku Tuai rumah. "Ehh sengapa seduai, nadai orang ka ke kitai nadai penyigat" ku Jawan. "Nadai orang milih penyigat Dom, budi basa di giga indu ka diatu" ku tuai rumah. "Ba iya apak, aku enda ngiga penyigat asal mih budi basa iya manah" ku Umang nyaut. "Eh dik nibuh ngiga endu udah bisi nyin din madi bujang Endu Suri nya empu dik" ku tuai rumah.

Nya mih Umang nyau tegenung ninga Suri Bisi madi bujang. "Bisi madi bujang Suri pia apak, ketemu aku iya nadai madi ka siku aja" ku Umang. "Eh baru temu diatu Umang, anak apai iya" ku Tuai rumah. "Sigat apak, ulih ku kin meda" ku Umang. "Piiii kanji nyau enda tau ninga madi bujang orang dik nya" ku Jawan. "Kati dih ukai baka dik milih" ku Umang alu mansut ka diri selabuh nya Mikai mansa tanju sida iya laban ka pulai ari kedai.. "apuu sapa indu dara nya, bajik amai" ku Mikai bejaku kediri.

"Sigat amai laki nya, kada enda madi bujang Suri nya, bula ngumbai enggai wai, enti iya nanya aku enda ngumbai diri enggai aku" ku Umang lalu mulai ka diri ka bilik. "Apak ohh apak, sapa laki sigat ba luar nyin" ku Umang. "Nya mih madi bujang Suri" ku Tuai Rumah "sigat apak enti orang nanya sigi nerima aku" ku Umang. "Amai kanji dik nya Mang, baka enda kala meda orang laki dik nya" ku Jawan agi ngelaya Umang. "Sibuk dik nya neh dik enda mih kala meda Indu dara, nya Suri tama nyau enda berilap ilap dik" ku Umang enggai alah. Bendar seduai iya bekerakal laban ka sama bela enggai alah.