SURI

SURI PART 31

SURI
TUSUN 31
DIKARANG DARA MELANJAN

Bendar mih sida iya serumah begau meda tudah Indai Lika lalu bedau ngeleda. Meda pia Suri lalu bejaku ngagai Mikai. "Aka anjung entua dik nya ke Sepital nadai kitai nemu ngidupka iya nya, tu nyau 2 jam lalu bedau ngeleda" ku Suri bejaku. Lama Mikai enda nyaut iya majak meda Lika nyabak. Dalam ati iya berandau ka diri. "Baka nya aku lenyau bini ti dikesayau suba, lapa mih dik nya enggai mati di palu indai" ku Mikai.

Meda Mikai lalu bedau ga nyaut dia dih Suri nanya iya baru. "Aka ninga dik utai dipadah ka aku tadi, anjung alai dik entua dik nya, nadai nemu nya idup ka mati, alu bedau ngeleda iya" ku Suri merak belalai. Nyau gidan tudah Suri meda Mikai lalu enda mending utai ka di sebut Suri. Tekenyit tudah Mikai iya lalu nanya baru nama utai ko Suri. "Nama utai ko dik mang?" Ku Mikai.

Di perening tudah Suri tudah Mikai meda alu enda ninga utai di padah ka iya. "Apuu kini ka pending dik nya lalu enda ninga utai ko aku, nyin entua dik nyin anjung ke Sepital alai dik, nadai kitai nemu idup ka enda tu nyau 2 jam udah" ku Suri nya baru Mikai nemu utai ko madi iya. "Ehh kapa nganjung iya nya, idup nadai mih guna mati tau mih" ku Mikai nyaut madi iya Suri belalai. Tekenyit tudah Suri ninga Mikai bejaku ta munyi nya.

"Aka, utai udah anang di ingat alai anjung iya, enggai dik meda anang kelalu berupai, aku nemu dik jadi enggau Lika sigi deka bebalas" ku Suri bejaku. Lama tudah Mikai enda bebunyi. Nyau tegenung baru ga iya. "Ngenusah ka aku uji mati ney" ku Mikai betelai ati kediri. Angkat iya ari penuduk seduai iya Suri iya lalu mansang ngantung tudah entua iya Indai Lika pansut. Malik iya ka belakang lalu mai Lika enggau Apai iya nurun "Aram arh nganjung indai ke Sepital" ku Mikai.

Ninga munyi nya berumban ga tudah entua iya ke laki enggau Lika angkat. Ba setak Bini tuai rumah ka meda lalu bejaku enggau Indai Janin. "Peda dik nyin wai, kini antu sebayan nya ulih ngantung, lapa enggai mati sekali dih ngenusah ka menantu aku" ku Bini tuai rumah bejaku. "Entah dih wai kada enda mati iya tadi di jamah tua, pahai tua tangkap polis ila" ku Indai Janin. "Enti tua tangkap polis nyin dom Mikai nyin polis nyin lapa enda ari tadi nangkap dih?" Ku Bini tuai rumah. "Amai nih nyin endu Suri datai" ku Indai Janin ngepai tudah Suri.

"Endu endu kitu dulu" ku Indai Janin. Mansang ga tudah Suri ngagai sida iya ke betunggung ngirup nya tadi. "Kini antu nya di bai orang endu nama mati iya" ku Indai Janin. "Ke Sepital ibu, alu enda ngeleda iya tadi" ku Suri nyaut manah. "Kapa nganjung uji alu tumbak ka tisi Pendam Niang ngambi Niang nyekak iya sekali" ku saut tudah Bini Tuai Rumah. Ninga tudah Tuai Rumah iya lalu bejaku.

"Pulai seduai dik badu betunga seduai antu seduai dik nya enda ninga jaku iya ku ukum seduai legi enda nemu badu bejaku" ku Tuai Rumah nganu bini iya enggau Indai Janin. Ninga tuai rumah bejaku Suri pan angkat pulai. Pia mega Lenta angkat lalu pulai nuju bilik entua iya badu agi nunga seduai iya. "Dik ka ngukum aku, palu enggau sengayuh patah tu dik legi, nibuh tinduk ba bilik dik tinduk di ruai" ku Bini Tuai rumah nyaut laki iya.

Indai Janin sepa jaga udah angkat nitih ka Menantu asi iya. Tama Indai Janin ka bilik dinga durap Apai Janin nganu laban malu ka ulah seduai iya bini tuai rumah tadi. "Pagila nibub pansut dik! Nibuh ngirup begulai seduai dik ngemalu aku dik nya, nya enti Indai Lika pahai, tangkap orang seduai dik nya kati ko aku nadai berunding panjai lalu ka bejamah aja aja seduai dik.!! Nama dik ka makai sengayuh bini tuai rumah baru pia, aku nyekung dik!" Ku Apai Janin besai nyawa. Janin enggau Bini iya Lenta enda memunyi ninga jaku api iya ngemesai nya nganu.

"Uji arhh ambi din sengayuh Indai Jawan nya, bai kitu sapa tua makai sengayuh legi, din dik tinduk langkau janik serati din, nibuh tama ka bilik kitu" ku Indai Janin lalu tama ngunchi bilik peninduk seduai iya. Nya mih Janin nyau ketawa meda apai iya di asuh tinduk enggau janik enggau serati ba baruh rumah din. "Nya nama utai di ketawa ka dik gaga meda aku asuh tinduk enggau bala janik bala serati pia, enti pia sama tua tinduk din" ku Apai Janin nganu Janin.

"Ehh enda aku enggau dik kami bisi bini kimbit wai apai, enggau dik nadai udah ringat" ku Janin angkat lalu narit jari bini iya pulai ka bilik. Malik baru iya lalu nundi apai iya "Apai enti chelap indu binduk nya di kimbit au hahaha" ku janin ketawa lalu tama. "Mali kenya sayau nadai tau kitai nundi apai munyi nya" ku Lenta bejaku. "Minta ampun mih sulu" ku Janin.

"Nadai geguna bejaku tadi nyau asuh tinduk enggau bala janik enggau serati tudah aku" ku Apai janin mansut ke diri ke ruai. Palik iya di setak tudah tuai rumah agi dedugau ngisap ba ruai betungkat ka dagu. Mansang iya ngagai tuai rumah iya lalu nunduk ka diri. "Nama dik duduk di ruai tuai lalu bedau tama" ku Apai Janin nanya. "Ehh kunchi indai tuai pintu par" ku Tuai rumah nyaut. "Sama tua tuai aku nyau di asuh tinduk enggau bala serati bala janik nadai aku ka" ku Apai Janin.

Lama seduai iya enda memunyi pemuas udah nya seduai iya bejaku baru. "Nama mih tua bulih bini ngemangah seduai iya nya nih tuai" ku Apai Janin. "Bai enggau dik par enda kelalu enggau aku antu sengayuh iya nya, mimit sengayuh iya nya di pantai ka iya" ku Tuai rumah nyaut. "Ba iya tuai uji lalai ka tua sengayuh enggau pemansai seduai iya nya ney, ngambi nadai agi kena seduai iya". Ku Apai Janin madah ka Tuai Rumah. "Amai nih aram angkat dik dini tua ngelalaika sengayuh enggau pemansai iya tu" ku Tuai rumah.

Selabuh nya Suri pansut ka nambit pintu. Meda seduai nya migai sengayuh enggau pemansai nyau gegining. Mansang iya lalu nanya seduai nya. "Aya nama ulah seduai dik bepegaika Sengayuh enggau pemansai nya" ku Suri nelai seduai iya. Tekenyit seduai iya tadi lalu seretai malik ngagai Suri. "Eh dik tu endu mali nanya enda nelai dik kenduai aya dik nyau tekenyit" ku tuai rumah. "Kini enda nyelai seduai peda ulah seduai dik enda nyalah baka ibu Indai janin enggau ibu tuai rumah, nama seduai ka nganti dua iku nya pia?" Ku Suri nanya

"Enda aku tu nganti seduai iya ke gila nya, kenduai aya dik ka ngelalai ka sengayuh enggau pemansai tu, tang enda nemu dini ngelalaika tu" ku Tuai rumah bejaku. "Nama mih main seduai ka ngelalai ka nya dih?" Ku Suri mayuh utai di tanya. "Mayuh nya utai di tanya dik tu endu, uji enggau tua aya dik berunding dini ngelalai ka tu ney" ku tuai rumah. "Enda aku enggau seduai legi aku makai sengayuh enggau pemansai nya" ku Suri nyaut. "Dik ka anang madah enti madah sama kena kitai tiga nemu dik" ku Apai Janin bejaku.

"Din ngelalaika sengayuh enggau pemansai ba ini Linau din, din nadai orang nemu" ku Suri. Ini Linau tu diau ke diri ba mua tanju sida iya laban ka nadai orang begulai iya enggau ba rumah panjai laban idup kediri ko iya nya mih diau ba ujung tanju aja. Nyau mih sida iya tiga ngangkut bala sengayuh enggau pemansai ngagai ini Linau. Nya mih ini Linau nyau rerangap meda ulah sida iya tiga. "Ibu tu sengayuh pemansai di lalai ka kami tiga ditu, anang sekali kali dik madah ka utai tu ditu, kasih ka kami ibu enda alah makai sengayuh laban tuyu dua nyin ila" ku Tuai Rumah madah ka Ini Linau. "Au dom au, nadai aku madah nadai mih aku nusi ukai orang kitu" ku Ini Linau nyaut. Sida iya tiga lalu pulai ka ruai baru Suri lalu tama ka bilik udah berandau anang madah ka ulah sida iya tiga...