SURI

SURI PART 27

SURI
TUSUN 27
DIKARANG DARA MELANJAN

Udah ka nganjung Niang Umang ari pendam. Apai Lika deka mulai ka diri ngagai Langkau, seraya ka ngabas Lika ka tinggal laban bini iya enda temu kini ka tungga lari. Mansang iya ngagai Tuai Rumah ka duduk di ruai iya lalu ngenuduk ka diri. "Udah makai dik tadi par?" Ku Tuai rumah nanya. "Udah Tuai, tu deka madah ka dik aku deka mupuk mulai ka diri ka bukit, kasih ka endu Lika kediri diri di langkau, engka gila nya enda kia ngelari ka diri" ku Apai Lika bejaku. "Au mih par jimat ka dik pulai, nyema bisi utai di padah anang enggai pulai ka rumah kitu" ku Tuai rumah. "Au tuai, nadai aku enggai madah ka dik, siti da minta ampun mih aku ngari ka indai tuai Gila nya, nyema kita ka bebalas aku sigi enda mantah anang aja kita munuh kenduai anak aku Lika, laban endu aku enda nemu utai" ku Apai Lika lalu angkat mulai ka diri ka bilik..

"Kasih mih dik nya Sawing bulih Jantang ka kelalu jai Lintan, minta ampun mih aku par ukai ka bebalas sengapa tang mih aku bebelas ka pemati anak aku ka enda besalah" ku Tuai Rumah. Apai Lika enggau Bini tuai rumah setunggal nya mih Apai Lika chukup bebasa ka tuai rumah enggau Bini Tuai rumah. Maya agi mit kelia Ba sida Bini tuai rumah mih Apai Lika ngidup ka diri laban apai Indai iya ka udah nadai, karam bai ai bah ba menua Tinting Melanjan dulu kelia.

Mupuk mih Apai Lika pulai ka Bukit semina ngena Moto aja. Laban ka ngena moto nadai lama mih iya datai. Pemuas iya ka bejalai tama ka dalam, peda iya pintu ti ditambit. "Pama endu tu betambit pintu ngalih ari tu" pia ku Apai Lika bejaku ka diri. Sekali iya datai peda iya Pintu di tambit ari Luar. "Apu kada endu Tu bisi ditu, kada enda udah di bai gila nya lari endu aku dih!" Ku Apai Lika. Iya lalu ngerumpang pintu peda nadai orang sekali dalam nya, di peda iya gari gari enggau barang ka di guna Lika enggau bini iya udah nadai agi.

"Lari mih iya tu ngemai endu aku, kini mih penunga seduai iya kasih mih endu aku enda nemu utai di bai indai iya baka nya" ku Apai Lika duduk nyandih ba mua pintu. Lama diri iya ngenung berunding baka ni ngiga Indai Lika enggau Anak iya Lika. "Baka ni mih aku ngiga seduai iya ukai endu nya bisi talipun binching kena aku begiga ke seduai iya, nguji mih aku ngiga ngagai menyadi Indai Lika" ku Apai Lika angkat lalu nurun ka tanah baru bejalai pulai ka simpang rumah panjai.

Datai iya ba rumah panjai dia dih Indai Janin lalu nanya meda iya gesah gesah niki tangga. "Nama ga dik nyau gesah gesah apai endu, nama utai k di perumban ka dik?" Ku Indai Janin nanya. "Eh endu enggau Indai Iya nadai di langkau enda temu kini penunga nya aku tu gesah gesah ka mai tuai begiga ka seduai iya" ku Apai Lika nyaut "au legi aku madah ka Dom enggau Apai iya mih besaup ngiga" ku Indai Janin lalu tama ka bilik. Apai Lika lalu tama ka bilik tuai rumah.

"Eh dik aya, din sida apak tadi di dapur" ku Jawan anak tuai rumah ka laki. Mansang mih Apai Lika ka dapur iya lalu bejaku. "Tuai nadai gila nya di langkau udah bai iya lari endu" ku Apai Lika. "Apuu kini buntas nya mai endu dih giga nya kasih endu nya bai iya gila baka nya" ku Bini tuai rumah. "Anang guai kitai ngiga iya nganti utai udah tembu ila kitai ngiga agi mali amai kitai begiga ngereja utai dalam kandang ngulit tu, dik wai jaga mih jaku anang nitih ka pemedis ati" ku Tuai rumah bejaku sambil iya ngelara bini iya enggai ka kelalu kasar.

Ninga Tuai Rumah bejaku munyi nya badu ga bini tuai rumah bejaku, tama ga Apai Janin enggau Janin kia lalu duduk. "Nama amai utai ka di padah Indai janin tadi unggal, amai endu enggau Indai iya nadai di langkau?" Ku Apai Janin nanya. "Amai unggal tang tuai empai ngasuh ngiga seduai iya, kasih endu aku di bai iya gila baka nya" ku Apai Lika tunduk nyabak ngenang anak asi iya di bai Indai Lika lari..

Ba Indai Lika ka lari seduai iya menyanak pagi nya ngelari ka diri ka mua jalai. Dia dih seduai iya ngipak bas lari ka sibu. Lika sigi enda nanya laban takut ka Indai iya nitih aja mih seduai iya. Nasib seduai iya tumu bas pan datai seduai iya lalu tama bas. Datai seduai iya ba pasar sibu Indai Lika lalu mai Lika nepan bas siti da pulai ka menua Indai Lika.

"Indai nama tua pulai ka menua, nama apai enda enggau tua kasih iya ngiga tua ila tua enda madah" ku Lika. "Dik anang kelalu mayuh jaku enti asai agi ka idup ba dunya tu" ku Indai Lika nyaut anak iya. Badu tudah Lika bejaku nyabak iya ngenang Apai iya ka tinggal nadai nemu pejalai seduai iya mindai. "Kasih apai, ila mih aku ngelari ka diri pulai ngagai dik apai, enggai aku diau enggau indai enti nyau majak ka munuh aku" ku Lika mejam ka mata iya

Datai seduai iya di menua. Bejalai kaki seduai iya tama ka simpang rumah panjai. Datai ba rumah panjai nadai enda orang nanya ka Apai Lika meda seduai iya menyanak bebai ka beg besai. "Nai endu ni Apai dik enda enggau seduai mindai pulai?" Ku Indai tuai siku. "Enda ibu apai keja jauh nya tua indai pulai kitu enda lama" ku Lika nyaut. Tama seduai iya ka bilik nya mih gamal bilik enda temu tungga laban ka lama nadai orang ngibun sepengudah aki enggau ini Lika udah nadai.

Nadai enda orang takut ka sida iya sebilik laban ka ngebuan pengaruh ti bisa ba menua nya. Pama enggai di peda sigi di bunuh nya mih orang takut laban enggai di bunuh. "Sapu magang bilik nya Lika anang mayuh utai tanya dik sekumbang ka diau ditu ila aku madah nganti lantang" ku Indai Lika bejaku. "Au mih indai" ku Lika angkat lalu nyapu. Indai Lika lalu pansut nuju kantin tuai Rumah bebeli ka barang dapur.